توڭازىتقىشتاعى بالا ءولىمى: كۋاگەر ءتىرى نارەستەنى ءوز كوزىمەن كورگەنىن ايتتى

2110
Adyrna.kz Telegram

اتىراۋدا توڭازىتقىشقا ءتىرى بالانى سالۋ ءىسى بويىنشا سوت پروتسەسىندە پەريناتالدىق ورتالىقتىڭ ءتورتىنشى جانە بەسىنشى قاباتىنىڭ دالىزىندە ورناتىلعان باقىلاۋ كامەرالارىنىڭ بەينەجازبالارى زەرتتەلىپ جاتىر

كەزەكتى وتىرىستا 2019 جىلى 29 قىركۇيەكتە تۇسكى ساعات ءبىر مەن كەشكى ون اراسىنداعى ۆيدەو قارالدى. مۇنىڭ الدىندا ايىپتالۋشىلاردىڭ ادۆوكاتى ۆيدەونىڭ ۋاقىتى وزگەرتىلگەن بولۋى مۇمكىن ەكەنىن بىرنەشە رەت مالىمدەگەن ەدى، دەپ جازدى وڭىرلىك اق جايىق باسىلىمى.

بۇعان دەيىن كۋاگەر رەتىندە جاۋاپ بەرگەن پەريناتالدىق ورتالىقتىڭ سانيتارى سۆەتلانا كوزلوۆا سوتقا قايتا شاقىرتىلدى. ادۆوكاتتاردىڭ ايتۋىنشا، ونىڭ بۇعان دەيىن بەرگەن جاۋابىندا قايشىلىقتار بار. سوندىقتان ورديناتور بولمەسى، بوسانۋ زالى، اكۋشەرلىك قۇرالدار وڭدەلەتىن بولمە جانە اس ءۇي ورنالاسقان 5-قاباتتاعى بەينەجازبانى قاراۋ بارىسىندا قايتادان جاۋاپ الۋ كەرەك دەپ ساناعان.

سول كۇنى كوزلوۆا اس ۇيدە جۇمىس ىستەيدى. ونىڭ ايتۋىنشا، كەشكى ساعات 18.30-دا اكۋشەر ءجاميلا قۇلباتىروۆا اس ۇيگە كىرىپ، اكۋشەرلىك قۇرالدار وڭدەلەتىن بولمەدەگى جاڭا تۋعان نارەستەگە قاراۋدى سۇراعان. قۇلباتىروۆا شاقالاقتى №1 بوسانۋ پالاتاسىنان وسى جەرگە الىپ كەلىپتى. بولمەگە ەكەۋى بىرگە كىرگەن كەزدە كوزلوۆا ءتىرى بالانى كورەدى.

"بالاعا قارادىم دا، ونىڭ ءتىرى ەكەنىن ايتتىم. نەگە ونى جانساقتاۋ بولىمىنە اپارماعانىن سۇرادىم", - دەيدى كوزلوۆا.
ونىڭ ايتۋىنشا، بالا ەسىك جاققا قاراپ جاتقان، ەرنى مەن قول-اياعى قيمىلدايدى.

ۆيدەودان بولمەدە اكۋشەر ەلۆيرا ناسيحاتوۆانىڭ دا بولعانى كورىنەدى. كوزلوۆا وعان نازار اۋدارماعانىن، ەكى كوزى بالادا بولعانىن ايتتى. ونىڭ سوزىنشە، ناسيحاتوۆا كابينەتتە قۇرالداردى تازالاپ تۇرعان.

سوت بارىسىندا قۇلباتىروۆا كوزلوۆادان "ساعان بالانىڭ ءتىرى ەكەنىن ايتتىم با؟" دەپ سۇرادى.

ء"جاميلا اپا، ءسىز اس بولمەگە كەلىپ، نارەستەنى مايىتحاناعا جىبەرە المايتىنىڭىزدى ايتتىڭىز. "بالا ءتىرى مە ەكەن، قاراشى" دەدىڭىز. مەن سول جەرگە بارىپ، بالانىڭ ءتىرى ەكەنىن كوردىم، نەگە رەانيماتسياعا جىبەرىلمەگەنىن سۇرادىم. ءسىز بالانىڭ جۇرەگى توقتاپ قالعانىن، بىراق ميى ءالى جۇمىس ىستەپ تۇرعانىن ايتتىڭىز. مەن ۇندەگەن جوقپىن. ءسىز بولمەدەن اسقار جانىبەكۇلىن (اسقار قايىرجان - سوتتالۋشى، اكۋشەر-گينەكولوگ) الىپ كەلۋ ءۇشىن شىعىپ كەتتىڭىز. بالانىڭ جايالىعىن ۇستاپ كورىپ ەدىم، ول جيىرىلدى. شامامەن ون مينۋتتان كەيىن اسقار جانىبەكۇلى كەلدى. ونىڭ ارتىندا تۇرىپ، بالانىڭ ءتىرى ەكەنىن ايتتىم. اسقار جانىبەكۇلى ەسىكتى جاپ دەدى، مەن جاپتىم. ءسىز ءوزىڭىز دە بالانىڭ ءتىرى ەكەنىن كوردىڭىز عوي", - دەپ جاۋاپ بەردى كوزلوۆا.

ال اكۋشەر قۇلباتىروۆا مۇنداي اڭگىمە بولماعانىن، بالانىڭ قيمىلسىز جاتقانىن ايتتى.

پىكىرلەر