Almatydaǵy № 4 qalalyq klınıkalyq aýrýhananyń hırýrgııa bóliminiń meńgerýshisi Bolat Asylhanuly Túsiphanov 49 jasynda qaıtys boldy , - dep habarlaıdy "Adyrna" tilshisi Tengrinews.kz-ke silteme jasap.
"Bolat Túsiphanovtyń kenetten qaıtys bolýy búkil medıına qaýymdastyǵy úshin orny tolmas qaza. Almaty qalasy Qoǵamdyq densaýlyq basqarmasynyń ujymy Bolat Asylhanulynyń otbasy men jaqyndaryna qaıǵyryp kóńil aıtady", - delingen basqarma habarlamada.
Bolat Asylhanuly joǵary sanattaǵy dáriger, mamandyǵy boıynsha 25 jyl jumys istegen. Áriptesteri ony talantty hırýrg retinde sıpattaıdy.
Almatydaǵy №4 qalalyq klınıkalyq aýrýhananada 2018 jyldan beri jumys istegen.
Osyǵan deıin Jelide almatylyq dárigerdiń aýdıojazbasy taraǵan bolatyn.
"Meniń eki hırýrgym aýyryp qaldy, olar naýqastarmen baılanysta boldy, sonda jumys istedi. Bireýi jansaqtaý bóliminde jatyp, áreń esin jıdy, ekinshisi tipten jatyp qaldy. Al búgin bizdiń meńgerýshimiz aýyryp qaldy.
Aýrýhanalar naýqastarǵa toly. Jansaqtaý bóliminde oryn joq. Apparattar jetkiliksiz. Bul shyndyq. Tipti jaǵdaıy ortasha aýyr naýqastar úılerinde qalyp jatyr. Sizge eshkim dári bermeıdi. Sondyqtan taǵy da aıtamyn, densaýlyqtaryńyzdy saqtańyzdar, abaı bolyńyzdar", - degen edi Bolat Túsiphanov aýdıojazbada.
Keıinirek bul aýdıony dárigerdiń týystaryna jazǵany anyqtaldy.
"Adyrna" ulttyq portaly
