مەملەكەت باسشىسى قاسىم-جومارت توقاەۆتىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىن ىسكە اسىرۋ جونىندە شىمكەنت قالاسى اكىمدىگىنىڭ اكتيۆ ءماجىلىسى ءوتتى.
جيىندا قالا اكىمى مۇرات ايتەنوۆ جولداۋداعى باسىم باعىتتار مەن ناقتى اتقارىلاتىن جۇمىستاردى اتاپ بەردى. مۇرات دۇيسەنبەكۇلى جاڭا جاعدايداعى ەكونوميكالىق دامۋ، حالىقتىڭ الەۋمەتتىك ءال-اۋقاتىن كوتەرۋ، قورشاعان ورتانى قورعاۋ، ءبىلىم جانە دەنساۋلىق سالاسىنداعى ماسەلەلەردى اتاپ، بىرقاتار ورىنباسارلارىنا ناقتى تاپسىرمالار جۇكتەدى.
شىمكەنت قالاسىن اۋىل شارۋاشىلىعى ونىمدەرىن وڭدەۋ ورتالىعىنا اينالدىرۋعا بارلىق مۇمكىندىكتەر بار. تۇركىستان جانە جامبىل وبلىستارىنداعى اۋىل شارۋاشىلىعى ونىمدەرىن شىمكەنتتە وڭدەپ، ىشكى جانە سىرتقى نارىققا شىعارۋعا سۇرانىپ تۇر.
– قالادا مامانداردى دايىندايتىن وقۋ ورىندارى جەتەدى. ترانسپورتتىق-لوگيستيكالىق جەلى دامىعان. ءتورت جولدىڭ تورابىندا وتىرمىز. سوندىقتان، اگرويندۋستريالىق ايماقتى قالىپتاستىرۋ جۇمىستارىن جەدەلدەتۋ كەرەك. ورىنباسارىم ساتتىباەۆ ايبەك بەرىكۇلىنا وڭدەۋ ونەركاسىبى جانە اۋىل شارۋاشىلىعىن دامىتۋدىڭ 5 جىلدىق جوسپارىن ازىرلەۋدى تاپسىرامىن، – دەدى مۇرات دۇيسەنبەكۇلى.
سونداي-اق، حالىقتىڭ الەۋمەتتىك ءال-اۋقاتى – باستى باسىمدىققا يە. نارىقتىڭ جاعدايىندا ءار ازاماتتىڭ باسپانالى بولۋى تىكەلەي وزىنە بايلانىستى. دەسە دە، مەملەكەت تۇرعىن ءۇي قۇرىلىسىن تىكەلەي قولداپ وتىر. شىمكەنتتە 1 ميلليون شارشى مەتردى قۇرايتىن 262 كوپقاباتتى ءۇي سالىنىپ جاتىر. (ونىڭ 126-سى جەكەمەنشىك كوممەرتسيالىق جوبا، بارلىعى 6 147 پاتەر)
قازىر شىمكەنت قالاسىندا 40 مىڭعا جۋىق ادام ءۇي كەزەگىندە تۇر. بيىل ونىڭ ىشىندە 976 ادام باسپانالى بولادى.
قالا اكىمى حالىقتى باسپانامەن قامتۋ بويىنشا باۋىرجان مامىتاليەۆكە تۇرعىن ءۇي كەزەگىندەگى ازاماتتاردى باسپانامەن قامتۋدىڭ 5 جىلدىق جوسپارىن ازىرلەۋدى تاپسىردى.
– جالپى، شىمكەنت مەگاپوليس بولعان سوڭ، تابيعي ءوسىم مەن ميگراتسيانى ەسكەرەر بولساق، تۇرعىن ۇيگە دەگەن سۇرانىس ەشقاشان تومەندەمەيدى. مەملەكەتتىك بيلىك حالىق سانى مەن تۇرعىن ءۇي قۇرىلىسىنىڭ قارقىنىن ۇشتاستىرۋعا ءتيىس. ورىنباسارىم باۋىرجان جايمۇرزىنۇلى كرەديتتىك تۇرعىن ۇيلەر كولەمىن ارتتىرۋ، تۇرعىن ءۇيدىڭ وزىندىك قۇنىن ازايتۋ، ارەندالىق تولەمدەردى بيۋدجەتتەن سۋبسيديالاۋ مۇمكىندىكتەرىن قاراستىرسىن، – دەدى قالا اكىمى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
