قىتايدان قاشىپ كەلگەن قوس قانداسىمىز مۇراگەر الىمۇلى مەن قاستەر مۇساحانۇلىنىڭ قازان ايىندا «پانا ىزدەۋشى تۇلعا» كۋالىگىنىڭ مەرزىمى اياقتالادى. سودان كەيىن جاعداي قالاي بولماق؟ الداعى ۋاقىتتا ەكى قانداسىمىز بوسقىن مارتەبەسىن الۋى مۇمكىن بە؟ قازاقستاندا قالا ما؟ وسى سۇراقتار بويىنشا «ادىرنا» ءتىلشىسى ەكى ازاماتتىڭ ادۆوكاتى ءلاززات احاتوۆاعا حابارلاسقان بولاتىن.
– بوسقىن مارتەبەسىن الا العان جوق دەپ كەسىپ ايتاتىنداي ول ماسەلە ءالى قارالعان دا جوق قوي. كارانتينگە بايلانىستى ۋاقىتشا ۇزارتىلدى. قىركۇيەكتە كوميسسيا مۇشەلەرى جينالادى، سوندا قارايمىز دەپ ايتىپ جىبەردى. ويتكەنى سول كەزەڭ ۆيرۋستىڭ قاتتى ءورشىپ تۇرعان، ەكىنىڭ ءبىرى كوۆيدپەن اۋىرىپ، ەل باسقا شارۋانىڭ ءبارىن تاستاپ، جانىمەن ارپالىسىپ جاتقان قيىن كەزەڭ ەدى. كۇنىنە پالەنباي ارىستارىمىز بىرىنەن سوڭ، ءبىرى كەتىپ جاتقان قايعىدان كوز اشپاعان مەرزىمگە تاپ بولدىق..تۇرمەدەن 22-دە بوساسا، ارتىنشا بەس كۇننەن كەيىن، كۋالىك مەرزىمدەرى دە اياقتالىپ جاتتى. قۇجاتتارى وسكەمەننەن (شقو كوشى-قون دەپارتامەنتىنەن) كوكشەتاۋعا (اقمولا وبل. ميگراتسياعا) كەلىپ تە ۇلگەرمەگەن كەزدە بوسقىندىق بەرىلە سالمادى دەپ وكپەلەۋ - لوگيكاعا دا سىيمايتىن نارسە ەدى. قىتايعا قايتاراتىن نيەتتەرى بولسا (مەملەكەتتىڭ), سايراگۇلگە وتكاز بەرگەندەي (وعان ءۇشىنشى رەتتە كۋالىك مەرزىمىن سوزۋعا وتكاز بەرگەن) ءتورتىنشى رەت سوزباس ەدى دەپ ويلايمىن،- دەيدى ادۆوكات ءلاززات احاتوۆا.
بوسقىن مارتەبەسى بەرىلمەگەن كۇندە جاعداي قالاي بولادى؟ ەكى ازامات دەپورتاتسيالانا ما دەگەن ماسەلەگە دە ءلاززات حانىم جاۋاپ بەردى:
– ەلدىڭ ءبىرازى “ويباي، ەۆروپاعا كەتپەسە بولمايدى”- بايبالام سالىپ جاتىر. ەۆروپاعا كەتۋدىڭ ءوز ءتارتىبى، زاڭدى پروتسەدۋراسى بار عوي. الدىمەن بۇل ەكى جىگىت قازاقستاننان بوسقىندىق سۇرادى. سول ەلدە ول ماسەلە قارالىپ، وتكاز بەرىلسە عانا، باسقا ەلدەردەن بوسقىندىق سۇراپ، ول ەلدەردىڭ ءبىرى قابىلداسا عانا كەتە الادى. سول سەبەپتى بوسقىندىق تۋرالى ارىز قارالىپ، كوميسسيا شەشىمى شىقپايىنشا، پالەن-تۇگەن دەپ بال اشۋ ارتىق. ول ارىزدارى تۇرعىلىقتى مەكەن-جايلارى بويىنشا اقمولا وبلىستىق كوشى-قون باسقارماسىندا ارنايى جاساقتالعان كوميسسيامەن قارالادى. ال قازاقستان بوسقىندىق بەرۋدەن باس تارتسا، باسقا ەلدەردەن بوسقىندىق سۇراۋ تۋرالى حاتتى مەن سوناۋ قىستا، ءىس سوتقا كەتپەي جاتىپ، تەرگەۋ بارىسىندا-اق بۇۇ-نا جىبەرىپ، جاۋاپ الىپ قويعانمىن. ونى فەيسبۋكتە جاريالادىم دا. وندا بۇل ماسەلەنىڭ الدىمەن قازاقستاندا قارالۋ كەرەكتىگىن، ول ەل بوسقىندىقتى بەرۋدەن باس تارتسا عانا، كومەك بەرە الاتىندىعى ايتىلعان. سول كەزدەردە رەسپۋبليكالىق شەكارا قىزمەتى باسشىسى ءدىلمانوۆتىڭ ەكىۇشتى سۇحباتى شىعىپ، كۇدىك كوبەيگەن ۋاقىت بولاتىن. مەن سول ۋاقىتتا بۇۇ-عا حات جولدادىم. ونى جىگىتتەر دە، باسقالار دا جاقسى بىلەدى. ەندى نە سەبەپتى بۇكىل الەم پاندەميامەن الىسىپ، جاندارىمەن ارپالىسىپ جاتقاندا، ولاي بايبالام سالىپ جاتقانى، ول كىسىلەردىڭ تۇپكى نيەتتەرى ماعان جۇمباق..
فوتو جاس الاش سايتىنان الىندى
اعىن ايدىن،
«ادىرنا» ۇلتتىق پورتالى
