كەشە ءماجىلىس توراعاسى نۇرلان نىعماتۋلين مەديتسينا قىزمەتكەرلەرىنە وتەماقىنى تولىعىمەن جانە ۋاقىتىندا تولەۋ ماڭىزدى ەكەنىن ايتىپ، دەنساۋلىق ساقتاۋ ءمينيسترى الەكسەي تسويدى سىناعان ەدى. باس دارىگەر بۇل سىنعا جاۋاپ بەردى. نازارلارىڭىزعا سىن مەن وعان بەرىلگەن جاۋاپتى ۇسىنامىز.
نۇرلان نىعماتۋلين: دەنساۋلىق ساقتاۋ مينيسترلىگى جاريالاعان اقپارات – سانداردى ساپىرۋ
22 قىركۇيەكتەگى جاعداي بويىنشا كوروناۆيرۋس ىندەتەتىنە شالدىققان دارىگەرلەردىڭ جالپى سانىنىڭ 14%-دان استامىنا عانا، سونىمەن بىرگە قايتىس بولعان مەديتسينا قىزمەتكەرلەرىنىڭ وتباسىلارىنىڭ 13%-عا جەتەر-جەتپەسىنە عانا تولەم جۇرگىزىلگەن.
ىندەتكە شالدىققان مەديتسينا قىزمەتكەرلەرى مەن قايتىس بولعانداردىڭ وتباسىلارىنىڭ تولەماقىسىنا قاتىستى، انىقتاپ ايتقاندا، تولەنبەۋ جاعدايى قۇزىرلى مينيسترلىكتەردىڭ الەۋمەتتىك بولىمدەرى اراسىندا ءوزارا ءىس-قيمىلدىڭ جوقتىعى مەن ويلاستىرىلماعان قادامدارىنىڭ ناتيجەسى. ەندى قازىر پاندەميا كەزىندە مەديتسينا قىزمەتكەرلەرىن قولداۋ تۋرالى پرەزيدەنتتىڭ تاپسىرمالارىن ورىنداۋ ءۇشىن بارلىق جىبەرىلگەن ولقىلىقتاردىڭ ورنىن تولتىرۋ ماڭىزدى.
ەگەر وتكەن 6 اي ىشىندە 2 475 ءوتىنىم بەرىلسە، سوڭعى ساناۋلى كۇندەر ىشىندە 1 589 ءوتىنىم بەرىلگەن. ياعني، بەرىلگەن وتىمدەر سانى 1,6 ەسەگە ارتىپ، ال وتەماقى تولەنگەن ادامدار سانى 2 ەسەگە دەيىن وسكەن. التى اي بويىندا بارلىعى 1 830 دەرتكە شالدىققان دارىگەرلەر وتەماقىعا يە بولسا، ال سوڭعى ءبىراز كۇندە 1665 دارىگەرگە تولەماقى بەرىپ ۇلگەرگەن. قايتىس بولعان مەديتسينا قىزمەتكەرلەرىنىڭ وتباسىلارىنا وتەماقى تولەۋ بويىنشا دا جاعداي وسىنداي.
ءسىز قازىرگى جاعداي تالاپتارىنا مۇلدەم جاۋاپ بەرە المايتىن 2015 جىلعى بۇيرىقتى ويلانباستان كوشىرۋ ارقىلى جاعدايدى قيىنداتىپ وتىرعانىڭىزدى تۇسىنەسىز بە؟ وسىنىڭ سالدارىنان جەرگىلىكتى جەرلەردەگى وڭىرلىك كوميسسيالار ءتيىمدى جۇمىس ىستەي المايدى. ويتكەنى، ولارعا كوپتەگەن قۇجاتتاردى قاراۋ قاجەت. ادامدار اۋىرىپ، ونىڭ ۇستىنە ءالى دە قالپىنا كەلە الماي جاتىپ، 43 قوسىمشالار جيناۋى كەرەك. وسى ءراسىمدى جەڭىلدەتۋگە بولاتىن ەدى عوي. بۇنى ەرتەرەك جاساۋعا نە كەدەرگە بولدى؟ دەمەك، نەمقۇرايلى قاراعانسىزدار.
كوميسسيا قۇرۋ كەزىندە دە نەمقۇرايدىلىق بار. 17 ايماق بويىنشا تەك 5 قانا ايماقتا كوميسسيا قۇرىلعان. ال، تالاپ بويىنشا ءساۋىر، مامىر ايلارىندا تاعى – 4, ماۋسىم ايىندا – 5 كوميسسيا قۇرىلۋ كەرەك بولاتىن.
وسىنداي ماڭىزدى ماسەلەلەردى شەشۋگە تىكەلەي قاتىسى بار – ۆيتسە-پرەمەردەن باستاپ مينيسترلىكتىڭ ءار قىزمەتكەرى – ءاربىر ساننىڭ ارتىندا قيىن جاعدايدا جۇمىس ىستەگەن، ال كەيبىرى جاقىندارىنان ايرىلعان ادامدار تۇرعانىن تۇسىنۋگە ءتيىس. ەندى ولار وزدەرىنە ءتيىستى اقشانى الۋ ءۇشىن تابالدىرىق توزدىرىپ، كوپتەگەن قاعازداردى تولتىرادى. بۇل – ءتىپتى قاراپايىم ادامي كوزقاراسپەن قاراعاننىڭ وزىندە دۇرىس قادام ەمەس.
الەكسەي تسوي: دارىگەرلەرگە تولەم جاساۋعا ءوتىنىش بەرۋ كەزىندە قيىندىقتار بولدى
ەلىمىز بويىنشا 12 830 مەديتسينا قىزمەتكەرى كوروناۆيرۋس پەن پنەۆمانيا ينفەكتسياسىن جۇقتىردى. ايماقتىق كوميسسيالاردا 8333 ءوتىنىش قارالىپ، 5626 ءوتىنىش راستالعان. تولەمدى 3605 قىزمەتكەر الدى. سەبەبى، دارىگەرلەرگە تولەم جاساۋ كەزىندە كوپتەگەن زاڭ بۇزۋشىلىققا جول بەرىلەدى. مىسالى، ايماقتار دەنساۋلىق ساقتاۋ مينيسترلىگىنىڭ بازاسىنا 958 ءوتىنىشتى مۇلدەم ەنگىزبەگەن. 567 ءوتىنىش دەنساۋلىق ساقتاۋ مينيسترلىگىنىڭ اقپاراتتىق جۇيەسىمەن قابىلدانبادى. سونىڭ ىشىندە اتىراۋ وبلىسىنىڭ 188, شىعىس قازاقستاننىڭ 151, الماتىنىڭ 97, قىزىلوردانىڭ 37, نۇر-سۇلتاننىڭ 22 مەديتسينا قىزمەتكەرىنىڭ وتىنىشتەرى كەرى قايتارىلىپ، تولەماقىدان قاعىلدى. تولەماقى الا الماۋدىڭ ەڭ كوپ ايقىندالعانى – ناۋقاستاردىڭ دياگنوزى ەلەكتروندى تىزىمدە تابىلماعان. سونىمەن قاتار وتكىزگەن قۇجاتتارى تولىق بولماعان. 265 ءوتىنىش مەملەكەتتىك ساقتاندىرۋ قورىنان (مسق) باس تارتقانى ءۇشىن قاناعاتتاندىرىلمادى.
مەديتسينا قىزمەتكەرلەرىنىڭ قايتىس بولۋىنا وراي بەرىلەتىن وتەماقى دا وسىنداي جاعدايلارعا بايلانىستى بەرىلمەگەن. وڭىرلىك كوميسسيالار 80 ءوتىنىشتى قاراپ، ونىڭ 55-ءىن ماقۇلداعان. 12 ءوتىنىش دەنساۋلىق ساقتاۋ مەن ەڭبەك مينيسترلىگى دەڭگەيىندەگى مالىمەتتەردىڭ بولماۋىنان قابىلدانبادى.
ءبىز مەملەكەت باسشىسىنىڭ ارىپتەستەرىمىزگە وتەماقى تولەۋ جونىندەگى تاپسىرماسىنىڭ ساپالى ورىندالۋىنا كەدەرگى بولاتىن بىرقاتار ماڭىزدى ماسەلەلەردى انىقتادىق جانە تالقىلادىق. اۋرۋدىڭ ءورشۋى ماۋسىم-شىلدە ايلارىندا بولدى. مەديتسينا قىزمەتكەرلەرىنىڭ 75 پايىزى وسى كەزدە اۋىرىپ قالدى. ادام رەسۋرسىنىڭ جەتىسپەۋشىلىگى (كوپ ادام اۋىرعاسىن - رەد.) ينفەكتسيا جاعدايىن ۋاقىتىلى سارالاۋعا مۇمكىندىك بەرمەدى.
كلينيكالىق حاتتامالاردىڭ ءجيى قايتا قارالۋى مەن (13 رەت قايتا قارالعان) كودتاۋ كەزىندە بىرىڭعاي تاسىلدەر بولعان جوق. مامانداردىڭ جەتىسپەۋشىلىگىنەن، جەكە قۇجاتتار مەن جسن جانە بانك شوتتارىنىڭ دۇرىس بەرىلمەۋى سالدارىنان ءبىراز قيىندىقتار تۋىندادى.
مينيسترلىك جوعارىداعى جاعدايلاردى شەشۋ ءۇشىن ونلاين رەجيمىندە ىستەيتىن جۇمىسشى توبىن قۇردى. تيپتىك قاتەلىكتەردى تالداۋعا ارنالعان كەڭەس وتكىزىپ، اۋرۋلاردىڭ كودتالۋى ءتۇسىندىرىلدى. وسى جۇمىستار قابىلدانعان وتىنىشتەردىڭ سانىن ەكى ەسە ازايتۋعا مۇمكىندىك بەردى.
ايتا كەتەيىك، مەديتسينا قىزمەتكەرلەرىنىڭ ماسەلەسى «Nur Otan» پارتياسىنىڭ ماجىلىستەگى فراكتسياسىنىڭ كەڭەيتىلگەن وتىرىسىندا كوتەرىلدى.
"ادىرنا" ۇلتتىق پورتالى
