نازارباەۆ: پارتيا قازاقستاندىقتاردى بىرىكتىرۋى ءتيىس

2521
Adyrna.kz Telegram

ەلباسى نۇرسۇلتان نازارباەۆ Nur Otan پارتياسى ساياسي كەڭەسى بيۋروسىنىڭ وتىرىسىن وتكىزدى. بۇل تۋرالى "ادىرنا" ءتىلشىسى Sputnik قازاقستان-عا سىلتەەم جاساپ حابارلايدى.

قاتىسۋشىلار پارتيانىڭ "سەنىم. ديالوگ. بولاشاققا نىق قادام - Nur Otan پارتياسىنىڭ 7 سەرپىنى" باعدارلاماسى مەن پارتيا ىشىندەگى سايلاۋ وتكىزۋ ماسەلەسىن تالقىلادى.

نازارباەۆ قوعام پارتيانىڭ پرايمەريزىنە قىزىعۋشىلىق تانىتىپ وتىرعانىن اتاپ ءوتتى.

"ادامدار ەلدىڭ قوعامدىق جانە ساياسي ومىرىنە بەلسەندىرەك ارالاسقىسى كەلەدى. ءبىز پارتيانى جانداندىرۋدىڭ دۇرىس باعىتىن تاڭدادىق. ەلدەگى ماسەلەلەردى بىرلەسە شەشۋ ءۇشىن اشىق ديالوگ قامتاماسىز ەتۋ كەرەك. جاعدايدى جاقسى بىلەتىن، قوعام قولداۋىنا يە بەدەلدى، بەلسەندى ليدەرلەردى تاڭداۋ كەرەك", - Nur Otan پارتياسىنىڭ توراعاسى نۇرسۇلتان نازارباەۆ.

ول پرايمەريزگە قاتىسۋشىلار ماڭىزدى ماسەلەلەردى قوزعاپ، ولقىلىقتاردى انىقتاپ، ولاردى شەشۋ جولىن ۇسىنۋى ءتيىس ەكەنىن ايتتى.

قىركۇيەك ايىندا 216 جەرگىلىكتى باعدارلاما جاريالانىپ، تالقىلاناتىن بولادى.

"بەس جىلعا ارنالعان باعدارلاما ازاماتتاردىڭ پىكىرى، ءار اۋدان، قالا مەن وبلىستىڭ بيۋدجەتىن ەسكەرە وتىرا تولىقتىرىلادى", - دەدى ەلباسى.

ول كەلەسى كەزەڭدەردى جۇزەگە اسىرۋدا پارتياعا ىرىكتەۋدى ۇيىمداستىرۋ جۇمىسىنىڭ ساپالى بولۋى ماڭىزدى ەكەنىن جەتكىزدى.

"پرايمەريزدى اشىق، ءادىل ۇيىمداستىرىپ، بارشا قاتىسۋشىلار ءۇشىن بىردەي جاعداي جاساۋ كەرەك. پارتياداعى ۇگىت جۇمىسى قىركۇيەكتە باستالادى. دەنساۋلىق ساقتاۋ مينيسترلىگىنىڭ تالاپتارى قاتاڭ ساقتالۋى ءتيىس. ءبىز ءۇشىن باستىسى - ادامداردىڭ دەنساۋلىعى", - دەدى ەلباسى.

پارتيا توراعاسى Nur Otan-نىڭ قوعامدى بىرىكتىرۋ جانە ەلدىڭ الداعى دامۋىن قامتاماسىز ەتۋدەگى رولىنە توقتالدى.

"پارتيا قازاقستاندىقتاردى بىرىكتىرۋى ءتيىس. بىرلىك بولسا عانا، قيىندىقتاردى ەڭسەرە الامىز. اسىرەسە، ەلدەگى تۇراقتىلىق پەن تىنىشتىقتى ساقتاۋ ءۇشىن بىرلەسە جۇمىس ىستەۋ ماڭىزدى",- دەدى نازارباەۆ.

ول پارتيا توراعاسىنىڭ ورىنباسارى باۋىرجان بايبەك پەن پرەمەر-مينيستر اسقار ءماميننىڭ ەسەبىن تىڭدادى.

"ادىرنا" ۇلتتىق پورتالى

 

پىكىرلەر