Ázerbaıjan generalıtetinde eline satqyndyq jasady degen aıyppen iri pogondy tulǵa anyqtaldy. «Otanyn satqan opasyz» atanǵan Ázerbaıjan Qarýly kúshteri Bas shtabynyń bastyǵy, general-polkovnık Nadjmeddın Sadygov bolyp shyqty dep habarlaıdy «Adyrna» ulttyq portaly rast.kz saıtyna silteme jasap. Sonymen general Sadygov qandaı satqyndyq jasaǵan?
Nadjmeddın Sadygov Reseıdiń arnaıy qyzmet organdaryna jaldanǵan degen kúdik bar. Ol Daǵystanda turatyn, Máskeýde gúl bazary bar bıznesmen jıeni arqyly Reseı arnaıy qyzmet organdaryna jaldanǵan bolýy múmkin. sonymen qatar tergeýshilerdiń paıymynsha, Bas shtab bastyǵy Ázerbaıjan armııasyna qatysty eki túrli úlken áskerı qylmys jasaǵan. Onyń birinde Taýly Qarabaq aýmaǵynda jasalǵaly turǵan soǵys qımyldarynyń josparyn túgel Reseı barlaý qyzmetine jetkizip bergeni aıtylsa, ekinshisinde bıylǵy shilde aıynda Armenııa jaqtan atylǵan oqtan qaza tapqan general Polad Gashımovtyń ólimine tikeleı qatysy bar dep kórsetilgen.
Birden aıta keteıik, general-polkovnıkke qatysty alǵashqy kúdik pen daý-janjal osy shilde aıynda-aq kóterilgen bolatyn. Biraq armııa basshylyǵynyń ózi sol kezde ony qorǵap qalǵan. Sol tusta, 2020 jylǵy 22 shilde kúni «1NEWS.az» portalynda osy taqyrypta «Pıat lojnyh obvınenıı, vydvınýtyh protıv generala Sadykova» degen maqala shyǵyp, kúdiktiń bárine toıtarys berilgendeı áńgime qozǵaldy.
«Jurt aýzynda «Sen dosyńnyń kim ekenin aıt, men sosyn saǵan ózińniń kim ekenińdi aıtyp beremin» degen sóz bar. Bul maqal qazir Ázerbaıjanda Qarýly kúshter Bas shtabynyń bastyǵy, general Nadjmeddın Sadygovtyń jeke jáne iskerlik qabiletterin qaralaý maqsatynda júrip jatqan naýqanǵa qoldanýǵa óte jaqsy keledi. Biz sóz basynan barlyq «i»-niń ústine noqat qoıamyz: búgingi kúni Nadjmeddın Sadygov – birinshi kezekte jaýynger general. Osymen bári aıtylyp tur. Núkte!», – dep bastalady atalmysh materıal.
Budan ary «jaýynger generaldyń» osy kezge deıin júrip ótken joldary túgel baıandalyp shyǵyp, joǵaryda atalyp otyrǵan bes (!) aıyptaýdy joqqa shyǵarýǵa áreket jasalady.
«Óıtkeni, qazir joǵary laýazymdy qyzmet atqaryp otyrǵan ol Ázerbaıjan jaýlarynyń báriniń kózderine shyqqan súıel sııaqty. Óıtkeni, onyń ózi men jaýyngerlik erlikterin tek Qarabaq soǵysynyń ardagerleri men Ázerbaıjan armııasynyń jeke quramy ǵana emes, sonymen birge Ázerbaıjanǵa eshqandaı qatysy joq adamdar da biledi. Olaı bolatyny, Sadygovtyń maıor kezinde-aq kórsetken jeke batyldyǵy, sheshimtaldyǵy men prezıdentke berilgendigi jurt aýzynda ańyz bolyp júr», – dep kósiltedi maqala budan keıin.
«Al sol alystaǵy 1979 jyly áli eshkimge esimi belgisiz Nadjmeddın Sadygov óziniń dańqty jolyn KSRO Qarýly kúshteri quramynda vzvod komandıri bolýdan bastap, budan ári rota, batalon komandıri jáne polk komandıriniń orynbasary degen joldardan ótti. Aıta ketý kerek, jas leıtenant Sadygov Baky joǵary jalpy áskerı komandalyq ýchılıesin «altyn medalmen» bitirgen kezde onyń búgingi synshylary áli ómirge de kelgen joq edi!» bolyp óriledi kelesi joldar.
Pa, shirkin sóz bolǵanyńa! Jurtshylyq tarapynan jappaı kúdik tańylǵan qaıratkerdi aqtap alýǵa myna sóılemderdiń qandaı qatysy bar? Áskerı qyzmetin osylaı bastaǵan ofıerlerdiń arasynan satqyn shyqpaıdy dep kim aıtty? Já, olardyń bári de tipti qyzmet jolyn tap osylaı bastamaıtyn ba edi?!Sol sııaqty ony synaýshylardyń bertinde ómirge kelgenin alǵa tartýdyń qanshalyqty qajettiligi boldy?
Munyń báriniń dalbasa ekenin keıingi oqıǵalar tanytty. Tek generalǵa taǵylǵan bes aıyptyń týǵan inisi Armenııa armııasynda qyzmet etedi, sondyqtan sol jaqqa árdaıym habar berip turady degen tarmaq qana anyqtalmaǵan kúıi qalypty.
Eń qyzyqty jaıt, Nadjmeddın Gýseın ogly Sadygov Ázerbaıjannyń týmasy emes eken. Ol 1956 jyly 24 mamyrda Daǵystannyń Derbent qalasynda týǵan. Derbentte ázerbaıjandardyń kóp turatyny belgili, sondyqtan onyń ázerbaıjan ultynan bolýy da ábden kádik. Al Baky áskerı ýchılıesin bitirgennen keıin osy jaqta birjola qalyp qoıǵan. Sóıtip júrgende, táýelsizdik kelgen. Osylaısha ol egemen Ázerbaıjannyń azamatyna aınalǵan.
«Kavkazskıı ýzel» portalynda jazylǵandaı, general-polkovnıktiń tulǵasyna kúdik keltirý 14 shilde kúni general-maıor Polad Gashımov, polkovnık Ilgar Mırzoev, sondaı-aq taǵy eki maıor, eki praporık jáne bir soldat Armenııamen shekarada oqqa ushqan kezde bastalǵan. Biraq armııa basshylyǵynyń aqymaqtyǵy saldarynan ol qyspaqtan qutylyp ketken. Qaıta sodan keıin «halyq qaharmanyna» aınalyp shyǵa kelgen.
Ázerbaıjan armııasynyń joǵarǵy quramynda tyńshy bar ekenin túrik barlaý qyzmeti óz arnalary boıynsha Reseı barlaý qyzmetine shyǵý arqyly anyqtaǵan. Sodan keıin onyń naqty kim ekenin de tekserip bilgen.
Osy jaıt belgili bolǵan boıda Nadjmeddın Sadygov qamaýǵa alyndy. Biraq bul jaıynda eshqandaı habar taratylǵan joq, osyndaı oqıǵa bolǵany jaıly aqpar jaıylyp ketkesin de onyń aty-jóni aıtylmady.
Generaldyń qyzmetten shettetilgeni jónindegi málimet tek 1 qazan kúni shyqty. Onda da resmı derekpen jetkizilgen joq. Muny WarGonzo Telegram-arnasy taratty. Arnanyń jazýynsha, budan bir aı buryn general Túrkııadan kelgen keńesshilermen sózge kelip qalypty. Sol jerde ol Ázerbaıjan bıligine qatysty da birqatar aýyr syndar aıtypty. «Eger biz armııamyzdy túrikterge berip qoısaq, onda áıelderimizdi de nege qosa bere salmaımyz?» dese kerek eki jaqtyń áskerıleri bas qosqan keńeste.
Qazir kúdik tańylyp, qulyp astyna alynǵan generaldyń ústinen tergeý amaldary júrip jatyr.
Foto ashyq derekkózden alyndy.
