«الاتاۋ» ءداستۇرلى ونەر تەاترى ءوزىنىڭ كەزەكتى 4 ماۋسىمىن قازان ايىنىڭ ءبىرىنشى جەكسەنبىسىندە وتكەن ۇستازدار مەرەكەسىنە وراي «ۇستاز – ساعان مىڭ العىس!» اتتى مەرەكەلىك كونتسەرتىمەن اشتى.
ەلىمىزدە ورىن العان ىندەت جاعدايىنا بايلانىستى مەملەكەت باسشىسى قاسىم-جومارت توقاەۆ مىرزا : "جاڭا الەمدەگى ەڭ قۇندى دۇنيە سانالاتىن بىلىمگە جول اشاتىن ۇستازدارعا تابىس تىلەيمىن. پاندەميا مەكتەپتەر مەن جوعارى وقۋ ورىندارىنداعى وقۋ جىلىنىڭ باستالۋىنا كەرى اسەرىن تيگىزدى. بىراق بۇل – ۋاقىتشا قۇبىلىس" – دەگەن بولاتىن. سونداي-اق، الەمدى جايلاعان ىندەت العا قويعان جوسپاردىڭ ىسكە اسۋىنا كەدەرگى جاساپ، ونەر وشاقتارىنىڭ شىعارماشىلىق قىزمەتىنە توسقاۋىل بولدى. كارانتين كەزىندە كورەرمەنمەن بايلانىسىن ءۇزىپ الماۋ ءۇشىن "الاتاۋ" تەاترى «ونلاين ەفير» ارقىلى كەلەلى كەزدەسۋلەر مەن سىر-سۇحباتتار وتكىزگەن. تەاتر – رياسىز تازا، پاتشا كوڭىلدى كورەرمەنىمەن كەزدەسۋدى اسىعا كۇتىپ، ول كۇنگە دە جەتتى.
ماۋسىماشار مەرەكەلىك كونتسەرتتە «الاتاۋ» ءداستۇرلى ونەر تەاتر ديرەكتورىنىڭ دامىتۋ جونىندەگى ورىنباسارى باياديلوۆ حالەل وڭعارۇلى قۇتتىقتاۋ ءسوز سويلەپ، ۇستازدار قاۋىمنىڭ ەرەن ەڭبەگىنىڭ باعاسى ولشەۋسىز ەكەنىن ايتا كەتىپ، وتباسىلارىنا اماندىق تىلەدى.
مەرەكەلىك شارا «الاتاۋ» فولكلورلىق-ەتنوگرافيالىق ءانسامبلىنىڭ ورىنداۋىنداعى ورىنباي دۇيسەنوۆتىڭ «قۇلاگەر» كۇيىمەن باستاۋ الدى.
تەاتر انشىلەرى ءانسامبلدىڭ سۇيەمەلدەۋىمەن حالىق اندەرىن شىرقاپ، حالىق كومپوزيتورلارىنىڭ اندەرىندە ورىندادى. قر ەڭبەك سىڭىرگەن قايراتكەرى پەريزات وماربەكوۆانىڭ جەكە ورىنداۋىندا «ايجان قىز» ءبيىن بيلەپ، اكتەرلار قۇرامى عافۋ قايىربەكوۆتىڭ «ۇستازىما» ولەڭىن وقىدى. سونداي-اق، «الاتاۋ سەرىلەرى» مەن «ۇشقوڭىر» توبى ۇستازدارعا مەرەكەلىك كوڭىل سىيلاپ، كونتسەرتتى جانداندىرا ءتۇستى.
تەاتر ساحناسى مەرەكەلى دۋمانعا بولەنىپ، ونەرپازدار قاۋىمى كورەرمەنمەن قۋانا قاۋىشتى.
گۇلۆيرا اسقارقىزى،
"ادىرنا" ۇلتتىق پورتالى
