Finprom.kz.-tiń habarlaýynsha, Qazaqstan halqy baqytty sanalatyn dúnıejúzilik esepte 10 satyǵa kóterilip, 153 eldiń ishinde 50-oryndy ıemdendi. Halqynyń baqyttylyǵy kórsetkishi boıynsha Eýrazııalyq ekonomıkalyq odaq elderin artqa tastaǵan eń baqytty el ekenbiz.
Reıtıngte halyqtyń ál-aýqatynyń jan basyna shaqqandaǵy (JIÓ) deńgeıi, ómir súrý uzaqtyǵy, azamattyq bostandyqtarynyń bolýy, qaýipsizdik pen bolashaqqa degen senimdiligi, otbasy turaqtylyǵy, jumys qaýipsizdigi, sybaılas jemqorlyq deńgeıi, sondaı-aq qoǵamnyń ózge de kórsetkishterin eseptegen.
«Adyrna» ulttyq portalynyń tilshisi elimizdiń turǵyndaryna Finprom.kz saıtynda kórsetilgendeı «baqytty elmiz be?» dep saýalnama júrgizip kórdi.
Aıtmuhanbet KEMELHANOV,zań ǵylymdarynyń kandıdaty, professor, polkovnık, ustaz:
-Baqytty elmiz dep eseptemeımin. Adam quqyqtarymen bostandyqtary bılik organdarymen tolyqtaı qamtamasyz etilmeı jatyr. Qaıda barsań da, jemqorlyq, kózboıaýshylyq. Memlekettik qyzmetkerlerdiń, onyń ishinde quqyq qorǵaý, arnaýly organdarynyń, sot bıliginiń qajetti deńgeıde bilimderiniń jetispeıtindigin kórip júrmin.
Ejelgi fılosoftar aıtpaqshy, baqytty el bolý álemniń ár azamatynyń armany. Ol naqty qaı ýaqytta baqytty sezinetini belgisiz.
Rústem AShETAEV, jýrnalıst:
- Baqyt degendi ár ult ár túrli túsinedi. Eger de, jeri men memleketi joq eldermen osy krıterıı boıynsha salystyrǵanda, áldeqaıda baqyttymyz dep aıtýǵa bolady.
Al, odaq elderiniń ishinde «baqytty» bolsaq, baqytty shyǵarmyz (kúldi – avt.). Biraq, odaqtaǵy elderdiń ahýalyn bilip otyrǵandyqtan, baqytsyz elderdiń ishindegi «baqyttysymyz» degen durysyraq bolar.
Jylbek SENBEKULY, jýrnalıst:
Taǵy bir aı karantınde otyrsaq, bılik «baqyt» degen degen sózdiń ne ekenin umytatyn shyǵar. Osyndaı tapsyryspen jasalatyn zertteýler nege kerek? Halyq kóshege shyǵýǵa daıyn otyr, qaıyrshylar kóbeıdi. Mundaı «baqytty» zertteýmen aınalyspaı, naqty sharalardy qolǵa alý kerek.
Ázimbaı ǴALI, saıasattanýshy:
Bul jańalyqty bes-alty kún buryn kórip,ishimnen bir kúlip qoıdym. Baqyt senimi is júzinde basqasha bolýy múmkin. Ony memleket turǵyndarynyń ózin jaıly seziný kórsetkishi dep bilemin. Baqytty degen tym qatty aıttylǵan shyǵar, degenmen de belgili deńgeıde óz-ózin jaqsy sezinetin kórsetkish. Árıne, bizde jemqorlyq óte joǵary deńgeıde, Batys elderimen salystyrǵanda turmys deńgeıimizde tórt ese aıyrmashylyq bar.
Dese de saýalnamany halyqtyń fantastıkalyq adasýy nemese propoganıstik áreketterdiń áseri deýge bolmaıdy. Munan otyz jyl bolsa da qanaǵattanarlyq sezimi áli kómeskilenbegenin baıqaýǵa bolady.
Elimizdiń turmys dárejesi jaman emes, Ózbekstanmen salystyrar bolsaq, bizdiń turmys deńgeıimiz (IJO) 2,5 ese joǵary. Koronavırýs bolmasa, ishki jalpy ónim 4,5 paıyzǵa ósetin edi.
Tynysbek QOŃYRATBAI, fılologııa ǵylymdarynyń doktory, professor:
Sońǵy kezderi elimizde kedeıshilik údep barady. Jurt sóz bostandyǵyna tusaý salynǵan dep shýlap júr. Ǵylym men bilim quldyrap ketti. Jetekshi qyzmetkerler tarapynan jemqorlyq áreketter sany kúrt ósip keledi. Ony shetel de bilip otyr. Sonda biz qaı kórsetkishtermen aldyńǵy orynnan kórinýimiz múmkin...
Aınagúl HANGELDI, Almaty oblysynyń turǵyny:
"Karantın kezinde dári tappaı qınaldyq. Áıtpese, bylaı aman-esen júrmiz. Basty baqyt- densaýlyq pen elimizdiń táýelsizdigi dep bilem".
Aıdar ASANBAI, jumyssyz:
"Óte baqyttymyz! Shynaıy baqytty ekenimizdi osy jylǵy karantınde sezindik aý?! Jaıshylyqta túrli aıyppulǵa júzdegen myń aqsha salatyn bıligimiz halqy úıge qamalyp, as sýsyz qalǵanda, 42500 teńgeni sadaqaǵa bergendeı taratty. Osy aqshany almaı, qıyndyqtan tıtyqtaǵan azamattaryna suraý salǵan úkimet bolmady. Osyndaı sheneýnikteri men úkimeti bar biz árıne, baqyttymyz. Jemqorlyqtyń etek jaıǵany sonsha, karantın kezinde blok posttardan aqsha qystyryp ári beri ótken el biz ǵana shyǵar?! Bul da bizdegi baqyttyń bir ushqyny. Sóz bostandyǵy, adam quqyǵynyń derejesi bizdiń elde tek tabannyń astynda qalǵany sonsha, aýzyn ashqannyń bári «sazaıyn» tartýda. Qazir aqsha suraýshylar kóshede emes, áleýmettik jelide de qaptap ketti. Demek, qaıyrshysy kóp baqytty Qazaqstanbyz. Biz qaıyrshysy kóp, 42500 teńgege kúneltken baqytty elmiz".
Biz suraý salǵan adamdardyń jaýaby osyndaı boldy. Siz qalaı oılaısyz, qurmetti oqyrman?
Gúlvıra ASQAR,
«Adyrna» ulttyq portaly
