شىمكەنت قالاسىنىڭ شارۋالارى جىل باسىنان بەرى 73,6 ملن. اقش دوللارى بولاتىن اۋىل شارۋاشىلىق ونىمدەرىن الەمنىڭ 11 ەلىنە ەكسپورتتاعان. وتكەن جىلدىڭ ءتيىستى كەزەڭىمەن سالىستىرعان اۋىل شارۋاشىلىعى ەكسپورتىنىڭ ارتقانى بايقالادى. ماسەلەن 2019 جىلى 65,5 ملن. اقش دوللارىن قۇرايتىن اۋىل شارۋاشىلىعى ونىمدەرى شەتەل نارىعىنا شىعارىلعان. بۇل تۋرالى اۋىل شارۋاشىلىعى جانە ۆەتەريناريا باسقارماسىنىڭ ماماندارى ءمالىم ەتتى.
شىمكەنتتەن شىققان ونىمدەر وزبەكستان، تاجىكستان، ءازىربايجان، تۇركىمەنستان، اۋعانىستان، قىرعىزستان، ۋكراينا، موڭعوليا، يران، بىرىككەن اراب امىرلىكتەرى جانە قىتايعا جونەلتىلگەن. اتاپ ايتقاندا، 72,3 توننا – ءىرى قارا ەتى، 12,7 توننا – قوي ەتى، 10,1 توننا – بال، 19,5 توننا – وڭدەلگەن بالىق سىرتقى نارىققا شىعارىلعان. سونداي-اق، كارتوپتىڭ – 25,2 مىڭ، پيازدىڭ – 45,3, قىرىققاباتتىڭ – 20, كوكونىستىڭ – 558, جەمىس-جيدەكتىڭ – 406,5 تونناسى جوعارىدا اتالعان ەلدەرگە ساتىلدى. بۇعان قوسا، 78,2 مىڭ توننا – بيداي، 4,5 مىڭ توننا – ارپا، 390 توننا – ءداندى داقىلدار، 6,1 مىڭ توننا –مايلى داقىلدار، 110,6 مىڭ توننا – ۇن، 19,2 مىڭ توننا – وسىمدىك مايى، 986,1 توننا – ماكارون ونىمدەرى جانە 74,5 توننا نان/كونديتەر ونىمدەرى ەكسپورتتالدى.
ايتا كەتەيىك، شىمكەنت قالاسىندا ءبىرىنشى جارتىجىلدىقتاعى اۋىل شارۋاشىلىعى ءونىمىنىڭ جالپى كولەمى 14.7 ملرد. تەڭگەنى قۇرادى. بۇل كورسەتكىش وتكەن جىلدىڭ ءتيىستى كەزەڭىمەن سالىستىرعاندا 3,7 پايىزعا جوعارى. اۋىل شارۋاشىعى ءونىمى كولەمىنىڭ ءوسۋ قارقىنى بويىنشا شىمكەنت قالاسى رەسپۋبليكا بويىنشا ءبىرىنشى ورىندا.
شىمكەنت قالاسى اكىمىنىڭ ءباسپاسوز قىزمەتى
