قوعامدىق قور بۇرىن ءىستى بولعان جاننىڭ وتباسىنا قايىرىمدىلىق كومەك كورسەتتى

2545
Adyrna.kz Telegram

قوعامدا جاڭىلىسىپ جازا باسقان جانداردىڭ سانى از ەمەس. سونداي ادامداردىڭ ءبىرى – الماتى قالاسى ناۋرىزباي اۋدانىنىڭ تۇرعىنى گۇلنۇر ء(وز سۇراۋى بويىنشا ەسىمى وزگەرتىلىپ جازىلدى). قازىر ول بەس بالانىڭ اناسى. قالا شەتىندە ۋاقىتشا باسپانا جالداپ تۇرادى. بىرنەشە جەردە قارا جۇمىس ىستەگەنىمەن تاپقان-تايانعانى بالا-شاعاسىن اسىراۋعا جەتە بەرمەيدى. گۇلنۇر اۋداندىق پروباتسيا بولىمىندە ەسەپتە تۇرعاندىقتان، وعان قىلمىستىق-اتقارۋ جۇيەسى تاراپىنان ءجيى كوڭىل بولىنەدى.

وسى اپتادا ناۋرىزباي اۋداندىق پروباتسيا ءبولىمىنىڭ اعا ينسپەكتورى زامير بەيسەنبەتوۆ، ينسپەكتور ءنازيرا ابسەروۆا، «ماڭگىلىك قازاقستان» قوعامدىق قورى ديرەكتورىنىڭ مىندەتىن اتقارۋشى بەيبىت نالىباەۆ گۇلنۇردىڭ جانۇياسىنا ات باسىن بۇرىپ، ولارعا ازىق-تۇلىك قورجىنىن تابىس ەتتى. قوناقتاردىڭ قايىرىمدىلىق تارتۋىن قابىل العان شاڭىراق يەسى ءوز ريزاشىلىق ءبىلدىرىپ، «ورامال تون بولماسا دا، جول بولادى» دەگەن. وسىنداي كومەكتەر ءبىزدىڭ تۇرمىسىمىزدى الدەقايدا جەڭىلدەتەدى. ءبىزدىڭ ءبىر ايلىق شىعىنىمىزدىڭ ورنىن تولتىرىپ وتىرسىزدار. راحمەت سىدەرگە» دەپ العىسىن ءبىلدىردى. ال اعا ينسپەكتور ز.بەيسەنبەتوۆ الەۋمەتتىك كومەككە مۇقتاج جانداردىڭ اۋداندا ءالى دە بارشىلىق ەكەنىن جاسىرمادى. «بۇرىن سوتتى بولعان ادامداردىڭ جۇمىس تابۋى قيىن. ولاردى جۇمىس بەرۋشىلەر وڭايلىقپەن جۇمىسقا قابىلداي قويمايدى. سول سەبەپتى ولار ءارتۇرلى قارا جۇمىستاردى ىستەپ كۇنەلتەدى» دەيدى ول. ال قور جەتەكشىسى بەيبىت نالىباەۆتىڭ سوزىنشە قايىرىمدىلىق كومەك الماتى قالاسى قوعامدىق دامۋ باسقارماسىنىڭ قولداۋىمەن ىسكە اسىپ جاتىر. «باسقارما تۇرمەدە جازاسىن وتەپ جاتقان جانە باس بوستاندىعىنان ايىرۋ ورىندارىنان شىققان ازاماتتارعا ارنالعان جوبانى جۇزەگە اسىرۋدى بيىل بىزگە جۇكتەدى. وسى جوبا اياسىندا پسيحوالەۋمەتتىك باعدارلامالاردى ۇيىمداستىرۋ دەگەن پۋنكت بار. قايىرىمدىلىق كومەك وسىنىڭ اياسىندا كورسەتىلىپ وتىر» دەيدى جوبانىڭ باسى قاسىندا جۇرگەن ب.نالىباەۆ.

ەستەرىڭىزگە سالا كەتەيىك، «ماڭگىلىك قازاقستان» قوعامدىق قورى تۇركىسىب اۋداندىق پروباتسيا ءبولىمىنىڭ ەسەبىندە تۇرعان ازاماتتارعا دا قايىرىمدىق كومەكتەر كورسەتكەنىن جاريالاعانبىز.

 

ن.ناۋرىزاليەۆ

پىكىرلەر