«ءبىز قايىرشىسى كوپ، 42500 تەڭگەگە كۇنەلتكەن باقىتتى ەلمىز»

3649
Adyrna.kz Telegram

Finprom.kz.-ءتىڭ حابارلاۋىنشا، قازاقستان  حالقى باقىتتى سانالاتىن دۇنيەجۇزىلىك ەسەپتە 10 ساتىعا كوتەرىلىپ، 153 ەلدىڭ ىشىندە 50-ورىندى يەمدەندى. حالقىنىڭ باقىتتىلىعى كورسەتكىشى بويىنشا ەۋرازيالىق ەكونوميكالىق وداق ەلدەرىن ارتقا تاستاعان ەڭ باقىتتى ەل ەكەنبىز.

رەيتينگتە حالىقتىڭ ءال-اۋقاتىنىڭ جان باسىنا شاققانداعى ء(جىو) دەڭگەيى، ءومىر ءسۇرۋ ۇزاقتىعى، ازاماتتىق بوستاندىقتارىنىڭ بولۋى، قاۋىپسىزدىك پەن بولاشاققا دەگەن سەنىمدىلىگى، وتباسى تۇراقتىلىعى، جۇمىس قاۋىپسىزدىگى، سىبايلاس جەمقورلىق دەڭگەيى، سونداي-اق قوعامنىڭ وزگە دە كورسەتكىشتەرىن ەسەپتەگەن.

«ادىرنا» ۇلتتىق پورتالىنىڭ ءتىلشىسى ەلىمىزدىڭ تۇرعىندارىنا Finprom.kz سايتىندا كورسەتىلگەندەي «باقىتتى ەلمىز بە؟» دەپ ساۋالناما جۇرگىزىپ كوردى.

ايتمۇحانبەت كەمەلحانوۆ،زاڭ عىلىمدارىنىڭ كانديداتى، پروفەسسور، پولكوۆنيك، ۇستاز:

-باقىتتى ەلمىز دەپ ەسەپتەمەيمىن. ادام قۇقىقتارىمەن بوستاندىقتارى بيلىك ورگاندارىمەن تولىقتاي قامتاماسىز ەتىلمەي جاتىر. قايدا بارساڭ دا، جەمقورلىق، كوزبوياۋشىلىق. مەملەكەتتىك قىزمەتكەرلەردىڭ، ونىڭ ىشىندە قۇقىق قورعاۋ، ارناۋلى ورگاندارىنىڭ، سوت بيلىگىنىڭ قاجەتتى دەڭگەيدە بىلىمدەرىنىڭ جەتىسپەيتىندىگىن كورىپ ءجۇرمىن.

ەجەلگى فيلوسوفتار ايتپاقشى، باقىتتى ەل بولۋ الەمنىڭ ءار ازاماتىنىڭ ارمانى. ول ناقتى قاي ۋاقىتتا باقىتتى سەزىنەتىنى بەلگىسىز.

رۇستەم اشەتاەۆ، جۋرناليست:

- باقىت دەگەندى ءار ۇلت ءار ءتۇرلى تۇسىنەدى. ەگەر دە، جەرى مەن مەملەكەتى جوق ەلدەرمەن وسى كريتەري بويىنشا سالىستىرعاندا، الدەقايدا باقىتتىمىز دەپ ايتۋعا بولادى.

ال، وداق ەلدەرىنىڭ ىشىندە «باقىتتى» بولساق، باقىتتى شىعارمىز (كۇلدى – اۆت.). بىراق، وداقتاعى ەلدەردىڭ احۋالىن ءبىلىپ وتىرعاندىقتان، باقىتسىز ەلدەردىڭ ىشىندەگى «باقىتتىسىمىز» دەگەن دۇرىسىراق بولار.

جىلبەك سەنبەكۇلى، جۋرناليست:

تاعى ءبىر اي كارانتيندە وتىرساق، بيلىك «باقىت» دەگەن دەگەن ءسوزدىڭ نە ەكەنىن ۇمىتاتىن شىعار. وسىنداي تاپسىرىسپەن جاسالاتىن زەرتتەۋلەر نەگە كەرەك؟ حالىق كوشەگە شىعۋعا دايىن وتىر، قايىرشىلار كوبەيدى. مۇنداي «باقىتتى» زەرتتەۋمەن اينالىسپاي، ناقتى شارالاردى قولعا الۋ كەرەك.

ءازىمباي عالي، ساياساتتانۋشى:

بۇل جاڭالىقتى بەس-التى كۇن بۇرىن كورىپ،ىشىمنەن ءبىر كۇلىپ قويدىم. باقىت سەنىمى ءىس جۇزىندە باسقاشا بولۋى مۇمكىن. ونى  مەملەكەت تۇرعىندارىنىڭ ءوزىن جايلى سەزىنۋ كورسەتكىشى دەپ بىلەمىن. باقىتتى دەگەن تىم قاتتى ايتتىلعان شىعار،  دەگەنمەن دە بەلگىلى دەڭگەيدە ءوز-ءوزىن جاقسى سەزىنەتىن كورسەتكىش. ارينە، بىزدە جەمقورلىق وتە جوعارى دەڭگەيدە، باتىس ەلدەرىمەن  سالىستىرعاندا تۇرمىس دەڭگەيىمىزدە ءتورت ەسە ايىرماشىلىق بار.

دەسە دە ساۋالنامانى حالىقتىڭ فانتاستيكالىق اداسۋى نەمەسە پروپوگانيستىك ارەكەتتەردىڭ اسەرى دەۋگە بولمايدى. مۇنان وتىز جىل بولسا دا قاناعاتتانارلىق سەزىمى ءالى كومەسكىلەنبەگەنىن بايقاۋعا بولادى.

ەلىمىزدىڭ تۇرمىس دارەجەسى جامان ەمەس، وزبەكستانمەن سالىستىرار بولساق، ءبىزدىڭ تۇرمىس دەڭگەيىمىز ء(ىجو) 2,5 ەسە جوعارى. كوروناۆيرۋس بولماسا، ىشكى جالپى ءونىم 4,5 پايىزعا وسەتىن ەدى.

تىنىسبەك قوڭىراتباي، فيلولوگيا عىلىمدارىنىڭ دوكتورى، پروفەسسور:

سوڭعى كەزدەرى ەلىمىزدە كەدەيشىلىك ۇدەپ بارادى. جۇرت ءسوز بوستاندىعىنا تۇساۋ سالىنعان دەپ شۋلاپ ءجۇر. عىلىم مەن ءبىلىم قۇلدىراپ كەتتى. جەتەكشى قىزمەتكەرلەر تاراپىنان جەمقورلىق ارەكەتتەر سانى كۇرت ءوسىپ كەلەدى. ونى شەتەل دە ءبىلىپ وتىر. سوندا ءبىز قاي كورسەتكىشتەرمەن الدىڭعى ورىننان كورىنۋىمىز مۇمكىن...

ايناگۇل حانگەلدى، الماتى وبلىسىنىڭ تۇرعىنى:

"كارانتين كەزىندە ءدارى تاپپاي قينالدىق. ايتپەسە، بىلاي امان-ەسەن ءجۇرمىز. باستى باقىت- دەنساۋلىق پەن ەلىمىزدىڭ تاۋەلسىزدىگى دەپ بىلەم".

ايدار اسانباي، جۇمىسسىز:

"وتە باقىتتىمىز! شىنايى باقىتتى ەكەنىمىزدى وسى جىلعى كارانتيندە سەزىندىك اۋ؟! جايشىلىقتا ءتۇرلى ايىپپۇلعا جۇزدەگەن مىڭ اقشا سالاتىن بيلىگىمىز حالقى ۇيگە قامالىپ، اس سۋسىز قالعاندا، 42500 تەڭگەنى ساداقاعا بەرگەندەي تاراتتى. وسى اقشانى الماي، قيىندىقتان تيتىقتاعان ازاماتتارىنا سۇراۋ سالعان ۇكىمەت بولمادى. وسىنداي شەنەۋنىكتەرى مەن ۇكىمەتى بار ءبىز ارينە، باقىتتىمىز. جەمقورلىقتىڭ ەتەك جايعانى سونشا، كارانتين كەزىندە بلوك پوستتاردان اقشا قىستىرىپ ءارى بەرى وتكەن ەل ءبىز عانا شىعار؟! بۇل دا بىزدەگى باقىتتىڭ ءبىر ۇشقىنى. ءسوز بوستاندىعى، ادام قۇقىعىنىڭ دەرەجەسى ءبىزدىڭ ەلدە تەك تاباننىڭ استىندا قالعانى سونشا، اۋزىن اشقاننىڭ ءبارى «سازايىن» تارتۋدا. قازىر اقشا سۇراۋشىلار كوشەدە ەمەس، الەۋمەتتىك جەلىدە دە قاپتاپ كەتتى. دەمەك، قايىرشىسى كوپ باقىتتى قازاقستانبىز. ءبىز قايىرشىسى كوپ، 42500 تەڭگەگە كۇنەلتكەن باقىتتى ەلمىز".

ءبىز سۇراۋ سالعان ادامداردىڭ جاۋابى وسىنداي بولدى. ءسىز قالاي ويلايسىز، قۇرمەتتى وقىرمان؟

 گۇلۆيرا اسقار،

«ادىرنا» ۇلتتىق پورتالى

 

پىكىرلەر