قر ءسىم وكىلى پاراعا العان اقشاسىن راحاتىنا جۇمساعان

2170
Adyrna.kz Telegram

قازاقستان سىرتقى ىستەر مينيسترلىگىنىڭ بۇرىنعى جاۋاپتى حاتشىسى اناربەك قاراشەۆتىڭ ءىسى بويىنشا جاڭا دەرەكتەر پايدا بولدى، - دەپ حابارلايدى «ادىرنا» ۇلتتىق پورتالى  inbusiness.kz سايتىنا سىلتەمە جاساپ.

Atameken Business تەلەارناسىنىڭ حابارلاۋىنشا، اناربەك قاراشەۆ شىۇ، ەۋرازەق جانە استانالىق پروتسەسس دەپ اتالاتىن سيريا كەلىسسوزدەرى سياقتى ماڭىزدى حالىقارالىق ءىس- شارالاردى ۇيىمداستىرۋ بويىنشا قىزمەت كورسەتۋ شارتتارىن جاساعانى ءۇشىن پارا العان.

وسى قىزمەتتەردىڭ بارلىعى ءۇشىن ەكس-جاۋاپتى حاتشى 52 ميلليون تەڭگە پارا العان. ونىڭ 7 ميلليون 400 مىڭ تەڭگەسى قاراشەۆ بارعان ساۋنالار مەن مەيرامحانالارعا جۇمسالعان. سونداي-اق، سوت بارلىق ىستە سىرتقى ىستەر مينيسترلىگىنىڭ بۇرىنعى قىزمەتكەرىنە تاعى 4 ادامنىڭ كومەكتەسكەنىن دالەلدەدى. ولار 2 جىلدان 5 جىلعا دەيىن باس بوستاندىعىنان ايىرىلدى. سىرتقى ىستەر مينيسترلىگىنىڭ بۇرىنعى جاۋاپتى حاتشىسى اناربەك قاراشەۆ پەن قازاقستاننىڭ وزبەكستانداعى ەلشىسى ەرىك وتەمباەۆ ەكى جىلعا باس بوستاندىعىنان ايىرىلدى.

ەسكە سالايىق، اناربەك قاراشەۆتىڭ ۇكىمى 2020 جىلدىڭ 21 قىركۇيەگىندە شىققان. باستاپقىدا قاراشەۆتىڭ ارەكەتى ەلشىلىك عيماراتىنىڭ قۇرىلىسىنا بولىنگەن قاراجاتتى جىمقىرۋ رەتىندە قاراستىرىلعان بولاتىن. الايدا كەيىن سوت ولاردىڭ ارەكەتىن بيلىكتى تەرىس پايدالانۋعا جاتقىزدى.

فوتو اشىق دەرەككوزدەن الىندى.

پىكىرلەر