الماتى اكىمدىگى دەموكراتيالىق پارتيا قۇرعىسى كەلەتىن باستاما توپ وكىلدەرىنىڭ قىتاي ەكسپانسياسىنا تىيىم سالۋدى جانە نەسيە امنيستياسىن تالاپ ەتەتىن ميتينگىسىن وتكىزۋىنە رۇقسات بەردى دەپ حابارلايدى «ازاتتىق» راديوسى. بۇل تۋرالى قۇقىق قورعاۋشى باقىتجان تورەعوجينا Facebook-تاعى پاراقشاسىندا جازدى. ول قالالىق قوعامدىق دامۋ باسقارماسىنىڭ رۇقسات بەرگەن قاعازىنىڭ تۇپنۇسقاسىن دا جاريالادى.
باسقارما جەتەكشىسىنىڭ ورىنباسارى ا.ەسەنبەكوۆتىڭ قولى بار قۇجاتتا "شارانىڭ ماقساتى مەن تاقىرىبىنان اۋىقتىماۋ قاجەتتىگى" جايلى ەسكەرتۋ جازىلعان. اتقارۋ ورگانى بۇعان قوسا، "شاراعا قاتىساتىن ءاربىر ادام سانيتارلىق-ەپيدەميولوگيالىق نورمالاردى" ساقتاۋى ءتيىس دەگەن ياعني، ادامدار ماسكا تاعىپ، 1,5 مەترلىك ارا قاشىقتىقتى ساقتاۋى ءتيىس، زالالسىزداندىراتىن قۇرالى بولۋى كەرەك.
اكىمدىك وكىلدەرى "قوعامدىق ءتارتىپتىڭ ساقتالۋى مەن اۋماقتىڭ سانيتارلىق جاعدايىنا شارانى ۇيىمداستىرۋشىلار جاۋاپ بەرەدى" دەپ تە جازعان. بەيبىت جيىن وتكىزۋ ءتارتىبى تۋرالى زاڭعا سايكەس، "ازاماتتاردىڭ ءومىرى مەن دەنساۋلىعىنا، قوعامدىق تارتىپكە نەمەسە قاۋىپسىزدىككە قاۋىپ تونگەن جاعدايدا" شارا توقتاتىلادى دەپ ەسكەرتكەن.
بۇعان دەيىن ساياساتكەر جانبولات ماماي باستاعان دەموكراتيالىق پارتيا قۇرۋدى كوزدەيتىن توپ وكىلدەرى 13 قىركۇيەكتە ميتينگ وتكىزەتىنىن حابارلاعان. توپ وكىلدەرى جەردىڭ شەتەلدىكتەرگە ساتىلماۋىن، نەسيە امنيستياسىن جاريالاپ، ساياسي تۇتقىنداردى بوساتۋدى تالاپ ەتەتىنىن ايتىپ وتىر. بۇعان قوسا، ميتينگ تاقىرىپتارىنىڭ اراسىندا قىتاي ەكسپانسياسىنا قارسىلىق تا بار.
بىلتىردان بەرى "دەموكراتيالىق پارتيا" قۇرۋعا تالپىنىپ، جاقتاستارىن جيناپ جۇرگەن ساياساتكەر جانبولات ماماي سوڭعى ۋاقىتتا نەسيە كەشىرۋ تۋرالى باستامانى ءجيى كوتەرىپ ءجۇر. بيىل ىندەتكە بايلانىستى جۇمىس ورىندارى توقتاپ، تابىسسىز قالعان ازاماتتار سانى كوبەيگەن شاقتا ماماي ازاتتىققا بەرگەن سۇحباتىندا "جۇرت نەسيەنى قىمبات اۆتوكولىك نەمەسە كەرەكسىز دۇنيە ساتىپ الۋعا ەمەس، كۇندەلىكتى قارىزىن جابۋعا الىپ وتىر، بۇل يدەياعا قارسىلاردى كەزدەستىرمەدىم" دەگەن ەدى. كەيبىرى مۇنى "پوپۋليستىك يدەيا" دەپ اتاسا، كەيبىرى قولداعان.
سوڭعى رەت باستاما توپ وكىلدەرى 6 ماۋسىمدا وسى تاقىرىپتا ميتينگ وتكىزگەن. ول كۇنى "دەموكراتيالىق پارتيامەن" قاتار ەلدەگى وزگە دە وپپوزيتسيالىق كۇشتەر ءار جەردە بيلىككە قارسى نارازىلىق شاراسىنا جينالعان. ىىم سول كۇنى رەسپۋبليكانىڭ تۇكپىر-تۇكپىرىندە 53 ادام ۇستالعانىن حابارلادى. ال قۇقىق قورعاۋ توپ وكىلدەرى مەن اقپارات قۇرالدارى جۇزدەن استام ادامنىڭ ۇستالعانىن جازدى.
قازاقستاندا ماۋسىم ايىندا "بەيبىت جيىن تۋرالى" جاڭا زاڭ قابىلدانعانمەن قۇقىق قورعاۋشىلار بەيبىت جيىنعا شىققان ازاماتتاردى ۇستاۋ مەن ولاردى قۋدالاۋ تىيىلمادى دەپ وتىر. جەرگىلىكتى بيلىك بۇرىنعىشا شارانىڭ "رۇقسات ەتىلمەگەنىن" العا تارتىپ، زاڭسىز دەۋمەن كەلەدى. جەرگىلىكتى جانە حالىقارالىق قۇقىق قورعاۋشىلار جاڭا زاڭدا ەسكى شەكتەۋلەر قالعانىن ايتادى.
فوتو اشىق دەرەككوزدەن الىندى.
