ءبىلىم جانە عىلىم ءمينيسترى اسحات ايماعامبەتوۆ مۇعالىمدەردىڭ جالاقىسى 25 پايىزعا كوبەيەتىنىن، 2025 جىلعا قاراي 6 جاسقا دەيىنگى بالالاردى بالاباقشامەن 100 پايىزعا قامتۋدى جوسپارلاپ وتىرعانىن ايتتى.
پرەزيدەنتتىڭ مۇعالىمدەردىڭ جالاقىسىن 2021 جىلى 1-قاڭتاردان باستاپ 25 پايىزعا ارتتىرۋ تاپسىرماسى بويىنشا ءتيىستى قاراجات بيۋدجەت جوباسىندا تولىعىمەن قاراستىرىلدى. بۇعان قوسا مەملەكەت باسشىسىنىڭ تاپسىرماسى اياسىندا قىركۇيەك ايىنان باستاپ داپتەر تەكسەرۋشىنىڭ ۇستەماقىسى 2 ەسەگە، سىنىپ جەتەكشى ءۇشىن الاتىن ۇستەماقى 2 ەسەگە، ماگيستر دارەجەسى بار مۇعالىمدەر 27 مىڭ تەڭگە كولەمىندە جاڭا ۇستەماقى الاتىن بولادى، – دەدى ۇكىمەت وتىرىسىندا اسحات ايماعامبەتوۆ.
اسحات ايماعامبەتوۆ بۇعان دەيىن مۇعالىمدەرگە قاتىستى قۇقىق بۇزۋشىلىقتار مەن پەداگوگيكالىق ەتيكانى ورەسكەل بۇزۋعا باعىتتالعان داۋلى ماسەلەلەردى قاراستىراتىن ارنايى القالى ورگان قۇرۋدى جوسپارلاپ وتىرعانىن ايتقان.
"مەملەكەت باسشىسى قاسىم-جومارت توقاەۆ مينيسترلىككە «پەداگوگ مارتەبەسى تۋرالى» زاڭ نورمالارىن ىسكە اسىرۋ بويىنشا اتقارىلىپ جاتقان جۇمىستى جالعاستىرۋدى تاپسىردى.
اتالعان قۇجاتتىڭ ماڭىزدى ەرەجەلەرىنىڭ ءبىرى – پەداگوگتى مىندەتىنە جاتپايتىن فۋنكتسيالارعا تارتۋدان قورعاۋ، ورىنسىز ەسەپتىلىكتەن بوساتۋ.
بۇل نورمالار جاڭا وقۋ جىلى قارساڭىندا وتە وزەكتى.
مينيسترلىكتىڭ وسىعان قاتىستى قاتاڭ ۇستانىمدارىنا قاراماستان، وكىنىشكە وراي، وسى ەرەجەلەردى بۇزۋ فاكتىلەرى ءالى دە كەزدەسەدى.
وسىدان بىرنەشە اپتا بۇرىن لەنگىر مەكتەپ-ينتەرناتىندا اكىمشىلىك ءىس قوزعالدى، وندا پەداگوگتەردى لاۋازىمدىق مىندەتتەرىنە كىرمەيتىن جۇمىستارعا تارتقان.
ءبىلىم سالاسىندا ساپانى قامتاماسىز ەتۋ دەپارتامەنتى وقيعا ورنىنا بارىپ، قىزمەتتىك تەكسەرۋ جۇرگىزدى.
فاكتىلەر راستالدى جانە مەكتەپ ديرەكتورىنىڭ م.ا. اكىمشىلىك جاۋاپكەرشىلىككە تارتىلدى.
بۇعان دەيىن تۇركىستان وبلىسى كەنتاۋ قالاسىنداعى مولدا مۇسا اتىنداعى مەكتەپتە دە قىزمەتتىك تەكسەرۋ جۇرگىزىلدى. وندا مۇعالىمدى مەكتەپتى جوندەۋ جۇمىستارىنا تارتقان. اتالعان فاكتى تەكسەرۋ بارىسىندا راستالدى. مەكتەپ ديرەكتورىنىڭ مىندەتىن اتقارۋشى دا، كەنتاۋ قالالىق ءبىلىم ءبولىمىنىڭ قىزمەتكەرى دە اكىمشىلىك جاۋاپكەرشىلىككە تارتىلدى.
جالپى وسى قىسقا ۋاقىتتىڭ وزىندە ءبىلىم سالاسىندا ساپانى قامتاماسىز ەتۋ جونىندەگى اۋماقتىق دەپارتامەنتتەرگە جۇزدەن استام ءوتىنىش كەلىپ ءتۇستى.
ناتيجەسىندە لاۋازىمدى تۇلعالارعا دا، ءبىلىم الۋشىلاردىڭ اتا-انالارىنا دا قاتىستى 30-دان استام اكىمشىلىك جازا قولدانىلدى.
بۇل جۇمىس تۇراقتى تۇردە جۇرگىزىلەتىن بولادى.
زاڭسىزدىققا جول بەرگەن جاۋاپتى تۇلعالارعا قاتىستى شارالار مۇنىمەن شەكتەلمەيدى.
اكىمشىلىك جازالاردان بولەك، جۇمىستان بوساتۋ تۋرالى شەشىمدەر دە قابىلدانادى.
مۇعالىمدەردىڭ قۇقىعىن قورعاۋ – جەرگىلىكتى اۋماقتىق ورگان باسشىلارىنىڭ دا، مەكتەپ ديرەكتورلارىنىڭ دا تىكەلەي مىندەتى.
پەداگوگتەردىڭ قۇقىقتارىن قورعاۋ تۋرالى ايتقاندا، مۇعالىمدەر ءوز مىندەتتەرىن ادال ورىنداۋ تۋرالى دا ەستە ساقتاۋى قاجەت. ويتكەنى جاڭا زاڭنىڭ تالاپتارى دا جاڭا.
پەداگوگيكالىق قىزمەتپەن اينالىساتىن ءاربىر جان جاس ۇرپاققا ۇلگى بولىپ، ءوز جۇمىسىندا ادامگەرشىلىك قاعيدالارى مەن مورالدىق قۇندىلىقتاردى باسشىلىققا الۋى ءتيىس.
مىنەز-قۇلىق مادەنيەتى، ادەپتىلىك، ادالدىق، ادامنىڭ ار-نامىسى مەن قادىر-قاسيەتىن قۇرمەتتەۋ – پەداگوگيكالىق ەتيكانىڭ نەگىزى.
وسى قاعيدالاردىڭ ساقتالۋىن باقىلاۋ ءۇشىن ءبىز مۇعالىمدەرگە قاتىستى قۇقىقبۇزۋشىلىقتار مەن پەداگوگيكالىق ەتيكانى ورەسكەل بۇزۋ تۋرالى داۋلى ماسەلەلەردى قاراستىراتىن ارنايى القالى ورگان قۇرۋدى قاراستىرۋدامىز.
بۇل – پەداگوگيكالىق ەتيكا جانە مۇعالىمدەردىڭ قۇقىقتارىن قورعاۋ جونىندەگى كەڭەس.
مۇنداي ينستيتۋت العاش رەت پيلوتتىق رەجيمدە وسى جىلدىڭ تامىز ايىنان باستاپ نۇر-سۇلتان قالاسىندا جۇمىس ىستەۋدى باستادى.
بولاشاقتا ەتيكا بويىنشا كەڭەستەر ەلىمىزدىڭ بارلىق ايماعىندا قۇرىلا الادى. ولار ءبىلىم بەرۋ سالاسىندا ساپانى قامتاماسىز ەتۋ دەپارتامەنتتەرى جانىندا جۇمىس ىستەيتىن بولادى.
بارلىعىمىز مەملەكەتتىك قىزمەتكەرلەردىڭ ادەپ جونىندەگى كەڭەسىنىڭ ءتيىمدى جۇمىسىنىڭ كۋاسى بولدىق.
ءبىزدىڭ جاڭادان قۇرىلعان كەڭەستەرىمىزدىڭ قىزمەتى سونىڭ ۇلگىسى بويىنشا ۇيىمداستىرىلادى.
مۇنىڭ ءبارى – ۇلكەن باستاما: ءار مۇعالىم ءوزىنىڭ مارتەبەسىن ماقتان تۇتۋى كەرەك. ىڭعايلى جاعدايدا جۇمىس ىستەپ، ساپالى ءبىلىم بەرۋى كەرەك.
ويتكەنى ءبىزدىڭ بالالارىمىزدىڭ ءال-اۋقاتى مەن ءبىلىمى ۇستازداردىڭ قولىندا.
«التى الاشتىڭ يگى جاقسىسى باس قوسسا، توردەگى ورىن - ۇستازدىكى» - دەگەندەي وسى تاراپتا الدىمىزدا ءالى دە ءبىراز جۇمىس بار ەكەنى بەلگىلى."
