كۇز جانە قىس مەزگىلدەرىندە ادامدار اراسىندا ۆيرۋستىق ينفەكتسيالىق اۋرۋلار جيىلەيدى. وسى ورايدا قر دسم قوعامدىق دەنساۋلىق ساقتاۋ ۇلتتىق ورتالىعى جۇقپالى اۋرۋلاردىڭ الدىن الۋ دەپارتامەنتىنىڭ ديرەكتورى جۇمابەك بەكەنوۆ قازاقپارات تىلشىسىنە بەرگەن سۇحباتىندا ۆيرۋستىق ينفەكتسيالاردىڭ الدىن الۋ شارالارى تۋرالى ايتىپ بەردى.
«ۆيرۋستاردىڭ بارلىعى نەگىزىنەن اۋا-تامشى جولدارى ارقىلى تارالادى. ونىڭ الدىن الۋ شارالارىنا گيگيەنا ساقتاۋ، سالاۋاتتى ءومىر سالتىن ۇستانۋ، دۇرىس تاماقتانۋ جاتادى. كوشەدە، قوعامدىق كولىكتەردە جانە باسقا جەرلەردە ماسكا كيىڭىز، ونى 2-3 ساعات سايىن اۋىستىرىپ وتىرىڭىز. سونىمەن قاتار، بولمەنى ءجيى جەلدەتىپ، اۋانى ىلعالداندىرۋ قاجەت. تۇسكى ۋاقىتتا تازا اۋادا سەرۋەندەۋگە شىققان وتە پايدالى. مۇرىندى جانە اۋىز قۋىسىن تۇزدى ەرىتىندىمەن شايىپ، سۋ، ءتاتتى ەمەس شىرىندار مەن شايدى كوبىرەك ىشكەن ءجون. ال ءوزىڭىزدى قورعاۋدىڭ ەڭ سەنىمدى ءادىسى – تۇماۋعا قارسى ەكپە سالدىرۋ. ۆاكتسينا جاساساڭىز، بويىڭىزدا ۆيرۋسقا قارسى انتيدەنەلەر پايدا بولادى. تۇماۋعا قارسى ماۋسىمدىق ۆاكتسينالاردى وندىرۋشىلەر جىل سايىن ددۇ ۇسىنىسى بويىنشا ەكپەنىڭ قۇرامىن وزگەرتىپ، ماۋسىمدىق تۇماۋدىڭ مۋتاتسيالىق تۇرىنە بەيىمدەيدى. ەكپەنى ءدارى-دارمەككە اللەرگياسى بار ادامداردان باسقالارىنىڭ بارلىعى العان ءجون. كىشكەنتاي بالالار، سوزىلمالى اۋرۋى بار ازاماتتار، قارتتار مەن جۇكتى ايەلدەر ۆاكتسيناتسيا جاساۋى قاجەت»، - دەدى قر دسم قوعامدىق دەنساۋلىق ساقتاۋ ۇلتتىق ورتالىعى جۇقپالى اۋرۋلاردىڭ الدىن الۋ دەپارتامەنتىنىڭ ديرەكتورى جۇمابەك بەكەنوۆ.
