Memlekettiń bas sanıtary Jandarbek BEKShIN lokdaýn kezinde bolǵan úlken qatelikterdi atap kórsetti dep habarlaıdy «Adyrna» ulttyq portaly Tengrinews.kz saıtyna silteme jasap.
Jýrnalıstermen ótken onlaın brıfıng barysynda Bekshın: «Qoǵamdyq kólikterdiń júrý ýaqytyn saǵat 18.00 ge deıin shekteý sharalary úlken qatelik boldy dep sanaımyn. Jumysqa barýdyń negizgi ýaqyty tańǵy 7.00- den 10.00-ǵa deıin jáne qaıtý ýaqyty keshke 17.00-den 20.00 aralyǵy. Avtobýstar ýaqytyn shekteý saldarynan adamdardyń aıaldamalarda kóptep shoǵyrlanýy, avtobýstarda tyǵylysyp otyrýy sııaqty jaǵdaılar boldy. Al jeksenbi kúnderi indet ósý kórsetkishi tómen boldy»,-dedi. Osyǵan baılanysty vedomstvo ótken tájirıbe qateliginen sabaq alyp, qoǵamdyq kóliktiń júrisi turaqtalǵanyn málimdedi.
Bas sanıtardyń bul aıtqan qatelikterinen bólek lokdaýn kezinde taǵy qandaı qatelikterge jol berilgenine syrt kózdiń pikiri qandaı? Máselen, shymkenttik zeınetker Sara apa: «Karantın dep jarııalap alyp, bazar jumystaryn beıbereket etti. Shymkentte adam kóptep baratyn bazarlar túsiniksiz ýaqytta jumys istedi. Sonyń saldarynan adamdar yǵy-jyǵy bolyp júrdi. Vırýstyń taralýy sol kezde ósken de shyǵar dep oılaımyn»,- deıdi. Al atyraýlyq oqyrmanymyz Asyljan: «Kafelerdi ashyp, monsha men shashtarazdyń ýaqytyn shekteýdi qatelik dep sanaımyn. Jurt shashyn kestirip, jýynyp shaıynbaı, kafelerde demalyp otyrsyn dedi me, túk túsinbeımin», -dep kúledi.
Túrkistan oblysynyń azamaty Áýelhan ShONJAN: «Jalpy, bizdiń elde qate emes dúnıe bar ma? «Karantın» dep qoıyp, talaı toıhana júzdegen adamǵa tyǵylyp toı jasaýda. Qudalyǵyń da, betasharyń da, janazań da bári burynǵysynsha ótip jatyr. Álgi vırýsyń kópshilik jınalǵan jerden juǵady dese, onda bılik shekteý sharasynyń ózin durys qoıyp otyrmaǵanyn kóresiń. Elimizdegi bir mektepke bala baryp oqysa, endi bir mekteptiń esiginde qara qulyp tur. Aınalaıyndar-aý, sonda nemene álgi koronavırýs «mynaý mektepke baram, anaý mektepke barmaımyn» dep tańdaý jasaıtyn bolǵany ma? Adamnyń aqylyna keletin shekteý túrlerin engizý kerek qoı!»-dep kúıinedi.
Qazaqstanda karantındik sharalar áli de jalǵasýda. Birqatar nysandar áli kúnge tolyqtaı iske qosylmady. Desek te, qaı óńirge barsańyz da, jurttyń «koronavırýsty áldeqashan umytqanyn» baıqaısyz. Alysqa uzamaı-aq, poıyzǵa otyryńyzshy. Kez kelgen baǵyttaǵy poıyzǵa otyryp kórińiz. Poıyzyńyz adamǵa lyq toly. Poıyzdarda sanıtarlyq talaptar týraly sóz etýdiń ózi artyq. Betperde taǵyp, qazaqstandyq eski poıyzda eshkim de tunshyǵyp ólgisi kelmeıtini sózsiz. Sondyqtan poıyzdarda betperde taqqan adamdy kórmeısiz. Al poıyzdyń ishinde antıseptıktiń ydysyn kózińiz shalsa, qolyńyzdy jýam dep áýre bolmańyz. Óıtkeni syrtyna «Antıseptık» dep jazylǵan qutynyń ishi bos bolýy ábden múmkin. Dál sol antıseptıktiń bos qutysy sekildi, Qazaqstandaǵy karantın sharalary da aty-bar, ózi-joq. Lokdaýn kezindegi qatelik tarıhtyń qoınaýyna ketti. Eń bolmasa, dál qazirgi kezdegi kózge badyraıyp kórinip turǵan qatelikterdi túzetken jón bolar, siz qalaı oılaısyz, qurmetti oqyrman?
Raýana DIMAShQYZY,
«Adyrna» ulttyq portaly.
Foto ashyq derekkózden alyndy.
