وڭىردە قۇس تۇماۋى سوڭعى رەت 8 اۋىلدان انىقتالعان. ەندى ول ەلدى مەكەندەردە كارانتين جاريالانىپ، قۇس ونىمدەرىن ساتۋعا تىيىم سالىندى.
«قۇستىڭ ءولىمى الدىمەن 6 اۋداندا تىركەلسە، كەيىن تاعى 5 اۋداندا پايدا بولدى. سونىمەن، قازىر بىزدەگى 11 اۋداندا قۇستىڭ ءولىمى تىركەلىپ وتىر. البەتتە، بۇل تىركەلگەن اۋداندارداعى قۇستىڭ ءولىمى مەن پاتالوگيالىق ماتەريالدارى زەرتحاناعا جىبەرىلدى»، - دەيدى وبلىستىق ۆەتەريناريا باسقارماسى باسشىسىنىڭ ورىنباسارى تالعات ءجۇنىسوۆ.
ەندى قۇس تۇماۋىن تاراتپاۋ ءۇشىن وبلىسقا 510 مىڭ ۆاكتسينا جەتكىزىلگەن. ەكپە ەگۋ جۇمىسى 10 كۇندە اياقتالادى دەسەدى ماماندار. ال اۋرۋ شىققان اۋىلداردا ۆاكتسينا سالىنبايدى. ولارعا نۇر-سۇلتان قالاسىنان ارنايى توپ بارىپ، الدىمەن زالالسىزداندىرۋ جۇمىستارىن جۇرگىزەدى، سودان كەيىن ءتىرى قالعان قۇستاردى دا تۇگەل ورتەپ جىبەرەدى.
