الەمنىڭ كوپ ەلىندە كوروناۆيرۋس كۇش الىپ، دابىل قاعىلا باستادى. اسىرەسە ىندەت ەۋروپا ەلدەرىندە ءورشي تۇسكەن. الداعى اپتالاردا مادريد قالاسى قيىن كەزەڭدى باستان وتكەرۋى مۇمكىن. دەنساۋلىق ساقتاۋ ءمينيسترى سالۆادور يللا وسىلاي دەپ مالىمدەدى، دەپ حابارلايدى "ادىرنا" ۇلتتىق پورتالى 24.kz. اگەنتتىگىنە سىلتەمە جاساپ.
ەلدە ۆيرۋستى جۇقتىرعاندار سانى 700 مىڭنان اسقان. ناۋقاستاردىڭ باسىم بولىگى مادريد قالاسىندا تىركەلۋدە. دەرتتەن كوز جۇمعاندار سانى مامىرداعى كورسەتكىشكە جەتكەن. وتكەن اپتادا قالانىڭ كەي اۋدانىندا شەكتەۋلەر ەنگىزىلگەن. بىراق كەي تۇرعىندار جەرگىلىكتى بيلىكتىڭ بۇل ارەكەتىنە نارازى.
پولونيا گارسيا، جەرگىلىكتى تۇرعىن: - قالاداعى كەي اۋدانداردا ىندەتتىڭ تارالۋى ارتسا ول ادامداردىڭ ەمەس بيلىكتىڭ سالعىرتتىعى. ۇكىمەت ۆيرۋس بارىسىن باقىلاۋدا ۇستاۋى كەرەك ەدى عوي. مىسالى، قوعامدىق كولىكتەر مەن وزگە دە ورىنداردا سانيتارلىق تالاپتار جەتكىلىكتى دارەجەدە قولعا الىنعان جوق.
رەسەي استاناسىندا دا جاعداي ناشارلاعان. سوڭعى اپتادا اۋرۋحاناعا كوروناۆيرۋسپەن تۇسكەن ناۋقاستاردىڭ سانى 30 پايىزعا وسكەن. قالا مەرى سەرگەي سوبيانين وتە الاڭداتارلىق جاعداي قالىپتاسقانىن مالىمدەپ، 5 مىڭنان استام كومپانيانى قاشىقتان جۇمىس ىستەۋگە كوشۋگە شاقىردى.
سەرگەي سوبيانين، ماسكەۋ مەرى: - بىزدە قازىر دەرتتى جۇقتىرعاندار سانى ءوسىپ كەلەدى. بۇل ءبىر جاعىنان دەرتكە قارسى تەستتى كوپتەپ جۇرگىزۋگە بايلانىستى بولىپ وتىر. ەكىنشى جاعىنانان تۇماۋ جانە وزگە دە تىنىس الۋ ينفەكتسيالارىمەن بايلانىستى. سوڭعى اپتادا مۇنداي اۋرۋعا شالدىققانداردىڭ سانى 3 ەسە ارتقان.
ال ۋكراينادا ىندەتتىڭ ەكىنشى تولقىنى باستالعان سياقتى. بۇل تۋرالى وسى ەلدىڭ پرەزيدەنتى ۆلاديمير زەلەنسكي مالىمدەدى. سوڭعى ۋاقىتتا ەلدە كۇن سايىن 3 مىڭنان استام دەرتتى جۇقتىرۋ دەرەگى تىركەلۋدە. ناۋقاستاردىڭ جالپى سانى 190 مىڭنان اسقان. ىندەتتىڭ تارالۋىنا توسقاۋىل قويۋ ءۇشىن شەتەلدىكتەردىڭ ەلگە كىرۋى شەكتەلگەن.
ۆلاديمير زەلەنسكي، ۋكراينا پرەزيدەنتى: - سوڭعى ۋاقىتتا كۇن سايىن 3 مىڭ ادام دەرتتى جۇقتىرىپ الىپ جاتىر. ىندەتتىڭ ەكىنشى تولقىنى وسى شىعار. سوندىقتان جەرگىلىكتى تۇرعىندار مەن وزگە ەلدەردىڭ ازاماتتارىنىڭ ومىرىنە قاۋىپ توندىرمەس ءۇشىن شەكارانى جاپتىق. جاعداي تۇراقتالعان سوڭ قايتا اشىلادى.
ال ەۋرووداق باسشىلىعى ىندەتتىڭ كۇشەيۋىنە بايلانىستى شۇعىل شارالارعا دايىن بولۋعا شاقىردى. ايتپەسە كوكتەمدەگى جاعداي قايتالانادى دەپ وتىر. سوڭعى مالىمەتكە قاراعاندا ۇلىبريتانيا مەن فرانتسيادا ۆيرۋستى جۇقتىرعاندار سانى كۇرت وسكەن.
ستەللا كيرياكيديس، ەۋرووداقتىڭ دەنساۋلىق ساقتاۋ سالاسى بويىنشا كوميسسارى: - ىندەتتىڭ كۇشەيۋىنە بايلانىستى ادامدار بەتپەردە تاعىپ، الەۋمەتتىك قاشىقتىقتى ساقتاۋى ءتيىس. ال ەگەر اۋرۋدىڭ العاشقى نىشاندارى بايقالسا ۇيدە وقشاۋلانىپ ەم دوم قابىلداعان ءجون. قازىر كوكتەمدەگى جاعدايدى بولدىرماۋعا بار كۇشىمىزدى سالۋىمىز قاجەت.
