اقش-تىڭ قازاقستانداعى ەلشىسى ۋيليام موزەر Kazakh TV ارناسىنا بەرگەن سۇحباتىندا "بورات" ءفيلمىنىڭ سيكۆەلىنىڭ شىعۋىنا قاتىستى پىكىرىن ايتتى، دەپ حابارلايدى "ادىرنا" ۇلتتىق پورتالى Stan.kz اقپارات اگەنتتىگىنە سىلتەمە جاساپ.
ەلشى ءفيلمنىڭ ءبىرىنشى بولىگىن تولىق كورمەگەنىن، تەك ونىڭ ۇزىندىلەرىن كورگەنىن ايتتى.
"بۇل فيلم عوي. ادامدار كينوعا بارادى، ونى كورەدى جانە بولدى", - دەدى بوراتتىڭ ەكىنشى ءبولىمى تۋرالى موزەر.
ونىڭ ايتۋىنشا، اقش-تا تۇراتىن قازاقستاندىقتار - ەلدىڭ ناعىز وكىلدەرى.
"ادامداردىڭ ەل تۋرالى تۇسىنىگى جانە وعان بارماي-اق ول تۋرالى نە ويلايتىنى جەكە بايلانىستاردىڭ نەگىزىندە قالىپتاسادى. اقش-تا قازاقستاننىڭ تالانتتى وكىلدەرى كوپ. وز ەلىن شىنىمەن تانىستىراتىن ادامدار فيلمنەن گورى الدەقايدا ۇزاق ەستە قالادى", - دەپ تولىقتىردى موزەر.
ەسكە سالا كەتەيىك، "بورات" كومەدياسىنىڭ ءبىرىنشى ءبولىمى 2006 جىلى جارىق كوردى. وندا اۆتور ويدان شىعارىلعان كەيىپكەر - قازاقستاندىق جۋرناليست بورات ساعديەۆتىڭ بەينەسىن پايدالانا وتىرىپ، ەشقاشان بارىپ كورمەگەن ەل جايلى باياندايدى. فيلم الەمدە ايتارلىقتاي رەزونانس تۋدىردى، قازاقستاندا ول قاتتى سىنعا ۇشىرادى جانە كورسەتۋگە تىيىم سالىندى.
كارتينانىڭ ەكىنشى ءبولىمى "بورات: پورنوگرافيالىق مايمىلدىڭ ۆيتسە-پرەمەر ميكاەل پەنسكە جاقىندا ازايعان قازاقستان حالقىنىڭ يگىلىگى ءۇشىن بەرگەن سىيى" (Borat: Gift Of Pornographic Monkey To Vice Premiere Mikhael Pence To Make benefit Recently Diminished Nation of Kazakhstan) دەپ اتالادى.
ءفيلمنىڭ پرەمەراسى Amazon Prime Video ۆيدەوسەرۆيسىندە 23 قازاندا وتەدى.
