ميلليونەر انا بولۋ وڭاي ەمەس، سەبەبى وتباسى مەن بيزنەستى قاتار الىپ ءجۇرۋ اركىمنىڭ قولىنان كەلە بەرمەيدى. نازارلارىڭىزعا ءومىردىڭ سىناقتارىنا توتەپ بەرە بىلگەن ميلليونەر ءارى كوپبالالى انا دەني دجونسوننىڭ بالا تاربيەسىندەگى 6 ۇستانىمىن ۇسىنامىز.
دەني دجونسون:
بالالاردى ماقساتتى تۇردە تاربيەلەۋ
- بايلار بولاشاق گارۆارد تۇلەكتەرىن، دارىگەرلەردى نە كەلەشەك پرەزيدەنتتەردى تاربيەلەيدى. الەۋمەتتىك جاعدايى ورتاشا وتباسىلار «مۇمكىن بالامنىڭ جولى بولىپ كەتەر» دەگەن ويمەن عانا ءتالىم بەرەدى.
مەنىڭ اۋقاتتى تۇراتىن دوستارىمنىڭ وتباسىلارىندا ءبىر قىزىق وقيعا ورىن الدى. ۇلدارىنىڭ وقۋعا دەگەن ىنتاسى اشىلماي، ومىردە نە ىستەگىسى كەلەتىنىن بىلمەي دال بولادى. سول كەزدە وتاعاسى بالاسىن ۇيسىزدەرگە ارنالعان باسپاناعا تەگىن جۇمىس جاساۋعا جىبەرەدى. ءبىر اپتادان كەيىن جەتكىنشەك ۇيگە وقۋعا جانە وتباسىلىق بيزنەسكە ارالاسامىن دەگەن زور قۇلشىنىسپەن ورالادى.
ءموبيلدى تەلەفونسىز جانە تەلەديدارسىز بالالىق شاق
- بۇگىندە قاراپايىم بالانىڭ «جان دوسى» كىم ؟ استە، تەلەديدار، ءموبيلدى تەلەفون جانە كومپيۋتەر. دەني دجونسوننىڭ بالالارى العاشقى تەلەفوندارىنا 16 جاسىندا عانا قول جەتكىزدى، ال تەلەديدار ۇيدە مۇلدەم بولماپتى.
بيزنەس لەدي بىلاي سىر شەرتەدى: «مەنىڭ بالالارىم ءموبيلدى تەلەفون ۇستامايدى، سەبەبى ولار مۇلدەم اقشا تاپپايدى. تەلەفون ادامدى ءوز ۋاقىتىن رەتتەمەۋگە جانە جوسپارلاماۋعا ۇيرەتەدى، ال تەلەديدار دۇرىس ەمەس ءومىر مودەلدەرىن كورسەتەدى. سپانچ بوب تۋرالى مۋلتفيلم ءسىزدى نەگە ۇيرەتەدى؟ ءوز بەتىمەن كەتكەن جالقاۋ وزگەلەردى الداپ، سان سوقتىرعانىنا عانا ءماز. ءسىز ۇلدارىڭىزدىڭ وسىنداي ەر ادام بولىپ وسكەنىن قالايسىز با؟ ال قىزداردىڭىزدى سونداي جىگىتكە ۇزاتار ما ەدىڭىز؟ ەگەر 30 كۇن تەلەديدار قاراماساڭىز، بۇل تاۋەلدىلىكتەن قۇتىلۋعا بولادى».
بالانى جۇمىستى سۇيۋگە ۇيرەتىڭىز
- دەمالىس كۇندەرى جاقىنداعاندا بالالارىڭىز قانداي سوزدەر ەستەيدى؟ «الاقاي، ەرتەڭ جۇما»، «ەندى بۇل جۇمىستان دەمالاتىن بولدىم»، «مەنىڭ باستىعىم شوشقا سەكىلدى، ال جۇمىسىم مۇلدەم ۇنامايدى». وسىنداي سوزدەردى ەستىگەن بالا قالاي مىقتى جۇمىسكەر، ەڭبەكقور قىزمەتكەر بولادى؟!
ءسىز بالاڭىز ءۇشىن بانكومات ەمەسسىز
- مەن بالاما اياق كيىم ساتىپ الۋ ءۇشىن 50 دوللار بەرەمىن. ول اقشاعا كەرەمەت اياق كيىم ساتىپ الا المايسىز. ەگەر بالام قىمبات دۇنيەنى قالاسا «ءوزىڭ اقشا تاپ نەمەسە جاپپاي ساتىلىمدى كۇت» دەيمىن.
اتا-انا جاساۋى مۇمكىن ەڭ جامان نارسە – وزدەرى اقشا تاۋىپ، وزدەرى قول جەتكىزە الماعان دۇنيەلەردىا بالالارىنا الىپ بەرۋى. الايدا بالالار وسكەن كەزدە دايىن اسقا تىك قاسىق بولعىسى كەلەدى.
جۇمساۋ كەرەك پە الدە جيناۋ كەرەك پە؟
- اقشانى جۇمساۋدىڭ ەكى جولى بار: كەرەك ەمەس دۇنيەلەردى ساتىپ الۋ ارقىلى نەمەسە بالالاردى اقشانى جيناۋعا، تابۋعا ۇيرەتۋ.
«بالانى قاجەتسىز دۇنيەلەرگە اقشا جۇمساماۋعا قالاي ۇيرەتۋگە بولادى؟ ءبىزدىڭ ۇيدە 10 دوللار جيناساڭ، ۇستىنە 10 دوللار الاسىڭ دەگەن ەرەجە بار. قاجەتتى اقشا جينالعان كەزدە بالا ءوزىنىڭ دامۋىنا سەپتىگىن تيگىزەتىن زاتتار ساتىپ الا الادى. وزگەلەر ساتىپ الىپ جاتقان نارسەلەردى الماڭىز! ادەتتە بۇل تەك بوس ورىن الاتىن ارتىق نارسەلەر».
بالاڭىزدى جومارت بولۋعا ۇيرەتىڭىز
- تابىستى ادامداردىڭ باسىم بولىگى قولىنىڭ اشىقتىعىمەن ەرەكشەلەنەدى. ولار جومارت جاندار. بالاڭىزدى ادامداردى سىيلاي بىلۋگە ۇيرەتىڭىز.
ديانا اسانوۆا،
«ادىرنا» ۇلتتىق پورتالى
