قالالىق دەنساۋلىق ساقتاۋ باسقارماسىنىڭ مالىمەتىنشە، بۇگىنگى تاڭدا شىمكەنتتە كاۆاساكي اۋرۋى بار بالالار تىركەلگەن جوق. اعىمداعى جىلدىڭ 22 قىركۇيەگىندەگى جاعداي بويىنشا شىمكەنتتە ەكى، التى جانە جەتى جاستاعى بالالاردا مۋلتيسيستەمالىق قابىنۋ سيندرومىنىڭ 3 جاعدايى تىركەلدى. قازىرگى ۋاقىتتا ولاردىڭ ەكەۋى اۋرۋىنان ايىعىپ ۇيىنە شىعارىلدى. ءبىر بالا ستاتسيونارلىق ەم الۋدا.

دارىگەرلەر ونىڭ جاعدايىن تۇراقتى، ورتاشا اۋىر دەپ باعالايدى. بالالار مەن جاسوسپىرىمدەردە Covid-19-بەن ۋاقىتشا بايلانىستى كوپ جۇيەلى قابىنۋ سيندرومى كەيبىر كلينيكالىق بەلگىلەرگە سايكەس كاۆاساكي اۋرۋىنا ۇقساس ەكەندىگى اتاپ ءوتىلدى.

كوروناۆيرۋستىق ينفەكتسيانى، ونىڭ ىشىندە اسيمپتوماتيكالىق فورمانى جۇقتىرعان بالالار مەن جاسوسپىرىمدەردەگى مۋلتيسيستەمالىق قابىنۋ سيندرومى قىزبا، اۋىر اۋرۋ جانە كوروناۆيرۋستىق ينفەكتسيانىڭ زەرتحانالىق جانە ەپيدەميولوگيالىق دالەلدەرىمەن بىرگە ەكى نەمەسە ودان دا كوپ مۇشەلەر جۇيەسىنىڭ زاقىمدالۋىمەن سيپاتتالادى.

بۇل سيندرومنىڭ نەگىزگى بەلگىلەرى: قىزبا، قالتىراۋ، 24 ساعات ىشىندە دەنە تەمپەراتۋراسىنىڭ 38 گرادۋسقا دەيىن كوتەرىلۋى، تىنىس الۋ ورگاندارىنىڭ زاقىمدانۋى (جوتەل), تىنىس الۋ جەتكىلىكسىزدىگى، تەرىنىڭ زاقىمدانۋى (بورتپە), شىرىشتى قاباتتار (كونيۋنكتيۆيت، سكلەريت), ليمفوادەنوپاتيا، قول مەن اياقتىڭ ءىسىنۋى، اسقازان-ىشەك اۋرۋىنىڭ كورىنىستەرى.

شىمكەنت قالالىق دەنساۋلىق ساقتاۋ باسقارماسىنىڭ بۇيرىعىمەن مۋلتيديستسيپلينارلىق توپ قۇرىلدى. ونىڭ قۇرامىنا گەماتولوگ، كارديولوگ، رەۆماتولوگ، پۋلمونولوگ، نەۆروپاتولوگ جانە رەانيماتولوگ سياقتى ماماندار كىردى. بىلىكتى مەديتسينا قىزمەتكەرلەرىنىڭ توبى مۋلتيسيستەمالىق قابىنۋ سيندرومىنا كۇدىكتى بالالاردىڭ ەمدەۋ-دياگنوستيكالىق پروتسەسىمەن اينالىسادى.

ايتا كەتۋ كەرەك، اتالعان دياگنوزى بار بالالار دەنساۋلىق ساقتاۋ مينيسترلىگىنىڭ باس ماماندارى مەن رەسپۋبليكالىق دەڭگەيدەگى ساراپشىلار توبىنىڭ، الماتى قالاسىنىڭ پەدياتريا جانە بالالار حيرۋرگياسى عىلىمي ورتالىعىنىڭ كۋراتورلارىنىڭ باقىلاۋىندا.