شىمكەنت قالاسىنداعى بارلىق مەديتسينالىق ۇيىمدار كوروناۆيرۋستىق ينفەكتسيامەن كۇرەسكە قارسى بارلىق ءتيىستى شارالاردى جۇرگىزۋدە. مامانداردىڭ بولجاۋى بويىنشا ىندەتتىڭ ەكىنشى تولقىنى بولۋى ىقتيمال. سوندىقتان دا وسى دەرتكە مەديتسينا ماماندارى توتەپ بەرە ءبىلۋى كەرەك.
وسى ماقساتتا قالادا ينفەكتسيالىق جانە پروۆيزورلىق ستاتسيونارلارمەن قاتار مەنشىك نىسانىنا قاراماستان بارلىق بسمك (باستاپقى مەديتسينالىق سانيتارلىق كومەك) اراسىندا بۇگىن وقۋ-جاتتىعۋ شارالارى باستالدى.
وقۋ-جاتتىعۋ شاراسى اياسىندا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان «112» قۇتقارۋ قىزمەتىنىڭ جۇمىسىمەن تانىسىپ، ماماندارعا تابىس تىلەدى.
وقۋ-جاتتىعۋ بارىسىندا ناۋقاس شاقىرتۋىنىڭ «103» پۋلتىنە تۇسكەن ساتىنەن باستاپ، ءتيىستى بەلگىلەرى بولعان جاعدايدا ستاتسيورنارعا جاتقىزۋعا دەيىنگى باعىتىنىڭ باستان-اياق الگوريتىمىنە باسا نازار اۋدارىلدى. وقۋ-جاتتىعۋ كەزىندە جەدەل مەديتسينالىق كومەك شاقىرتۋىنىڭ 4 ساناتى بويىنشا مەديتسينالىق پەرسونالدىڭ ءىس-قيمىل الگوريتمدەرى پىسىقتالادى.
سونداي-اق، مەديتسينالىق پەرسونالعا شارتتى ناۋقاستاردىڭ جاي-كۇيىنىڭ اۋىرلىعىن انىقتاۋ، كوروناۆيرۋستىق ينفەكتسيا كەزىندە ساقتانۋ شارالارى بويىنشا باعالاۋ جۇرگىزىلىپ، مەديتسينالىق پەرسونالدى قورعاۋدىڭ بارلىق شارالارىن ساقتاي وتىرىپ، پروۆيزورلىق ستاتسيونارعا تاسىمالدانۋ جولدارى نازارعا الىنباق.
سونىمەن قاتار، وقۋ-جاتتىعۋ بارىسىندا ەمحانالاردىڭ ءموبيلدى بريگادالارىنىڭ ءىس-ارەكەتتەرى جانە قاجەت بولعان جاعدايدا پاتسيەنتتى كومپيۋتەرلىك توموگرافيانى تەكسەرۋگە جىبەرۋ، پتر تالداۋدى الۋ بويىنشا دايىندىق جۇمىستارى جۇرگىزىلەدى.
ايتا كەتەيىك، وقۋ-جاتتىعۋ جۇمىستارىنا 36 بمسك ۇيىمى، 9 دياگنوستيكالىق ورتالىق، 7 پتر زەرتحاناسى جۇمىلدىرىلادى.
شىمكەنت اقپاراتتىق-كوممۋنيكاتسيالىق ورتالىعى
