ءبىر كۇنى سەنىڭ تەرەزەڭنەن مۇلدە جاڭا كۇن سىعالايدى. بۇرىن مۇنداي كۇن كورمەگەنسىڭ. سەبەبى، سەن جالپى تۇك كورمەي جۇرە بەرىپسىڭ – كۇيبەڭ تىرلىكتەن قول تيمەگەن. سوسىن ءبىر نارسە كىلت سىنادى.
قولىڭنان كەلگەنى وقۋدا وزات بولۋ، بىرەۋگە ۇيلەنۋ، ءبىر نارسەمەن اينالىسۋ، ءۇي الۋ، كولىك ءمىنۋ، تەڭىزگە بارىپ سۋرەتكە ءتۇسۋ. كوشتەن قالمادىڭ. اشتان ولمەدىڭ. ەلدىڭ ساعان تاعار ءمىنى جوق. ءبارى ويداعىداي. بىراق سونىڭ بارىنەن جان دۇنيەڭدە ۇيلەسىم ءتۇزىلدى مە؟ وسى ومىرىڭە ءدان ريزامىسىڭ؟
مەنىڭ پاتسيەنتتەرىمنىڭ دەنى باقىتتى ءومىر سۇرۋگە ءتورت قۇبىلاسى تۇگەل. الايدا، نەۆروز، كۇيزەلىس، تاۋەلدىلىك، پسيحوسوماتيكالىق داعدارىس، ەموتسيونالدى جانە دەننىڭ ساۋلىعى نەدەن ءبۇلىندى؟
تاجىريبەگە سۇيەنسەم، بار قيىندىق جالپى قوعام بەكىتكەن اۆتوپيلوتتاعى جوسپار-ماكسيمۋمدى ورىنداۋعا سەندىك رەسۋرس، قاجەتتىلىك، نيەت-تىلەك قانشالىقتى ەكەنىن دۇرىس باعامداماي، سوقىر سەنىمگە ەرىپ كەتۋگە تىرەلەدى. بولۋ كەرەك پە، بولادى.
شىنىمەن كەرەك پە ەدى؟ كەرەگى ءدال وسى ما؟ ءدال قازىر كەرەك پە؟ ءدال وسى اداممەن ءبىر بولۋ ماڭىزدى ما؟ وسى تىلەكتىڭ ءبارى وزىڭدىكى مە؟ ءار قادامىڭدى ساناپ باستىڭ با؟ بۇكىل شەشىمدى ءوزىڭ قابىلدادىڭ با؟ ءومىرىڭنىڭ ءون بويىنان سەنىڭ قۇندىلىقتارىڭ مەنمۇندالايتىنى راس پا؟ ءار قادامىڭا جاۋاپ بەرە الاسىڭ با؟ قازىر نە قالايسىڭ؟ كەشەدەن بەرگى قولداعى بار بۇكىل دۇنيەڭدى تولىقتاي ءوزىڭ تاڭداپ الدىڭ با؟ ساتسىزدىگىڭدى كىمنەن كورەسىڭ؟ كۇتىپ ءجۇرسىڭ بە، ءوتىپ كەتسىن دەپ تىعىلىپ وتىرسىڭ با، الدە ءومىر ءسۇرىپ جاتسىڭ با؟ سەندىك ءومىر سەنىڭ كوڭىلىڭنەن شىعا ما؟
وسى سۇراقتارعا شىن جاۋاپ ايتا الساڭ، تەرەزەدەن باسقا كۇن قارايتىن بولادى. اۆتوپيلوت ءومىردى كەرى ىسىراسىڭ. بالاما وي ۇدەرىستەرىن قوساسىڭ. شىنداپ ويلانساڭ، ماڭىزدى دەگەن تالاي دۇنيەڭ ۋىستان سۋسىپ كەتەتىنىن كورەسىڭ.
بىرەۋدە – شىنداپ رەۆوليۋتسيا باستالادى.
بىرەۋدە – باياۋ، بىراق ءوزىن تانۋ ساباعى جۇزەگە اسا باستايدى.
بىرەۋدە – بولماشى شتريح كۇللى پاليترانى وزگەرتىپ جىبەرەدى.
ارينە، بۇل، داعدارىس...
ارينە، بۇل، جان اۋىرتپاي وتە سالماس...
ارينە، بۇل، ۇلكەن جۇمىس...
بىراق، بۇل - تاماشا جۇمىس. ءوز ءومىرىڭنىڭ شەگىنە شىعۋ. سەن قالامايتىن، كورگىڭ كەلمەيتىن، سەزىنگىڭ كەلمەيتىننىڭ بىردە ءبىرى جوق ەكەنىن انىق ءبىلۋ.
اڭساپ، ساعىنعان ەرەك ادامدى عانا قۇشاسىڭ. جانىڭ قالاعان عاجاپ ىسپەن شۇعىلداناسىڭ. شارشايسىڭ. بىراق بۇل شارشاۋدىڭ ءجونى بولەك. راحاتتانىپ شارشايسىڭ. قاتەلەسەسىڭ. بىراق تۇزەيسىڭ. قۇلايسىڭ. بىراق قايتىپ تۇراسىڭ. سەزىمنىڭ مىڭ بوياۋلى الەمىنە سۇڭگيسىڭ. جالتاقتامايسىڭ. ءبىر جاسۋشالى، جۇرت وتىرىك ماقتايتىن جاساندى پوزيتيۆتەن ارىلاسىڭ.
سۇيەسىڭ. اقىرىندا جانىڭ مەن ءتانىڭ بۇتىندەي سايكەسەتىن سەرىگىڭدى تاباسىڭ. ءوزىڭدى دەنى ساۋ ماحابباتپەن جاقسى كورەسىڭ. سەندىك سەنىممەن ەشكىمگە دجيگا بيلەۋگە رۇقسات ەتپەيسىڭ. ءتۇرلى مانيپۋلياتورلاردىڭ ەسەبىن ويران ەتەسىڭ.
ءوز قولىڭمەن جاساعاننىڭ ءبارىن جاقسى كورەسىڭ. ءومىرىڭدى سۇيەسىڭ. ءوزىڭنىڭ جاپ-جاڭا كۇنىڭدى جاقسى كورەسىڭ. جاقسى اۋا رايىنىڭ بەلگىسى دەپ ەمەس، تۋعالى بەرى جينالىپ قالعان ىرىم-تىيىمنان ارىلتقان ەركىندىگىڭ ءۇشىن جاقسى كورەسىڭ. بۇل مۇلدە جاڭا كۇن.
شاماڭ جەتكەن جەرگە دەيىن ەركىن بول!
ليليا گراد
اۋدارعان شىنار ءابىلدا
"ادىرنا" ۇلتتىق پورتالى
