ءۇش نارسەنىڭ ماڭىزى جوق: جاستىڭ، بەت-الپەتتىڭ، مىنەزدىڭ. ادامنىڭ تارتىمدىلىعى وعان تاۋەلدى ەمەس.
قىزدىڭ جاسى 20 بولعاندا وعان ءبارىبىر. ول وزىنە ۇنايدى. ەشكىمنەن قورىقپايدى. ۇناعان جىگىتپەن قول ۇستاسادى. ۇناماعاننىڭ كەۋدەسىنەن كەرى يتەرەدى. ماسەلە، 15 جىلدان كەيىنگى جاعدايى نەشىك؟ سوعان تىرەلىپ تۇر. ول ادام تانىماستاي وزگەرەدى. ءوز-وزىنە ۇنامايدى. كەيپى ادام شوشىرلىق. كوسمەتيكالىق سالوندارعا بارعىشتايدى. پلاستيكالىق حيرۋرگتاردىڭ الدىن بوساتپايدى. ءبارىنىڭ سەبەبى – جاستىق شاعىن ساقتاپ قالۋ دەگەن پاتولوگيالىق تىلەك. ەلگە ۇناسام دەيدى.
35+ جاستاعى ايەل زاتىنىڭ ءجۇرىسى وزگەرەدى. بۇكىرەيىپ، اياعىن ىشكە باسادى. سەنىمسىزدىگى بايقالادى. بۇرىنعىدان ەكى ەسە كوپ بويانادى. كوسمەتيكانى توننالاپ قولدانادى. سەبەبى، ءوز بەت-جۇزىنەن ۇيالادى. وسىمەن تىيىلسا جاقسى. كەيبىرى جەڭىل كوسمەتيكالىق پروتسەدۋرادان كۇردەلىسىنە اۋىسادى. اقىرى وتامەن اياقتالادى. شىن مانىندە بۇل وتە قيىن پاتولوگيا. ءوز ءتانىڭدى زورلاۋ. مەديتسينالىق تاعايىنداۋلارسىز ءوزىڭدى كەسكىلەۋگە رۇقسات ەتۋ. ادام دەنساۋلىعىن ساقتاۋ ءۇشىن جاسالاتىن وتانىڭ ءجونى بولەك. ال، سۇلۋلىق ءۇشىن ءوزىڭدى اياماۋ دەگەن پاتولوگيا. الايدا وسى جاستىق شاعىمدى ساقتاپ قالسام دەگەن تىلەك ءبارىبىر ورىندالمايدى.
نەگە ەكەنىن بىلەسىز بە؟
ايەلدىڭ ساناسىندا 20 جاستا مەنى ءبارى جاقسى كورەدى دەگەن ستەرەوتيپ وتىرادى. ياعني، ەل مەنى جاقسى كورۋ ءۇشىن مەن 20 جاستاعى قىزداي سىلانىپ ءجۇرۋىم كەرەك دەپ شەشەدى. 20 جاسار قىزدى سۇلۋ بولعانى ءۇشىن ەمەس، وزىنە سەنىمدى بولعانى ءۇشىن جاقسى كورەتىنى ميىنا قونبايدى. ال قازىرگى 35 جاستا سول سەنىم سەتىنەيدى. ءوزىن كەرەمەت سەزىنبەي قالادى.
قازىرگى زاماندا جاستىق شاقتى ساقتاۋ دەگەن گيپەرتروفيكالىق كۋلت بار. 20-دان 40 جاسقا دەيىنگى ەرلەر جالپى جاستىق شاق تۋرالى ويلانبايدى. ال 45 اسقان سوڭ كوپ ەر ادام قارتايىپ بارا جاتقانىن سەزىنەدى. ءالى دە تارتىمدى ەكەنىن سەزىنۋ ءۇشىن وزىنە جاس قىز ىزدەي باستايدى. تابۋ-تاپپاۋى ەكىتالاي، ارينە. دەگەنمەن، سول جاس قىزعا دەگەن ۇمتىلىسى الگى كۋلتتى تۋدىرعانى. تەك جاستار ۇنايدى، تەك جاستار قالايدى، تەك جاستار قۇمارتادى دەپ ويلايدى.
ەش پايداسى جوق شتامپتار بار. تۇرمىسقا تەك جاستار شىعادى. تەك جاس ادامعا قۇمارتادى. تەك دۇرىس ەركەكتەرمەن تانىساتىن ارنايى ورىندار بار. سەنى باعالاۋى ءۇشىن بىرقاتار ارنايى ءىستى مەڭگەرۋ شارت. ءبارى وتىرىك. تاماشا جىگىتتى اۆتوبۋستا دا كەزدەستىرەسىڭ. نەمەسە قوقىس توگۋگە شىققاندا. دۇكەندە كەزەكتە تۇرعاندا. تاعىسىن تاعى.
سەن ءوزىڭدى قالاي باعالاساڭ، اينالاداعى ادامدار دا سەنى سولاي باعالايدى دەگەندى ايتقاننان شارشاعان ەمەسپىن. ول ەركەككە دە قاتىستى. بىراق قازىرگى اڭگىمە ول تۋرالى ەمەس. ءوزىڭدى قالاي سەزىنسەڭ، بۇل بەت-الپەتىڭدە كورىنىس بەرەدى. نەگە؟ سەبەبى، ەركەك سەنىڭ بەت-الپەتىڭدى ەمەس، نە سەزىنگەنىڭدى عانا كورمەك. ال ەگەر ايەل بوتەن جۇزبەن جۇرۋگە دايىن بولسا، ەندەشە ىشتەي ول ءوزىن مۇلدە جاقسى كورمەگەنى. ءوزىنىڭ بولمىسىن باعالاي المايتىنى. ەشبىر وتا مۇنى جاسىرىپ قالا المايدى.
قۇمارلىعىن وياتاتىنداي تارتىمدى بولۋ دەگەن نە؟
سەكسۋالدى تارتىمدىلىق – بۇل بەلگىلى ءبىر پارامەترلەردىڭ جيىنتىعى ەمەس. سوعان ساي بولۋعا تالپىنۋ قاجەت ەمەس. ەگەر ادامعا ءوز ءتانى ۇناسا، سول ادام تارتىمدى. بىرنەشە تانىمال جۇپتاردى اتاپ كەتكىم كەلىپ تۇر. ولاردىڭ زايىپتارىنىڭ ەشبىرى سۇلۋ دەۋگە كەلمەيدى. يوكو ونو – سونىڭ جارقىن مىسالى. تۇردەن ءتۇر جوق، سىمباتى دا ونشا ەمەس، كوزگە تۇسەرلىك دىمى جوق. ال لەننون – سىمباتتى، يىعى كەڭ، كەلبەتتى جىگىت. پيرس بروسنان مەن ونىڭ 120 كەلى ايەلى. حيۋ دجەكمان مەن ونىڭ دەبوراسى. باندەراس پەن گريففيت. تالاي ادامدى اتاپ شىعۋعا بولادى.
قۇمارلىق دەگەن ءتان سىمباتىنا، جاسىڭا، سالماعىڭا، قانشا ءاجىمىڭ بارىنا قارامايدى. قۇمارلىق ىشتەن شىعادى. ادام بولمىسى سولاي جارالعان. ادامنىڭ پسيحيكاسى سولاي جارالعان. ەگەر ادام وزىنە ۇناي باستاسا، وندا سول ساتتە سىڭارىن تاۋىپ الادى. نازار اۋداراتىندار، كوڭىل بىلدىرەتىندەر، ماحابباتىن دالەلدەيتىندەر تابىلا كەتەدى. جاس شاماسى دا، سىرتقى الپەت تە، مىنەز دە قۇمارلىققا كەدەرگى بولا المايدى.
ميحايل لابكوۆسكي
اۋدارعان شىنار ءابىلدا
"ادىرنا" ۇلتتىق پورتالى
