ازەربايجان گەنەراليتەتىندە ەلىنە ساتقىندىق جاسادى دەگەن ايىپپەن ءىرى پوگوندى تۇلعا انىقتالدى. «وتانىن ساتقان وپاسىز» اتانعان ازەربايجان قارۋلى كۇشتەرى باس شتابىنىڭ باستىعى، گەنەرال-پولكوۆنيك نادجمەددين سادىگوۆ بولىپ شىقتى دەپ حابارلايدى «ادىرنا» ۇلتتىق پورتالى rast.kz سايتىنا سىلتەمە جاساپ. سونىمەن گەنەرال سادىگوۆ قانداي ساتقىندىق جاساعان؟
نادجمەددين سادىگوۆ رەسەيدىڭ ارنايى قىزمەت ورگاندارىنا جالدانعان دەگەن كۇدىك بار. ول داعىستاندا تۇراتىن، ماسكەۋدە گۇل بازارى بار بيزنەسمەن جيەنى ارقىلى رەسەي ارنايى قىزمەت ورگاندارىنا جالدانعان بولۋى مۇمكىن. سونىمەن قاتار تەرگەۋشىلەردىڭ پايىمىنشا، باس شتاب باستىعى ازەربايجان ارمياسىنا قاتىستى ەكى ءتۇرلى ۇلكەن اسكەري قىلمىس جاساعان. ونىڭ بىرىندە تاۋلى قاراباق اۋماعىندا جاسالعالى تۇرعان سوعىس قيمىلدارىنىڭ جوسپارىن تۇگەل رەسەي بارلاۋ قىزمەتىنە جەتكىزىپ بەرگەنى ايتىلسا، ەكىنشىسىندە بيىلعى شىلدە ايىندا ارمەنيا جاقتان اتىلعان وقتان قازا تاپقان گەنەرال پولاد گاشيموۆتىڭ ولىمىنە تىكەلەي قاتىسى بار دەپ كورسەتىلگەن.
بىردەن ايتا كەتەيىك، گەنەرال-پولكوۆنيككە قاتىستى العاشقى كۇدىك پەن داۋ-جانجال وسى شىلدە ايىندا-اق كوتەرىلگەن بولاتىن. بىراق ارميا باسشىلىعىنىڭ ءوزى سول كەزدە ونى قورعاپ قالعان. سول تۇستا، 2020 جىلعى 22 شىلدە كۇنى «1NEWS.az» پورتالىندا وسى تاقىرىپتا «پيات لوجنىح وبۆينەني، ۆىدۆينۋتىح پروتيۆ گەنەرالا سادىكوۆا» دەگەن ماقالا شىعىپ، كۇدىكتىڭ بارىنە تويتارىس بەرىلگەندەي اڭگىمە قوزعالدى.
«جۇرت اۋزىندا «سەن دوسىڭنىڭ كىم ەكەنىن ايت، مەن سوسىن ساعان ءوزىڭنىڭ كىم ەكەنىڭدى ايتىپ بەرەمىن» دەگەن ءسوز بار. بۇل ماقال قازىر ازەربايجاندا قارۋلى كۇشتەر باس شتابىنىڭ باستىعى، گەنەرال نادجمەددين سادىگوۆتىڭ جەكە جانە ىسكەرلىك قابىلەتتەرىن قارالاۋ ماقساتىندا ءجۇرىپ جاتقان ناۋقانعا قولدانۋعا وتە جاقسى كەلەدى. ءبىز ءسوز باسىنان بارلىق «ءى»-ءنىڭ ۇستىنە نوقات قويامىز: بۇگىنگى كۇنى نادجمەددين سادىگوۆ – ءبىرىنشى كەزەكتە جاۋىنگەر گەنەرال. وسىمەن ءبارى ايتىلىپ تۇر. نۇكتە!»، – دەپ باستالادى اتالمىش ماتەريال.
بۇدان ارى «جاۋىنگەر گەنەرالدىڭ» وسى كەزگە دەيىن ءجۇرىپ وتكەن جولدارى تۇگەل باياندالىپ شىعىپ، جوعارىدا اتالىپ وتىرعان بەس (!) ايىپتاۋدى جوققا شىعارۋعا ارەكەت جاسالادى.
«ويتكەنى، قازىر جوعارى لاۋازىمدى قىزمەت اتقارىپ وتىرعان ول ازەربايجان جاۋلارىنىڭ ءبارىنىڭ كوزدەرىنە شىققان سۇيەل سياقتى. ويتكەنى، ونىڭ ءوزى مەن جاۋىنگەرلىك ەرلىكتەرىن تەك قاراباق سوعىسىنىڭ ارداگەرلەرى مەن ازەربايجان ارمياسىنىڭ جەكە قۇرامى عانا ەمەس، سونىمەن بىرگە ازەربايجانعا ەشقانداي قاتىسى جوق ادامدار دا بىلەدى. ولاي بولاتىنى، سادىگوۆتىڭ مايور كەزىندە-اق كورسەتكەن جەكە باتىلدىعى، شەشىمتالدىعى مەن پرەزيدەنتكە بەرىلگەندىگى جۇرت اۋزىندا اڭىز بولىپ ءجۇر»، – دەپ كوسىلتەدى ماقالا بۇدان كەيىن.
«ال سول الىستاعى 1979 جىلى ءالى ەشكىمگە ەسىمى بەلگىسىز نادجمەددين سادىگوۆ ءوزىنىڭ داڭقتى جولىن كسرو قارۋلى كۇشتەرى قۇرامىندا ۆزۆود كومانديرى بولۋدان باستاپ، بۇدان ءارى روتا، باتالون كومانديرى جانە پولك كومانديرىنىڭ ورىنباسارى دەگەن جولداردان ءوتتى. ايتا كەتۋ كەرەك، جاس لەيتەنانت سادىگوۆ باكى جوعارى جالپى اسكەري كوماندالىق ۋچيليششەسىن «التىن مەدالمەن» بىتىرگەن كەزدە ونىڭ بۇگىنگى سىنشىلارى ءالى ومىرگە دە كەلگەن جوق ەدى!» بولىپ ورىلەدى كەلەسى جولدار.
پا، شىركىن ءسوز بولعانىڭا! جۇرتشىلىق تاراپىنان جاپپاي كۇدىك تاڭىلعان قايراتكەردى اقتاپ الۋعا مىنا سويلەمدەردىڭ قانداي قاتىسى بار؟ اسكەري قىزمەتىن وسىلاي باستاعان وفيتسەرلەردىڭ اراسىنان ساتقىن شىقپايدى دەپ كىم ايتتى؟ ءجا، ولاردىڭ ءبارى دە ءتىپتى قىزمەت جولىن تاپ وسىلاي باستامايتىن با ەدى؟!سول سياقتى ونى سىناۋشىلاردىڭ بەرتىندە ومىرگە كەلگەنىن العا تارتۋدىڭ قانشالىقتى قاجەتتىلىگى بولدى؟
مۇنىڭ ءبارىنىڭ دالباسا ەكەنىن كەيىنگى وقيعالار تانىتتى. تەك گەنەرالعا تاعىلعان بەس ايىپتىڭ تۋعان ءىنىسى ارمەنيا ارمياسىندا قىزمەت ەتەدى، سوندىقتان سول جاققا ءاردايىم حابار بەرىپ تۇرادى دەگەن تارماق قانا انىقتالماعان كۇيى قالىپتى.
ەڭ قىزىقتى جايت، نادجمەددين گۋسەين وگلى سادىگوۆ ازەربايجاننىڭ تۋماسى ەمەس ەكەن. ول 1956 جىلى 24 مامىردا داعىستاننىڭ دەربەنت قالاسىندا تۋعان. دەربەنتتە ازەربايجانداردىڭ كوپ تۇراتىنى بەلگىلى، سوندىقتان ونىڭ ازەربايجان ۇلتىنان بولۋى دا ابدەن كادىك. ال باكى اسكەري ۋچيليششەسىن بىتىرگەننەن كەيىن وسى جاقتا ءبىرجولا قالىپ قويعان. ءسويتىپ جۇرگەندە، تاۋەلسىزدىك كەلگەن. وسىلايشا ول ەگەمەن ازەربايجاننىڭ ازاماتىنا اينالعان.
«كاۆكازسكي ۋزەل» پورتالىندا جازىلعانداي، گەنەرال-پولكوۆنيكتىڭ تۇلعاسىنا كۇدىك كەلتىرۋ 14 شىلدە كۇنى گەنەرال-مايور پولاد گاشيموۆ، پولكوۆنيك يلگار ميرزوەۆ، سونداي-اق تاعى ەكى مايور، ەكى پراپورششيك جانە ءبىر سولدات ارمەنيامەن شەكارادا وققا ۇشقان كەزدە باستالعان. بىراق ارميا باسشىلىعىنىڭ اقىماقتىعى سالدارىنان ول قىسپاقتان قۇتىلىپ كەتكەن. قايتا سودان كەيىن «حالىق قاھارمانىنا» اينالىپ شىعا كەلگەن.
ازەربايجان ارمياسىنىڭ جوعارعى قۇرامىندا تىڭشى بار ەكەنىن تۇرىك بارلاۋ قىزمەتى ءوز ارنالارى بويىنشا رەسەي بارلاۋ قىزمەتىنە شىعۋ ارقىلى انىقتاعان. سودان كەيىن ونىڭ ناقتى كىم ەكەنىن دە تەكسەرىپ بىلگەن.
وسى جايت بەلگىلى بولعان بويدا نادجمەددين سادىگوۆ قاماۋعا الىندى. بىراق بۇل جايىندا ەشقانداي حابار تاراتىلعان جوق، وسىنداي وقيعا بولعانى جايلى اقپار جايىلىپ كەتكەسىن دە ونىڭ اتى-ءجونى ايتىلمادى.
گەنەرالدىڭ قىزمەتتەن شەتتەتىلگەنى جونىندەگى مالىمەت تەك 1 قازان كۇنى شىقتى. وندا دا رەسمي دەرەكپەن جەتكىزىلگەن جوق. مۇنى WarGonzo Telegram-ارناسى تاراتتى. ارنانىڭ جازۋىنشا، بۇدان ءبىر اي بۇرىن گەنەرال تۇركيادان كەلگەن كەڭەسشىلەرمەن سوزگە كەلىپ قالىپتى. سول جەردە ول ازەربايجان بيلىگىنە قاتىستى دا بىرقاتار اۋىر سىندار ايتىپتى. «ەگەر ءبىز ارميامىزدى تۇرىكتەرگە بەرىپ قويساق، وندا ايەلدەرىمىزدى دە نەگە قوسا بەرە سالمايمىز؟» دەسە كەرەك ەكى جاقتىڭ اسكەريلەرى باس قوسقان كەڭەستە.
قازىر كۇدىك تاڭىلىپ، قۇلىپ استىنا الىنعان گەنەرالدىڭ ۇستىنەن تەرگەۋ امالدارى ءجۇرىپ جاتىر.
فوتو اشىق دەرەككوزدەن الىندى.
