شىمكەنت قالاسىندا ءتۋريزمدى دامىتۋ ماقساتىندا وتاندىق باق وكىلدەرى مەن تۋريستىك وپەراتورلارعا ارنالعان ەكى كۇندىك تۋريستتىك-اقپاراتتىق تۋر وتۋدە. شارانى «FlyArystan» اۋە كومپانياسىنىڭ قولداۋىمەن شىمكەنت قالاسىنىڭ تۋريزم باسقارماسى ۇيىمداستىردى.
تۋر بارىسىندا شاھاردىڭ باستى كورنەكتى نىساندارى مەن كيەلى، تاريحي ورىندارىنا، ەسكى قالاشىق پەن ەتنواۋىلعا ەكسكۋرسيا ۇيىمداستىرىلدى. سونىمەن قاتار، ولار گاسترونوميالىق جانە قىش ونەرى بويىنشا ماستەر كلاسقا قاتىستى.
شىمكەنت — تۋريستىك ماڭىزى وتە زور قالا. شاھاردىڭ ينفراقۇرىلىمى دامىعان. ءارى ول — قىرعىزستان مەن وزبەكستاندى قازاقستاننىڭ باسقا وڭىرلەرىمەن بايلانىستىراتىن ءىرى ورتالىق.
قالانىڭ 400 شاقىرىم راديۋسىندا شامامەن 25 ميلليون ادام تۇرادى. وسى ورايدا، شىمكەنت ءوزىنىڭ باسەكەلەستىك ارتىقشىلىقتارىن پايدالانا وتىرىپ، بۇكىل وڭتۇستىك ءوڭىرىنىڭ ءتۋريزمى ءۇشىن تىرەك ورتالىققا اينالا الادى.
بۇگىندە قالالىق تۋريزم باسقارماسى اتالعان سالانى ودان ءارى دامىتۋ ماقساتىندا بىرقاتار تالداۋ جۇمىستارىن جۇرگىزگەن. ءسويتىپ وقيعالى تۋريزم، تاريحي-ءمىناجات ەتۋ ءتۋريزمى، مەديتسينالىق تۋريزم جانە ىسكەرلىك تۋريزم سەكىلدى باسىم باعىتتاردى ايقىندادى.
شىمكەنت قالاسى اكىمىنىڭ ءباسپاسوز قىزمەتى
