بۇل جونىندە شىمكەنت قالاسىنىڭ اكىمى مۇرات ايتەنوۆتىڭ م.اۋەزوۆ اتىنداعى وقۋ ۇجىمىمەن كەزدەسۋى كەزىندە بەلگىلى بولدى.
تەحنيكا عىلىمدارىنىڭ كانديداتى، «اۋىل شارۋاشىلىعى ءوندىرىسىن مەحانيكالاندىرۋ» عىلىمي-زەرتتەۋ زەرتحاناسىنىڭ مەڭگەرۋشىسى بەرديار قالىمبەتوۆ «اقىلدى اۋىل شارۋاشىلىعى» كونتسەپتسياسىن دايىنداپ جاتقانىن، جىل سوڭىنا قاراي قالا باسشىسىنىڭ نازارىنا ۇسىناتىنىن ايتتى.
«ءسىزدىڭ تاپسىرماڭىزبەن قالا ماڭىندا «اقىلدى اۋىل شارۋاشىلىعى» دەپ اتالاتىن مەكەمە قۇرۋدى ۇسىنامىن. ول ءبىزدىڭ ۋنيۆەرسيتەتتىڭ عالىمدارى جاساپ شىعارعان ەڭ جاڭا تەحنولوگيالار مەن تسيفرلى ماشينالاردىڭ بارلىق مۇمكىندىكتەرىن بىرىكتىرۋى ءتيىس. ونىڭ قۇرامىندا «اقىلدى دالا»، «اقىلدى فەرما»، «اقىلدى جىلىجاي» جانە «اقىلدى باۋ» دەگەن بولىمشەلەر بولادى. بۇنىڭ ءاربىرى جەكە-جەكە جوبا. ءبىز بارلىق 5 باعىت بويىنشا جۇمىس ىستەگىمىز كەلەدى. جىل سوڭىندا وسى كونتسەپتسيانى سىزگە ۇسىنساق، كورىپ، بەكىتىپ بەرۋىڭىزدى جانە قولداۋ كورسەتۋىڭىزدى سۇرايمىز»، - دەدى ول.
ءوز كەزەگىندە قالا اكىمى بۇل جوبالارعا كاسىپكەرلەردى تارتۋ قاجەتتىگىن جەتكىزدى. ياعني، عىلىمي جاڭالىقتارعا بيزنەس قاۋىمداستىقتىڭ نازارىن اۋدارىپ، بىرىككەن ينۆەستيتسيالىق جوبالاردى جۇزەگە اسىرۋ كەرەكتىگىن ايتتى.
«قالاعا وتە قاجەتتى، ماڭىزدى جۇمىستى باستاپ كەتىپسىزدەر. ءبىز قولدايمىز. الداعى ۋاقىتتا تاعى دا كەزدەسىپ، اقىلداسۋ قاجەت»،- دەدى قالا اكىمى.
سونداي-اق، بەرديار ەسباتىرۇلىنىڭ ايتۋىنشا، ءبىزدىڭ وڭىردە ءبىر جىلدىڭ 210 كۇنى جىلى، شۋاقتى بولىپ تۇرادى. سونى ءتيىمدى پايدالانىپ، كوكونىس شارۋاشىلىعىندا 1 جىلدا 3 رەت ءونىم جيناۋعا بولادى ەكەن. عالىمدار ونىڭ دا ارنايى تەحنولوگياسىن جاساپ شىعىپتى.
ايتا كەتەيىك، بەرديار قالىمبەتوۆ جاڭا، جەتىلگەن تەحنيكا مەن تەحنولوگيالاردى جاساۋعا قوماقتى ۇلەس قوسقان جانە «قازاقستان رەسپۋبليكاسى عىلىمىنىڭ دامۋىنا سىڭىرگەن ەڭبەگى ءۇشىن» مەدالىمەن ماراپاتتالعان. ول 7 عىلىمي جوبا مەن باعدارلامانىڭ جەتەكشىسى بولعان. بۇگىندە ونىڭ تورتەۋى اياقتالىپ، ناتيجەسى وندىرىسكە ەنگىزىلگەن.
شىمكەنت قالاسى اكىمىنىڭ ءباسپاسوز قىزمەتى
