ەلىمىزدە COVID-19-بەن كۇرەسۋگە تارتىلعان 1 208 مەديتسينا قىزمەتكەرى (اۋىرىپ قالعاندار - رەد.) الەۋمەتتىك ساقتاندىرۋ قورىنان (ماسق) بەرىلەتىن بىرجولعى الەۋمەتتىك تولەمدى الدى. بىرجولعى تولەم قۇنى - 2 ملن ملن تەڭگە. سونداي-اق، ماسق اۋرۋدىڭ سالدارىنان قايتىس بولعان 10 مەديتسينا قىزمەتكەرىنىڭ تۋىستارىنا تولەمدەر اۋداردى. بۇل تۋرالى "ادىرنا" ءتىلشىسى ەڭبەك مينيسترلىگىنە سىلتەمە جاساپ حابارلايدى.
بىرجولعى تولەمدى دەنساۋلىق ساقتاۋ باسقارمالارى جانىنداعى ارنايى كوميسسيالار اۋىرعان مەديتسينا قىزمەتكەرلەرىن تەكسەرۋ ناتيجەلەرى نەگىزىندە انىقتايدى. وتىنىمدەردى جيناقتاۋدى قر دەنساۋلىق ساقتاۋ مينيسترلىگى جۇزەگە اسىرادى، ودان كەيىن وتىنىمدەر ەلەكتروندىق ءىس ماكەتتەرىن قالىپتاستىرۋ ءۇشىن «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق-قا بەرىلەدى، كەيىن تولەم تاعايىنداۋ ءۇشىن ماسق-عا جىبەرىلەدى.
4 قىركۇيەك ساعات 9.00-دەگى جاعداي بويىنشا ماسق COVID-19 نەمەسە ۆيرۋستىق پنەۆمونيا جۇقتىرعان 1 208 مەديتسينا قىزمەتكەرىنىڭ ءوتىنىشى بويىنشا جانە اۋرۋدىڭ سالدارىنان قايتىس بولعان 10 مەديتسينا قىزمەتكەرىنىڭ ءوتىنىش بويىنشا اقشالاي قاراجاتتى تاعايىنداۋ مەن تولەۋدى جۇزەگە اسىردى.
COVID-19 نەمەسە ۆيرۋستىق پنەۆمونيانى جۇقتىرۋ كەزىندە تولەگەن تولەمدەردىڭ ەڭ كوپ سانى 6 ايماقتا تىركەلدى: نۇر-سۇلتاندا - 227, الماتى قالاسىندا - 128, الماتى وبلىسىندا - 99, قاراعاندى وبلىسىندا - 95 جانە اقمولا وبلىسىندا - 94 مەديتسينا قىزمەتكەرى 2 ملن تەڭگەدەن الدى.
قر ەڭبەك جانە حالىقتى الەۋمەتتىك قورعاۋ ءمينيسترى مەن قر دەنساۋلىق ساقتاۋ ءمينيسترىنىڭ 9 ساۋىردەگى «دەنساۋلىق ساقتاۋ ۇيىمدارىنىڭ COVID-19 كوروناۆيرۋستىق ينفەكتسياسىنا قارسى كۇرەس جونىندەگى ەپيدەمياعا قارسى ءىس-شارالارعا تارتىلعان قىزمەتكەرلەرى اتالعان ينفەكتسيانى جۇقتىرعان نەمەسە ودان قايتىس بولعان جاعدايدا ولارعا بىرجولعى الەۋمەتتىك تولەمدى جۇزەگە اسىرۋ قاعيدالارىن بەكىتۋ تۋرالى» بىرلەسكەن بۇيرىعىنا اعىمداعى جىلدىڭ 22 شىلدەسىندە ەنگىزىلگەن وزگەرىستەرگە سايكەس جوعارىدا كورسەتىلگەن تولەم:
– كوروناۆيرۋستىق ينفەكتسيا نەمەسە ۆيرۋستىق پنەۆمونيا جۇقتىرعان مەديتسينا قىزمەتكەرلەرىنە – 2 ملن. تەڭگە;
– COVID-19 كوروناۆيرۋستىق ينفەكتسياسىن جۇقتىرعاننان، ۆيرۋستىق پنەۆمونيامەن اۋىرىپ قايتىس بولعان جاعدايدا ولاردىڭ وتباسىنا – 10 ملن. تەڭگە كولەمىندە تولەنەدى.
"ادىرنا" ۇلتتىق پورتالى
