اقپارات جانە قوعامدىق دامۋ ءمينيسترى ايدا بالاەۆا مەملەكەت باسشىسى جولداۋىنىڭ نەگىزگى ەرەجەلەرىن ءتۇسىندىرۋ جونىندەگى ءباسپاسوز كونفەرەنتسياسىندا «اقپاراتقا قولجەتكىزۋ تۋرالى» زاڭعا وزگەرىستەر مەن تولىقتىرۋلار ەنگىزۋ بويىنشا جۇمىس جۇرگىزىلىپ جاتقانىن حابارلادى. قۇجات 2015 جىلدان بەرى جۇمىس ىستەپ كەلەدى جانە ازاماتتاردىڭ «اشىق ۇكىمەت» پورتالى بازاسىندا اقپاراتتى ەركىن الۋعا جانە تاراتۋعا قۇقىق بەرەدى.
پورتال اياسىندا 4 پلاتفورما جۇمىس ىستەيدى – اشىق دەرەكتەر، اشىق بيۋدجەتتەر، اشىق نقا جانە اشىق ديالوگ. ايدا بالاەۆا ءبىر عانا «اشىق ديالوگ» پلاتفورماسىندا ءبىرىنشى باسشىلاردىڭ بلوگتارىنا 367 مىڭنان استام ءوتىنىش بەرىلگەنىن ايتتى.
«دەگەنمەن دە، قوعام تاراپىنان پورتالعا جۇكتەلگەن مالىمەتتەرگە قاتىستى ورىندى سىن-پىكىرلەر دە ايتىلىپ ءجۇر. اتاپ ايتقاندا، كەيبىر اقپاراتتار – وقۋعا ىڭعايسىز، ۇعىنىقسىز فورمادا ۇسىنىلادى، سۇراقتارعا دەر كەزىندە جاۋاپ بەرىلمەيدى»، - دەدى مينيستر.
وسىعان بايلانىستى پرەزيدەنت قاسىم-جومارت توقاەۆ ءوز جولداۋىندا اقپاراتقا قولجەتكىزۋ ماسەلەلەرى بويىنشا زاڭناماعا وزگەرىستەر ەنگىزۋ قاجەتتىگىن اتاپ ءوتتى.
تۇزەتۋلەر ەكى مىندەتتى شەشۋدى كوزدەيدى: باقىلاۋ مەن جاۋاپكەرشىلىكتى كۇشەيتۋ، سونداي-اق «اقپاراتقا قول جەتكىزۋ تۋرالى» زاڭنىڭ جەكەلەگەن نورمالارىن قولدانۋ اياسىن كەڭەيتۋ. وسىلايشا، اقپارات جانە قوعامدىق دامۋ مينيسترلىگىنە اقپاراتقا قولجەتكىزۋ سالاسىنداعى ۋاكىلەتتى ورگاننىڭ فۋنكتسيالارى بەرىلەتىن بولادى جانە مەملەكەت باسشىسىنا اقپاراتقا قول جەتكىزۋ سالاسىنىڭ جاي-كۇيى تۋرالى جىل سايىن ەسەپ تاپسىرىلىپ وتىرادى.
بۇدان باسقا، اقپارات يەلەنۋشىلەرگە كاسىپكەرلىك سۋبەكتىلەرى مەن ولاردىڭ بىرلەستىكتەرىن، مەملەكەتتىك ورگانداردىڭ فۋنكتسيالارىن جۇزەگە اسىراتىن ءوزىن-ءوزى رەتتەيتىن جانە ۇكىمەتتىك ەمەس ۇيىمداردى جاتقىزۋ ۇسىنىلادى. ازىرلەنگەن تۇزەتۋلەر قازىرگى ۋاقىتتا پارلامەنت ماجىلىسىندە قارالاتىن اقپارات ماسەلەلەرى جونىندەگى زاڭ جوباسىنا ەنگىزىلدى. جىل سوڭىنا دەيىن زاڭ جوباسى پرەزيدەنتتىڭ قول قويۋىنا ەنگىزىلۋى ءتيىس.
