شىمكەنت قالاسىندا سالالاردى تسيفرلاندىرۋ مەن مەملەكەتتىك قىزمەتتەردى ەلەكتروندى فورماتقا كوشىرۋ باعىتىندا بىرقاتار اۋقىمدى جۇمىستار جاسالىنۋدا.
اتاپ ايتقاندا، بيىل سەگىز اي ىشىندە شىمكەنت قالاسى اكىمدىگى 2, 5 ميلليون قىزمەتتىڭ 2 ميلليون 200 مىڭى نەمەسە 86,1 پروتسەنتىن ەلەكتروندى تۇردە كورسەتكەن. ياعني بىلتىرعى جىلمەن سالىستىرعاندا مەملەكەتتىك قىزمەتتى ەلەكتروندى تۇردە العان ازاماتتاردىڭ سانى 700 مىڭعا وسكەن.
بۇل جونىندە بۇگىن شىمكەنت قالاسىنىڭ اكىمى مۇرات ايتەنوۆ "شىمكەنت - ادالدىق الاڭى" جوباسى ANTIKOR LIVE تىكەلەي ەفيرىندە ايتتى.
- قالا اكىمدىگى بىلتىر 181 قىزمەت ءتۇرىن كورسەتسە، بيىل تۇرعىندارعا ىڭعايلى بولۋى ءۇشىن كەيبىر قىزمەت تۇرلەرى وڭتايلاندىرىلىپ، ولاردىڭ سانى 160 بولىپ بەكىتىلدى. 2019 جىلى 181 قىزمەتتىڭ 91-ءى، ياعني 50 پروتسەنتى ەلەكتروندى فورماتتا كورسەتىلسە، وسى جىلى 160 قىزمەتتىڭ 132-ءسى (83%) ەلەكتروندى تۇردە كورسەتىلەدى. بۇل وتكەن جىلمەن سالىستىرعاندا قىزمەتتەردى ەلەكتروندى تۇردە كورسەتۋ 33 پايىزعا وسكەنىن بىلدىرەدى، - دەدى شاھار باسشىسى.
سونداي-اق، اكىم جىلدىڭ سوڭىنا دەيىن قالعان 28 مەملەكەتتىك قىزمەت ءتۇرىن ەلەكتروندى فورماتقا اۋىستىرۋدى جوسپارلاپ وتىرعانىن ايتتى.
شىمكەنت قالاسى اكىمىنىڭ ءباسپاسوز قىزمەتى
