قازاقستان فۋتبول فەدەراتسياسى ەۋروپا فۋتبول قاۋىمداستىعى وداعىنا (UEFA) مۇشە بولىپ قابىلدانعالى بەرى وسى سپورتتى دامىتۋعا مەملەكەتتىك قازىنادان ونداعان ميلليارد دولار قارجى جۇمساپ كەلەدى.
فۋتبول الىپپەسىن برازيالياعا اپارىپ ۇيرەتكەن جاستارىنىڭ سايدا سانى، قۇمدا ءىزى قالمادى. كەتكەن شىعىندى وتەۋدىڭ ورنىنا تاعى دا ميلليوندار شىعارىپ، شەتەلدەن جالدامالى ويىنشىلار مەن باپكەرلەر شاقىرتۋ بەلەڭ الىپ كەتكەن. سالىنعان ستاديونداردىڭ قۇنى ءوز الدىنا، پرەمەر-ليگادا وينايتىن فۋتبولشىلارىمىز ورتا ەسەپپەن 4 500 000 تەڭگە كولەمىندە ايلىق الاتىن كورىنەدى. بۇعان قاراپ وتىرىپ، وبلىستارداعى بيۋدجەتتىڭ ەداۋىر بولىگى ۇلكەن فۋتبولعا بولىنەتىنىن انىق بايقاۋعا بولادى. ماسەلەن، قوستاناي وبلىسىنداعى «توبىل» فۋتبول كلۋبىنىڭ بيىلعى بيۋدجەتى 12,90 ميلليون ەۋرو بولسا، «استانا» بيۋدجەتى – 22,58 ميلليون ەۋرو.
سويتە تۇرا ەۋروپاداعى كلۋبتىق ويىنداردا قارىق قىلىپ ونەر كورسەتكەن كوماندا بولماي تۇر. ماسەلەن، وتكەندە عانا چەمپيوندار ليگاسىنىڭ ىرىكتەۋ ساتىسىنا قاتىسقان «استانا» فۋتبول كلۋبى بەلارۋستىڭ «دينامو-برەست» كومانداسىنان 3:6 ەسەبىمەن ويسىراي ۇتىلىپ، جارىستان شەت قالدى. سول «استانادا» وينايتىن مارين توماسوۆ، دميتري شومكو، دورين روتاريۋ، يۆان ماەۆسكي سەكىلدى ويىنشىلاردىڭ قۇنىن كورسەڭ، توبە شاشىڭ تىك تۇرادى.
| اتى-ءجونى |
ازاماتتىعى
|
جاسى | كلۋبى | باعاسى |
| مارين توماسوۆ | حورۆاتيا | 32 | «استانا» | 2,80 ملن ەۋرو |
| ەسەولا |
ۋكراينا، نيگەريا |
29 | «قايرات» | 2,50 ملن ەۋرو |
| ياتسەك گۋرالسكي | پولشا | 27 | «قايرات» | 2,40 ملن ەۋرو |
| رومان مۇرتازاەۆ | قازاقستان | 26 | «توبىل» | 2,0 ملن ەۋرو |
| دميتري شومكو | قازاقستان | 30 | «استانا» | 2,0 ملن ەۋرو |
| دورين روتاريۋ | رۋمىنيا | 25 | «استانا» | 1,7 ملن ەۋرو |
| سوتيريرۋ | كيپر | 27 | «استانا» | 1,4 ملن ەۋرو |
| دينو
ميحانوۆيچ |
حورۆاتيا | 26 | «قايرات» | 1,4 ملن ەۋرو |
| ستاس پوكاتيلوۆ | قازاقستان | 27 | «قايرات» | 1,4 ملن ەۋرو |
| جواو پاۋلو | برازيليا | 32 | «ورداباسى» | 1,4 ملن ەۋرو |
| دميتري نەپاگودوۆ | قازاقستان،
ۋكراينا |
32 | «استانا» | 1,4 ملن ەۋرو |
بايقاعانىمىزداي، ەلىمىزدەگى ەڭ قىمبات 11 ويىنشىنىڭ 5-ەۋى «استانا» كومانداسىندا دوپ تەبەدى، ءارى ولارعا العاشقى اينالىمنان اسا الماعانى ءۇشىن ميلليونداپ اقشا تولەيدى.
«استانانىڭ» سۇرەڭسىز ويىنىنان كەيىن ميحال بەليكتى ورنىنان الىپ تاستادى. بەليك سەكىلدى تالاي باپكەر كەلدى بۇل ەلگە. سونىڭ ءبىرى دە قازاق فۋتبولىن ورگە سۇيرەي المادى. ال سولارعا كەتكەن شىعىننىڭ وتەلمەيتىنى ەكىباستان بەلگىلى.
كەتكەن باپكەر كەتىپ تىنسا جاقسى عوي، ميحالىڭىز مىقتى ەكەن. ۇلتتىق قۇرامانىڭ باس باپكەرى بولىپ قالا بەردى. كۇنى كەشە وسى باپكەر باستاعان اياقدوپشىلار ۇلتتار ليگاسى اياسىندا بەلارۋس قۇراماسىنا 1:2 ەسەبىمەن ەسە جىبەردى. بۇل ۇتىلىستان بەليكتىڭ قالپاعى دا قيسايمايدى. ەسەسىنە قفف تاعى ءبىر باپكەرگە شىعىندانۋدى باستايتىنى انىق.
قازىر ارقانى كەڭگە سالاتىن كەزەڭ ارتتا قالدى. جالعىز ءبىزدىڭ ەلدىڭ ەمەس، الەم ەكونوميكاسى دامۋىن تەجەتىپ، كەيبىر ەلدەردىڭ اشتىققا ۇشىراۋى مۇمكىن ەكەنى ايتىلۋدا.
دۇنيەجۇزىلىك ازىق-تۇلىك باعدارلاماسىنىڭ باسشىسى دەۆيد بيسلي: -بىزدە بارلىق مالىمەت ساقتالادى، پاندەمياعا دەيىن تاماققا ءزارۋ بولعان ادام بۇرىن 140 ميلليون بولعان. ال جىل سوڭىنا دەيىن بۇل كورسەتكىش 270 ميلليونعا جەتۋى مۇمكىن، - دەپتى.
وسىنداي قاۋىپتى كەزەڭدە بيۋدجەت اقشاسىنىڭ ەداۋىر بولىگى وندىرىسكە ەمەس، وتاندىق فۋتبول كلۋبتارىنا كەتىپ جاتىر. ولار جەتىستىككە جەتىپ جاتسا قۋاناتىن-اق ەدىك. قازىر اياقدوپشىلاردى جالعىز ءبىز ەمەس، باسقا سپورت تۇرلەرىنىڭ وكىلدەرى دە جاقتىرمايتىن دارەجەگە جەتكەن. ونىڭ سەبەبى بەلگىلى. الەم، ازيا جانە حالىقارالىق جارىستاردىڭ كەيبىر جەڭىمپازدارىنا بەرىلمەگەن سىياقى ناشار وينايتىن فۋتبولشىلارىمىزعا بەرىلۋدە.
فۋتبول ويىنىنا، ونىڭ دامۋىنا قارسىلىعىمىز جوق. الايدا بيۋدجەت ەسەبىنەن تابىسىنان ايرىلعان ازاماتتارىمىزعا 42 500 بەرىپ، قوناققا كەلىپ كەتەتىن جالدامالى ويىنشىلارعا ملن-داپ اقى تولەۋدى اقىلعا قونىمسىز ارەكەت دەپ بىلەمىز. ءوز حالقىن وزەككە تەپكىزگەن فۋتبول بىزگە كەرەك پە؟
سوندىقتان دا فۋتبول باسشىلىعى الەم جانە ەۋروپا چەمپيوناتتارىنا ىرىكتەۋ كەزەڭدەرىنىڭ فينالدىق ساتىسىنا شىقپاق تۇگىلى ۇپاي السا قۋاناتىن جاعدايعا جەتكىزگەنى ءۇشىن، مەملەكەتتىڭ قازىناسىن وڭدى-سولدى شاشقانى ءۇشىن حالىققا ەسەپ بەرۋى ءتيىس.
جانبولات سارقاسقا،
"ادىرنا" ۇلتتىق پورتالى
