ەلىمىزدىڭ تۇپكىر-تۇپكىرىندە قارجىلىق پيراميدالاردىڭ بار ەكەنى جاسىرىن ەمەس. بۇگىندە «Indigo24» دەپ اتالاتىن كەزەكتى قارجى پيراميداسى ميلليونداعان سالىمشىسىن تاقىرعا وتىرعىزىپ كەتتى. ول ەلىمىزدە 3 جىل بويى جۇمىس جاساپ، حالىقتىڭ سەنىمىنە كىرگەن-ءدى.
قازىرگى تاڭدا الاياقتاردىڭ ارباۋىنا تۇسكەن جۇرت اقشالارىن قايتارا الماي الەك بوپ ءجۇر. بۇل تۋرالى زاڭگەر-مەدياتور ايجان كەسەباي ايتىپ بەردى.
ءاربىر ءۇشىنشى ءۇي زارداپ شەگىپ وتىر
- بۇل قارجىلىق پيراميداعا وتە كوپ ادام الدانعان. بىزگە جەتىساي، سارىاعاش، شاردارا اۋداندارىنان وتىنىمدەر كەلىپ ءتۇستى. حالىق 1 ميلليون 8 مىڭ تەڭگەدەن 26 ميلليون تەڭگەگە دەيىن سالىم سالعان. ياعني، ءار ءۇشىنشى ءۇي زارداپ شەگىپ وتىر.
زاڭگەر-مەدياتور رەتىندە حالىقتان كەلگەن وتىنىمدەردى قابىلدادىق. كەيبىرەۋلەرى جەكەلەنگەن زاڭگەرلەرگە جۇگىنۋدە. شاردارا اۋدانىنىڭ وزىنەن 200 شاعىم كەلىپ ءتۇستى. دەسە دە، بۇل الدانعانداردىڭ ءبىر بولىگى عانا. شىمكەنت قالاسىنان مينيمۋم 4000-5000 ادام قارجىلىق پيراميداعا اقشا سالعان.
سونداي-اق، «Indigo 24» قارجىلىق پيراميداسىنا كىرۋشىلەر ارتىنان ادام اكەلۋى ءتيىس بولعان.
- بۇگىندە «سەن مەنى كىرگىزدىڭ يا وسىعان اقشا سالۋعا ۇگىتتەدىڭ» دەگەن ارازدىق اعايىندار مەن كوشباسشىلار اراسىندا ءورشىپ تۇر.
پيراميداعا قارجى قۇيعانداردىڭ 90%-ى مۇعالىمدەر
- ەڭ سوراقىسى، «Indigo24» قىزمەتكەرلەرى ازاماتتاردى بانكتەرگە جەتەلەپ ءجۇرىپ، نەسيە الىپ بەرگەن. ءتىپتى حالىقتى ونلاين رەجيمدە بەرىلەتىن ميكروكرەديتتەردى الۋعا دa كوندىرگەن. الدانىپ قالعانداردىڭ ىشىندە ءبىر ءوزى 4-5 نەسيە الىپ، سان سوققان جاندار بار.
1-2 ليدەردى تۇرمەگە قاماعاننان ەشنارسە وزگەرمەيدى
- ميلليونداعان ادامدى الداپ كەتكەن ۇيىم تۋرالى دەرەكتەردى «استانا» حالىقارالىق قارجى ورتالىعىنا جىبەرمەكشىمىز. ەرتەڭ 1-2 ليدەردى تۇرمەگە قاماعاننان ەشنارسە وزگەرمەيدى. سول سەبەپتى باس پروكۋراتۋرا دا بۇل ماسەلەنى كوتەرۋى كەرەك. قازىرگى تاڭدا وسى ءىستى تۇبەگەيلى زەرتتەپ، جۇمىستار جاساپ جاتىرمىز.
قارجىلىق ساۋاتتىلىق دەڭگەيى وتە تومەن
- بۇگىندە اڭعال، قۇقىقتىق ساۋاتسىز حالىق جاپا شەگىپ، قارىزعا بەلشەسىنەن باتىپ وتىر. ولارعا ەشقانداي زاڭدى قۇجاتتار بەرىلمەگەن. بۇل ەلىمىزدەگى قارجىلىق، قۇقىقتىق ساۋاتتىلىق دەڭگەيىنىڭ تومەن ەكەنىن كورسەتىپ وتىر.
بۇل ماسەلەگە بەلگىلى زاڭگەر ايگۇل ورىنبەك تە ءوز پىكىرىن ءبىلدىردى.
- «باس پروكۋراتۋرا نازارىنا! “ۇلتتىق ارنا جارناما جاسادى، «نۇر وتان» العىس حات بەرگەن سوڭ سەنىپ قالدىق”،-دەپ وتىر حالىق.بۇل قارجىلىق پيراميدانىڭ ەلىمىزدە جۇمىس جاساعانىنا ۇش جىل بولعان ەكەن. پرەزيدەنتىمىزدىڭ ءوزى الاياقتارعا قاتاڭ شارا قولدانۋدى تاپسىردى. نەگە حالىق ءالى شىرىلداپ ءجۇر؟»،- دەدى ول Facebook پاراقشاسىندا.
قازىرگى تاڭدا حالىقتى الداعان الاياقتار ىزدەستىرىلىپ جاتىر.
ديانا اسان،
«ادىرنا» ۇلتتىق پورتالى
Басқалармен бөлісе отырыңыз
