قاسىم-جومارت توقاەۆ بىلتىر جارىلىس بولعان ارىس قالاسىنداعى №44859 اسكەري بولىمىنە بارىپ، ونىڭ بۇگىنگى جاعدايىمەن تانىستى. بۇل تۋرالى "ادىرنا" ءتىلشىسى اقورداعا سىلتەمە جاساپ حابارلايدى.
قورعانىس ءمينيسترى نۇرلان ەرمەكباەۆ وتكەن جىلعى جارىلىستان كەيىن قويماداعى وق-دارىلەردى كادەگە جاراتۋ جانە ولاردى تاسىمالداۋ جۇمىستارى جايىندا باياندادى. سونىمەن قاتار اسكەري ءبولىمنىڭ تەحنيكالىق ايماعىنداعى وق-دارىلەردىڭ قالدىعىن تازالاۋ، جارىلعىش زاتتاردى زالالسىزداندىرۋ، بۇزىلعان عيماراتتاردى قايتا قالپىنا كەلتىرۋ تۋرالى ايتتى. بۇدان بولەك قازاقستان پرەزيدەنتىنە اسكەري قۇرال-جابدىقتار مەن ارنايى تەحنيكالار تانىستىرىلدى.
مەملەكەت باسشىسى بۇل پوليگوننىڭ، اتالعان اسكەري ءبولىمنىڭ ۇلتتىق قاۋىپسىزدىكتى قامتاماسىز ەتۋدە ماڭىزدى ءرول اتقاراتىنىن اتاپ ءوتتى.
– قورعانىس ءمينيسترى جاڭا ماعان وق-دارىلەردىڭ قاۋىپسىز قويمالاردا ساقتالىپ جاتقانىن جانە ادامدارعا قاۋىپ تۋدىرمايتىنىن باياندادى. دەگەنمەن ءبىز ەندىگى جەردە مۇنداي جارىلىستىڭ بولۋىنا ەشقاشان جول بەرمەۋىمىز كەرەك. بۇل ماسەلە وتە ماڭىزدى جانە مەنىڭ تىكەلەي باقىلاۋىمدا بولادى، – دەدى پرەزيدەنت.
قاسىم-جومارت توقاەۆ وق-دارىلەردىڭ قاۋىپسىز ساقتالۋىن قامتاماسىز ەتۋ ماقساتىندا ۇكىمەتكە قازىرگى زامانعا ساي قويمالار سالۋ ءۇشىن قاجەتتى شارالار قابىلداۋدى تاپسىردى. ولاردىڭ ەلدى مەكەندەردەن الىس جەرلەردە سالىنۋىن، جارامسىز وق-دارىلەردى ۋاقتىلى جويۋ قاجەتتىگىن دە ەسكەرتتى.
– اسكەري-كولىك اۆياتسياسىن، رادياتسيالىق، حيميالىق جانە بيولوگيالىق قورعانىس كۇشتەرى مەن قۇرالدارىن، ينجەنەرلىك اسكەرلەردى، اسكەري مەديتسينانى دامىتۋ قورعانىس مينيسترلىگى جۇمىسىنىڭ باسىم باعىتتارىنىڭ ءبىرى بولۋعا ءتيىس، – دەدى قاسىم-جومارت توقاەۆ.
بىلتىرعى جارىلىستان كەيىن ارىس قالاسى تولىقتاي قايتا جاڭاردى. اسكەري قىزمەتشىلەر 450 مىڭنان استام وق-ءدارى مەن جارىلعىش زات زالالسىزداندىردى. قويماداعى وق-دارىلەردى كوشىرۋگە دايىندىقتىڭ نەگىزگى جۇمىستارى اياقتالدى.
"ادىرنا" ۇلتتىق پورتالى
