الماتىداعى № 4 قالالىق كلينيكالىق اۋرۋحانانىڭ حيرۋرگيا ءبولىمىنىڭ مەڭگەرۋشىسى بولات اسىلحانۇلى ءتۇسىپحانوۆ 49 جاسىندا قايتىس بولدى ، - دەپ حابارلايدى "ادىرنا" ءتىلشىسى Tengrinews.kz-كە سىلتەمە جاساپ.
"بولات ءتۇسىپحانوۆتىڭ كەنەتتەن قايتىس بولۋى بۇكىل مەديتسينا قاۋىمداستىعى ءۇشىن ورنى تولماس قازا. الماتى قالاسى قوعامدىق دەنساۋلىق باسقارماسىنىڭ ۇجىمى بولات اسىلحانۇلىنىڭ وتباسى مەن جاقىندارىنا قايعىرىپ كوڭىل ايتادى", - دەلىنگەن باسقارما حابارلامادا.
بولات اسىلحانۇلى جوعارى ساناتتاعى دارىگەر، ماماندىعى بويىنشا 25 جىل جۇمىس ىستەگەن. ارىپتەستەرى ونى تالانتتى حيرۋرگ رەتىندە سيپاتتايدى.
الماتىداعى №4 قالالىق كلينيكالىق اۋرۋحانانادا 2018 جىلدان بەرى جۇمىس ىستەگەن.
وسىعان دەيىن جەلىدە الماتىلىق دارىگەردىڭ اۋديوجازباسى تاراعان بولاتىن.
"مەنىڭ ەكى حيرۋرگىم اۋىرىپ قالدى، ولار ناۋقاستارمەن بايلانىستا بولدى، سوندا جۇمىس ىستەدى. بىرەۋى جانساقتاۋ بولىمىندە جاتىپ، ارەڭ ەسىن جيدى، ەكىنشىسى تىپتەن جاتىپ قالدى. ال بۇگىن ءبىزدىڭ مەڭگەرۋشىمىز اۋىرىپ قالدى.
اۋرۋحانالار ناۋقاستارعا تولى. جانساقتاۋ بولىمىندە ورىن جوق. اپپاراتتار جەتكىلىكسىز. بۇل شىندىق. ءتىپتى جاعدايى ورتاشا اۋىر ناۋقاستار ۇيلەرىندە قالىپ جاتىر. سىزگە ەشكىم ءدارى بەرمەيدى. سوندىقتان تاعى دا ايتامىن، دەنساۋلىقتارىڭىزدى ساقتاڭىزدار، اباي بولىڭىزدار", - دەگەن ەدى بولات ءتۇسىپحانوۆ اۋديوجازبادا.
كەيىنىرەك بۇل اۋديونى دارىگەردىڭ تۋىستارىنا جازعانى انىقتالدى.
"ادىرنا" ۇلتتىق پورتالى
