سەناتتاعى ۇكىمەت ساعاتىندا تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ينتەرنەت نەگە ءالسىز ەكەنىن ايتتى دەپ حابارلايدى «ادىرنا» ۇلتتىق پورتالى Baq.kz اقپاراتتىق اگەنتتىگىنە سىلتەمە جاساپ.
تەلەكوم وپەراتورلارىمەن بىرىگىپ، ينتەرنەت جەلىسىن دامىتۋ ءۇشىن ەلىمىزدە ەكى اۋقىمدى جوبا ىسكە اسىرىلۋدا. بىراق سوعان قاراماستان، نەگە ينتەرنەت ءالسىز دەگەن سۇراققا كەلسەك، بىرنەشە سەبەپ بار. بىرىنشىسى، ينتەرنەت ساپاسىنا قاتاڭ تالاپتاردىڭ بولماۋى. ەكىنشىسى، تەلەكوممۋنيكاتسيا جەلىسىنىڭ 90 پايىزى راديورەلەلىك جەلىدە جانە اۋە بايلانىس ارنالارى بويىنشا سالىنعان. تەلەكوممۋنيكاتسيالىق وپەراتورلاردىڭ قىزمەتىنە تومەن ايىپپۇلدار بەلگىلەنگەن. ياعني تەك 100 اەك سوماسىندا عانا ايىپپۇل سالا الامىز، - دەيدى باعدات مۋسين.
ونىڭ ايتۋىنشا، توقاەۆ ءمينيستردى قابىلداعان كەزدە راديوجيىلىك سالاسىنداعى «لاتيفۋنديزم» ماسەلەسىنە توقتالعان.
بۇل دەگەنىمىز كىشى تەلەكوم وپەراتورلار وزدەرىنە راديوجيىلىكتەر الىپ، ولاردى قىزمەت كورسەتۋ ءۇشىن پايدالانباۋدا. راديوجيىلىك رەسۋرستاردى ءتيىمدى قولدانۋ ماڭىزدى ەكەنى تۇسىنىكتى. ءبىز ارنايى اۋديت جاساپ، پايدالانىلماي كەلە جاتقان جيىلىكتەردى مەملەكەتكە قايتارىپ الۋدى جوسپارلاۋدامىز. بىراق ول ءۇشىن ءتيىستى ستاندارتتار مەن زاڭناماعا وزگەرىستەر ەنگىزۋ قاجەت، - دەدى مينيستر.
ونىڭ ايتۋىنشا، بۇگىندە 6 459 ەلدى مەكەننىڭ ىشىندە 118 قالا مەن 4 558 اۋىل ءارتۇرلى تەحنولوگيا بويىنشا ينتەرنەتپەن قامتاماسىز ەتىلگەن. جىل سوڭىنا دەيىن 5 331 ەلدى مەكەندى ينتەرنەتپەن قامتاماسىز ەتۋ جوسپارلانۋدا.
ەكى جوبانىڭ بىرەۋى - بۇل مەملەكەتتىك-جەكەشەلىك ارىپتەستىك تەتىگى ارقىلى وپتيكالىق ينتەرنەتتى شالعايداعى اۋىلدارعا تارتۋ جوبا بويىنشا 2,4 ملن ادام تۇراتىن 1260-قا جۋىق اۋىلعا ينتەرنەت جەلىسى تارتىلۋدا. ەگەر 2018 جىلى 56 اۋىلعا وپتيكالىق جەلى تارتىلسا، ەندى 944 اۋىل قوسىلاتىن بولادى. بۇل جوباعا 75 ملرد تەنگەگە جۋىق ينۆەستيتسيا تارتىلدى. جوبا اياسىندا 3 700 مەملەكەتتىك ورگان مەن بيۋدجەتتىك مەكەمەلەرگە بايلانىس جەتكىزىلدى. ەكىنشى جوبا 250 ادامنان كوپ تۇرعىنى بار 928 اۋىلدى 3G جانە 4G, سونداي-اق باسقا تەحنولوگيا بويىنشا ءموبيلدى ينتەرنەتپەن قامتۋدى كوزدەيدى، - دەدى مۋسين.
فوتو اشىق دەرەككوزدەن الىندى.
