فرانتسيا پرەزيدەنتى ەممانۋەل ماكرون يسلامدىق سەپاراتيزممەن كۇرەسىپ، زايىرلى قوعام قاعيداتتارىن قورعاۋ ءۇشىن قاتاڭ زاڭدار قابىلداۋعا تىرىساتىنىن اتاپ ءوتتى، دەپ حابارلايدى «ادىرنا» BBC News-كە سىلتەمە جاساپ.
ماكروننىڭ ايتۋىنشا، فرانتسياداعى مۇسىلمان ازشىلىق وكىلدەرى مەملەكەتكە قارسى قوعام قۇرۋلارى مۇمكىن. ول قاۋىپتىڭ الدىن الۋ ماقساتىندا مەكتەپتەگى وقۋ باعدارلاماسىن نازاردا ۇستاپ، فرانتسۋز مەشىتتەرىن قارجىلاندىرۋدى قاتاڭ باقىلاۋدى ۇسىندى.
بۇعان دەيىن پرەزيدەنتتەن فرانتسياداعى راديكالدى يسلاميزم قاۋپىنە قاتىستى ۇستانىمىن ناقتىلاۋ تالاپ ەتىلگەن ەدى. الايدا، كوشباسشىنى كەيبىر مۇسىلمان بەلسەندىلەرى يسلام ءدىنىنىڭ تارالۋىنا كەدەرگى كەلتىرۋدە دەپ ايىپتادى.
باسشى مۇسىلماندار ءوز ءدىنىنىڭ ەرەجەلەرى مەن زاڭدارىن العا تارتىپ، پاراللەل قوعام قۇرۋى مۇمكىن دەگەن پىكىردى ۇستانادى. ونىڭ ايتۋىنشا، مۇنداي سەكتانتتىق كەيدە اتا-انالاردىڭ بالالارىن مەكتەپكە جىبەرۋدەن باس تارتۋىنا نەمەسە ولاردى سپورتتىق شارالار مەن جارىستارعا قاتىسۋىنا جول بەرمەي، ونىڭ ورنىنا رەسپۋبليكا زاڭدارىنا قايشى كەلەتىن قاعيدالاردى ۇيرەتۋىنە اكەلەتىن كورىنەدى.
«يسلام - بۇل ءبىزدىڭ ەلىمىزدە عانا ەمەس، بۇكىل الەمدە داعدارىستى باستان وتكەرىپ جاتقان ءدىن»، - دەدى فرانتسيا پرەزيدەنتى.
ماكروننىڭ مالىمدەمەلەرى يسلام دىنىنە قارسى ساياساتكەرلەردى بەلسەندىردى
ەممانۋەل ماكروننىڭ «يسلامدىق سەپاراتيزم» تۋرالى مالىمدەمەلەرى ەلدەگى راديكالدى ساياساتكەرلەردىڭ بەلسەندىلىگىن تۋدىردى. پاريجدەگى يل-دە-فرانس ايماقتىق كەڭەسىنىڭ جەتەكشىسى ۆالەري پەكرەس جولاۋشىلار كارتاسىندا باس كيىممەن تۇسكەن فوتوسۋرەتتەردى قولدانۋعا تىيىم سالۋدى تالاپ ەتتى. ول وسىنداي وتىنىشپەن ىشكى ىستەر ءمينيسترى جەرار دارمانەنگە حات جولدادى. پەكرەستىڭ پىكىرىنشە، بۇل زاڭ ەلدەگى بارلىق جولاۋشىلارعا قولدانىلۋى كەرەك.
يل-دە-فرانس ايماعى كەڭەسىنىڭ باسشىسى مۇنداي شەكتەۋ قازىردىڭ وزىندە استانالىق وبلىستا كۇشىندە ەكەنىن اتاپ ءوتتى.
ەستەرىڭىزگە سالا كەتەيىك، 2 قازاندا فرانتسيا پرەزيدەنتى ەممانۋەل ماكرون «يسلامدىق سەپاراتيزمگە» قارسى كۇرەس تۋرالى زاڭ جوباسى دايىندالعانىن حابارلاعان ەدى. ول ۇسىنعان جاڭا شارالار جىل سوڭىنا دەيىن پارلامەنتتىڭ تالقىلاۋىنا شىعارىلاتىن بولادى.
«ادىرنا» ۇلتتىق پورتالى
