Shymkent qalasynyń sharýalary jyl basynan beri 73,6 mln. AQSh dollary bolatyn aýyl sharýashylyq ónimderin álemniń 11 eline eksporttaǵan. Ótken jyldyń tıisti kezeńimen salystyrǵan aýyl sharýashylyǵy eksportynyń artqany baıqalady. Máselen 2019 jyly 65,5 mln. AQSh dollaryn quraıtyn aýyl sharýashylyǵy ónimderi shetel naryǵyna shyǵarylǵan. Bul týraly aýyl sharýashylyǵy jáne veterınarııa basqarmasynyń mamandary málim etti.
Shymkentten shyqqan ónimder Ózbekstan, Tájikstan, Ázirbaıjan, Túrkimenstan, Aýǵanystan, Qyrǵyzstan, Ýkraına, Mońǵolııa, Iran, Birikken Arab Ámirlikteri jáne Qytaıǵa jóneltilgen. Atap aıtqanda, 72,3 tonna – iri qara eti, 12,7 tonna – qoı eti, 10,1 tonna – bal, 19,5 tonna – óńdelgen balyq syrtqy naryqqa shyǵarylǵan. Sondaı-aq, kartoptyń – 25,2 myń, pııazdyń – 45,3, qyryqqabattyń – 20, kókónistiń – 558, jemis-jıdektiń – 406,5 tonnasy joǵaryda atalǵan elderge satyldy. Buǵan qosa, 78,2 myń tonna – bıdaı, 4,5 myń tonna – arpa, 390 tonna – dándi daqyldar, 6,1 myń tonna –maıly daqyldar, 110,6 myń tonna – un, 19,2 myń tonna – ósimdik maıy, 986,1 tonna – makaron ónimderi jáne 74,5 tonna nan/kondıter ónimderi eksporttaldy.
Aıta keteıik, Shymkent qalasynda birinshi jartyjyldyqtaǵy aýyl sharýashylyǵy óniminiń jalpy kólemi 14.7 mlrd. teńgeni qurady. Bul kórsetkish ótken jyldyń tıisti kezeńimen salystyrǵanda 3,7 paıyzǵa joǵary. Aýyl sharýashyǵy ónimi kóleminiń ósý qarqyny boıynsha Shymkent qalasy respýblıka boıynsha birinshi orynda.
Shymkent qalasy ákiminiń baspasóz qyzmeti
