بىرىككەن ۇلتتار ۇيىمىنىڭ شتاب-پاتەرىندە قازاقستاننىڭ بۇۇ جانىنداعى تۇراقتى وكىلى قايرات وماروۆ ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتاماعا قول قويدى دەپ حابارلايدى «ادىرنا» ۇلتتىق پورتالى قر سىرتقى ىستەر مينيسترلىگىنە سىلتەمە جاساپ.
سول كۇنى ءولىم جازاسىن جويۋ تۋرالى حالىقارالىق حاتتاماعا قوسىلۋ تۋرالى شەشىمدى قازاقستان پرەزيدەنتى قاسىم-جومارت توقاەۆ بۇۇ باس اسسامبلەياسىنىڭ 75-ءشى مەرەيتويلىق سەسسياسىنىڭ جالپى ساياسي پىكىرتالاس باراسىندا سويلەگەن سوزىندە جاريالادى. ول قازاقستان ءومىر ءسۇرۋ مەن ادامي قادىر-قاسيەتكە نەگىزدەلگەن قۇقىقتى جۇزەگە اسىرۋعا بەكەم ەكەنىن اتاپ ءوتتى.
2019 جىلدىڭ جەلتوقسانىندا قازاقستان پرەزيدەنتى ەلدەگى ساياسي رەفورمالاردى جۇزەگە اسىرۋ اياسىندا سىرتقى ىستەر مينيسترلىگىنە ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قوسىلۋ ءراسىمىن باستاۋدى تاپسىردى.
بۇل حالىقارالىق قۇجاتقا قول قويۋ ءولىم جازاسىن قولدانۋ اياسىن بىرتىندەپ تارىلتۋ جانە قىلمىستىق زاڭنامانى ىزگىلەندىرۋ باعىتىنىڭ جالعاسى بولىپ تابىلادى. قازاقستان رەسپۋبليكاسىندا ءولىم جازاسىن قولدانۋ قر پرەزيدەنتىنىڭ 2003 جىلى ءتيىستى موراتوري ەنگىزۋ تۋرالى جارلىعىمەن تولىعىمەن توقتاتىلدى.
«ادىرنا» ۇلتتىق پورتالى
