بۇگىن شىمكەنت قالاسىنىڭ اكىمى مۇرات ايتەنوۆ الداعى جىلىتۋ ماۋسىمىنا دايىندىق بارىسىمەن تانىستى.
قالادا 1 896 كوپ قاباتتى ءۇي بار. سونىڭ 90 پروتسەنتتەن استامى جىلىتۋ ماۋسىمىنا دايىن. قالعان تۇرعىن ۇيلەردە قۇرىلىس-مونتاج جۇمىستارى جۇرۋدە.
قالا اكىمى، الدىمەن، اكىمشىلىك-ىسكەرلىك ورتالىقتاعى جىلۋ قازاندىعىنا باردى. 2015 جىلى ىسكە قوسىلعان قازاندىق 1124 شارشى مەتر اۋماقتى الىپ جاتىر. وندا مول جىلۋ بەرە الاتىن BOSCH LOOS UT-HZ پەشتەرى ورناتىلعان. مۇنداعى وتىننىڭ نەگىزگى ءتۇرى — تابيعي گاز. قازاندىقتىڭ ەڭ جوعارعى قۋاتتىلىعى — ساعاتىنا 163.5 گكال. ول كوپقاباتتى 78 تۇرعىن ءۇي مەن 8 اكىمشىلىك عيماراتقا جىلۋ بەرەدى.
مۇنان كەيىن قالا اكىمى شاھاردىڭ وڭتۇستىك بولىگىنە جىلۋ بەرەتىن «3-ەنەرگوورتالىق» اكتسيونەرلىك قوعامىنا قاراستى قازاندىققا ات باسىن تىرەدى. بۇل كومپانيانىڭ يەلىگىندە 11,7 شاقىرىم ماگيسترالدى جىلۋ قۇبىرلارى بار. قازىر قازاندىقتا قۇرىلىس-مونتاج جۇمىستارى جۇرگىزىلىپ جاتىر. جىلىتۋ ماۋسىمىنا دايىندىق 1 قازانعا دەيىن تولىقتاي اياقتالادى.
سونداي-اق، قالا اكىمى سايرام تۇرعىن الابىندا ورنالاسقان حالىقتى كومىرمەن قاماتاماسىز ەتەتىن بازانىڭ جۇمىسىمەن دە تانىستى.
جالپى، قالاعا جىلۋ 11 قازاندىق پەن 1 جىلۋ-ەلەكترستانتسياسىنان بەرىلەدى. ايتا كەتۋ كەرەك، قازىر بارلىق 11 قازاندىق جوندەۋدەن ءوتىپ، الداعى قىسقا تاس-ءتۇيىن دايىن تۇر. ال، 17 سورعى ستانتسياسىنىڭ 15-ءى (88%) دايىن. قالعان 2 ستانتسيادا جۇمىس 25 قىركۇيەككە دەيىن اياقتالادى.
نىسانداردىڭ جۇمىسىمەن تانىسقان مۇرات دۇيسەنبەكۇلى جاۋاپتى ازاماتتارعا بەلگىلەنگەن مەرزىمدە تۇرعىنداردى ساپالى جىلۋ ەنەرگياسىمەن قامتاماسىز ەتۋدى تاپسىردى.
قالادا 479 بيۋدجەتتىك مەكەمە جۇمىس ىستەپ تۇر. ونىڭ 271-ءى جەكە قازاندىقتارمەن جىلىتىلسا، 208-ءى ورتالىقتاندىرىلعان جىلۋ جۇيەسىنە قوسىلعان.
شىمكەنت قالاسى اكىمىنىڭ ءباسپاسوز قىزمەتى
