سەيسەنبى، 27 قازان كۇنى اقتوبە وبلىسىنىڭ اكىمى وڭداسىن ءورازاليننىڭ قاتىسۋىمەن «ادەبيەت. رۋح. قوعام» اتتى ادەبيەت كەشى ءوتتى.
ادەبيەت كەشىنە قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت، اقىن اقۇشتاپ باقتىگەرەەۆا، قر ەڭبەك سىڭىرگەن قايراتكەرى قاجىعالي مۇحانبەتقاليۇلىنىڭ جۇبايى سۇلۋحانىم فاتيحقىزى قاتىستى.
ايتىپ كەتەيىك، اقتوبە وبلىسىندا الەمدى جايلاعان پاندەميا قيىندىقتارىنا قاراماستان «ادەبيەت. رۋح. قوعام» تاقىرىبىنداعى باسقوسۋ ءداسترلى تۇردە وتكىزىلىپ وتىر. وتكەن جىلى رەسپۋبليكالىق ادەبيەت فورۋمىن وتكىزىپ، اقتوبەلىك اقىن-جازۋشىلار اتىنداعى ارنايى سىيلىق تاعايىندالىپ، ۇزدىكتەرگە بەرىلگەن بولاتىن.
ايماق باسشىسى ادەبيەت كەشىنىڭ اشىلۋىندا قۇتتىقتاۋ ءسوز سويلەپ، بىرقاتار اقىن-جازۋشىلارعا ارنايى سىيلىقتار تابىستاپ، كەلگەن قوناقتارعا ءوزىنىڭ العىسىن ءبىلدىردى.
«كيەلى اقتوبە ءوڭىرى تىڭ تۋىندىلارىمەن، ولەڭ جىرلارىمەن قيىرعا شارلاتىپ، قياعا سامعاتاتىن اقيىق اقىن-جازۋشىلارعا باي ولكە. قازاق اۋىز ادەبيەتىنىڭ سوڭعى جىراۋى ن.بايعانين، ودان كەيىنگى ت.احتانوۆ، ق.شاڭعىتباەۆ، ج.تىلەپبەرگەنوۆ، س.جيەنباەۆ، ءو.نۇرعاليەۆ، ت.جارماعامبەتوۆ، ق.توقمۇرزين، ە.دۇيسەنباەۆ، ق.مۇحانبەتقاليەۆتەردىڭ ارقايسىسى ءبىر توبە. بۇگىندە ولاردىڭ ءىزىن جالعاۋشى اقتوبەلىك اقىن-جازۋشىلار قازاق ادەبيەتىنىڭ دامۋىندا وزىندىك ورىندارىنىڭ بار ەكەندىگىن كورسەتىپ كەلەدى. وسىنداي ءىرى شارالارمەن بىرگە ءوتىپ جاتقان بۇگىنگى باسقوسۋ اقتوبەگە، جالپى ەلىمىزگە جاڭا ءبىر رۋحاني سەرپىلىس، جاڭا لەپ بەرەدى دەگەن سەنىمدەمىن»، - دەدى ايماق باسشىسى.
بىلتىرعى جىلعى فورۋم اياسىندا قولعا الىنعان بىرقاتار شارالار جۇزەگە اسىرىلدى. اقىن ءى.مامبەتوۆتىڭ، س.جيەنباەۆتىڭ، ت.جارماعامبەتوۆتەردىڭ مەرەيتويلارى كەڭ كولەمدە اتاپ ءوتىلدى. «اقتوبە كىتاپحاناسى» سەرياسى جالعاسىپ 27 توم كىتاپ جارىق كورىپ، بۇل سەريامەن شىققان كىتاپتار سانى 50-گە جەتتى. جاستار جىلىنا وراي قازاقستان جازۋشىلار وداعى وبلىستىق فيليالىنىڭ ۇسىنىسىمەن «جاۋقازىن» سەرياسىمەن 10 اقتوبەلىك جاس قالامگەردىڭ تۇڭعىش كىتابى جارىققا شىقتى. ومىردەن وتسە دە ۇرپاق ءۇشىن ادەبيەت سالاسىندا وشپەستەي ءىز قالدىرعان اقتوبەلىكتەر رۋحىنا ارناپ، اقتوبە وبلىسىنىڭ اكىمدىگى قالامگەرلەردىڭ اتىنداعى 7 ارنايى ستەپەنديا تاعايىندالىپ وتىر. كەلەسى جىلى تاعى دا اقتوبەلىك اقىن-جازۋشىلاردىڭ اتىنداعى قوسىمشا 6 نوميناتسيا بويىنشا ارنايى ستەپەنديا تاعايىنداۋ جوسپارلانىپ وتىر.
ادەبي كەشكە ارنايى كەلگەن قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت باستاعان اقىن-جازۋشىلار قاۋىمى ءوڭىر اقىندارىن قولداپ كەلە جاتقان ايماق باسشىسىنا وزدەرىنىڭ العىستارىن ءبىلدىردى.
«مۇنىڭ بارلىعى ۇلت مادەنيەتىنىڭ ءوسىپ-وركەندەۋىنە، قازاق ادەبيەتىنىڭ قارىشتاپ دامۋىنا باعىتتالعان جۇمىستاردىڭ ءبىر بولشەگى عانا. ءبىزدىڭ ۇستانىمىمىز، اقتوبە قالاسى رەسپۋبليكاداعى ءىرى مادەني استانالاردان ەش كەم بولماۋى ءتيىس. ءوڭىر قالامگەرلەرىن قولداۋدا ءبىز وسىعان نازار اۋدارۋدامىز»، - دەپ وبلىس اكىمى و.ورازالين ادەبي شارانى قورىتىندىلادى.
