ەلىمىزدە توتەنشە جاعداي جاريالانىپ، توي جاساۋعا تىيىم سالىنعانى بارلىعىمىزعا ايان. پرەزيدەنتىمىز قاسىم-جومارت توقاەۆ «قازىر "تويىڭ تويعا ۇلاسسىن" دەپ اندەتىپ، توي تويلاپ جۇرەتىن ۋاقىت ەمەس»،- دەگەن ەدى.الايدا, كارانتين كەزىندە «قازاقتىڭ تويى بىتپەسىن» دەگەن ۇراندى ارقاۋ ەتىپ، جاسىرىن توي وتكىزىپ جۇرگەندەردىڭ قاراسى كوپ.
كارانتيندە توي وتكىزگەندەر قالاي جازالانادى؟
زاڭبۇزۋشىلىققا جول بەرگەن جاعدايدا رەجيمدى بۇزعاندار جاۋاپكەرشىلىككە تارتىلادى. توي يەلەرىنە اكىمشىلىك قۇقىق بۇزۋشىلىق تۋرالى حاتتاما تولتىرىلىپ، 30 اەك (83 340 تەڭگە) كولەمىندە ايىپپۇل سالىنادى. نىسان يەلەرى 230 اەك ( 319 470 تەڭگە) ءتولەۋگە مىندەتتى. شىلدەايىندا باتىس قازاقستان وبلىسىندا توي وتكىزگەن تۇرعىندارعا 1,5 ملن تەڭگە ايىپپۇل سالىندى. قازىرگى تاڭدا روزا رىمباەۆا مەن تورەعالي تورەالىنىڭ وتباسىندا بولعان تويلارعا قاتىستى تەكسەرىس ءجۇرءىپ جاتىر.
توي تويلاتىپ جۇرگەن شوۋ-بيزنەس جۇلدىزدارى
كارانتيندە وتىرۋ انشىلەر قاۋىمىن جالىقتىرعان سىڭايلى. بۇگىندە ولار تويدا ونەر كورسەتىپ، ناپاقاسىن تابۋعا كوشكەن. ەستەرىڭىزدە بولسا، بۇعان دەيىن جەلىدە ماقپال ءجۇنىسوۆا، نۇرجان تولەنديەۆ، تورەعالي تورەالى، ءابدىجاپپار القوجا، جازيرا بايىربەكوۆا، سالتانات باقاەۆا سىندى جۇلدىزداردىڭ تويدا ونەر كورسەتىپ جاتقان ۆيدەولارى تاراعان ەدى.
توي تىزگىنشىلەرى نەمەن اينالىسىپ ءجۇر؟
توتەنشە جاعدايعا بايلانىستى تويدان تابىس تاۋىپ جۇرگەن اسابالاردىڭ كاسىبى تۇرالاپ قالدى. توي تىزگىنشىلەرى نەمەن اينالىسىپ ءجۇر؟ «ادىرنا» ۇلتتىق پورتالى سۇراپ كوردى.
ساعىندىق ءسالمۇحانوۆ:
- قازىرگى تاڭدا كوپتەگەن نىساندار ءوز جۇمىسىن قايتا باستادى، بىراق توي وتكىزۋگە سالىنعان تىيىم الىنبادى. اسابالار ءۇشىن بۇل مىقتى سوققى بولدى. قازىرگى تاڭدا ءالى كۇنگە دەيىن بۇرىن قابىلداپ قويعان تاپسىرىستارىمنىڭ اقشاسىن قايتارىپ ءجۇرمىن. توي توقتاپ قالعان كەزدە ساۋدامەن اينالىسىپ كەتتىم. جاسىراتىنى جوق، كارانتين كەزىندە شاقىرتۋلار ءتۇستى، بىراق كوپ ەمەس. اشىق اسپان استىندا قولىما انتيسەپتيگىمدى ۇستاپ الىپ، توي وتكىزدىك. وعان 20-40 شاقتى ادام قاتىستى. حالىق ميكروفونسىز تىلەك ايتتى. توي دا بۇرىنعىداي ۇزاققا سوزىلمادى. نەگىزى توي وتكىزۋگە رۇقسات بەرۋ كەرەك دەپ ويلايمىن. ويتكەنى، حالىق كافەلەرگە بارىپ تاماقتانۋدا، ساۋدا ورىندارى دا اشىق. بىلايشا ايتقاندا، ادامدار كوپ شوعىرلانعان جەرلەردە ءجۇر. اشسا، بارلىق جەردى بىردەي اشۋ كەرەك.
قۇدايبەرگەن سۇلتانياروۆ:
- توي بيزنەستە 2006 جىلدان باستاپ ءجۇرمىن. ءيا، كارانتينگە دەيىن تويعا ءجيى شىعىپ تۇرۋشى ەدىك. الايدا، ەلدەگى احۋالعا بايلانىستى بۇل كاسىپتى شەتكە ىسىرىپ قويدىم. ءوز باسىم قالىپتى ومىرگە قايتا ورالعاننان كەيىن عانا اسابالىق قىزمەتىمدى قولعا الامىن دەپ شەشتىم. كارانتين بارلىعىمىزعا جاناشىر جان بولۋدى ۇيرەتتى. توتەنشە جاعداي كەزىندە الەۋمەتتىك جەلىدەگى وقىرماندارىمىزبەن بىرىگە وتىرا ورال قالاسىنداعى مۇقتاج 3 وتباسىعا ءۇي الىپ بەردىك. قازىرگى تاڭدا نەگىزگى جۇمىسىم بار. مەكتەپتە مۋزىكا ءپانىنىڭ مۇعالىمى بولىپ قىزمەت اتقارامىن.
ساتىبالدى ءادىلحان:
- شۇكىر، جۇماسىنا 2-3-تويىم بار.
ايدىن جاقىپ:
- اسابا بولعانىما 5 جىل بولدى. ءيا، توتەنشە جاعدايعا دەيىن شاقىرتۋلار ءجيى تۇسەتىن ەدى. قازىر تويعا كوپ شاقىرمايدى، سەبەبى حالىق تا قاتاڭ رەجيمدى ۇستانىپ وتىر. ءوز باسىم ءۇي ىشىندە بولاتىن شاعىن تويلاردى باسقارىپ ءجۇرمىن.
مەيرامبەك كەنجەعاليۇلى:
- توي وتكىزۋدىڭ توقتاتىلعانىن جاقسى بىلەسىزدەر. بۇگىندە اسابالىقتى قويىپ، قۇدا رەتىندە كەلىن اكەلىپ جۇرگەن جايىم بار. توي تىزگىنىن ماڭگى ۇستامايتىنىمىز بۇرىننان بەلگىلى جاعداي عوي. ەل قاتارلى ءومىر ءسۇرىپ جاتىرمىز. دەسە دە، قازىرگى تاڭدا تويعا شاقىرتۋلار كوپ كەلىپ تۇسۋدە. وسى ورايدا«تويسىز قازاق جوق شىعار» دەگەن پىكىر ەرىكسىز ەسكە ورالادى. الايدا، كارانتينگە بايلانىستى اسابالىقتى توقتاتتىم.
قۇرمەتتى وقىرمان، ال ءسىز تويعا بارىپ ءجۇرسىز بە؟
ديانا اسان،
«ادىرنا» ۇلتتىق پورتالى
Басқалармен бөлісе отырыңыз
