تيپا "حالىق قالاۋلىسى", «نۇر-وتان» پارتياسىنىڭ بەلسەندى مۇشەسى بەكبولات تىلەۋحاندا دا «قارعىس ايتىپ، اللاعا تاپسىراتىن ادامداردىڭ ءتىزىمى بار-اۋ» دەپ ويلاماپپىن.
نەگىزگى اڭگىمە الەۋمەتتىك جەلىدەگى بەلسەندى سەرىك بوقاننىڭ بەكبولات تىلەۋحاندى سىناعان جازباسىنان باستالعان. وندا اۆتور دەپۋتات بەكبولات تىلەۋحاندى «قىتايدان كەلگەن ءبىر قازاققا جاردەم بەرمەدى جانە پاندەميا كەزىندە ەشكىمگە كومەكتەسپەدى» دەپ سىنايدى.
ال سول جازباسى ءۇشىن دەپۋتات پوست اۆتورىنىڭ جەكەسىنە شىعىپ، «اقىرەتتە جاعاڭنان الام! ينشا-اللا! بۇكىل نامازىمدا اللا سەنىڭ جانىڭدى شىرىلداتسىن دەپ قارعىس ايتامىن! نامازىمدا قارعىس ايتاتىن بىرنەشە ادامنىڭ ءتىزىمى بار ەدى. ەندى سەن دە سول تىزىمگە قوسىلدىڭ. ءلا يللاھا يل اللاح!» دەيدى.
بەكبولات تىلەۋحاننىڭ ونداي «قارا تىزىمىندە» تاعى كىمدەردىڭ بار ەكەنى ءبىر اللاعا جانە وزىنە عانا ايان.
قازىر الەم قارىشتاپ دامىپ بارادى. وركەنيەتتى ەلدەردە ءدىن ادامزاتتىڭ مەيىرىم مەن شۋاق سىيلايتىن بيىك مادەنيەتىنە اينالدى. يلون ماسكتىڭ كەمەلەرى پلانەتاارالىق، جۇلدىزارالىق، ءتىپتى، گالاكتيكاارالىق ساپارلارعا جوسپار قۇرىپ تاستادى. قىرعىز ەلىنىڭ دەپۋتاتتارى پاندەميا كەزىندە جالاقىدان باس تارتىپ، اۋرۋحانالارعا ءوز قالتاسىنان جاردەمدەسىپ، حالىقتىڭ جاعدايىن جاساۋعا تىرىسىپ جاتىر.
ال ءبىزدىڭ دەپۋتاتىمىز باسىنان ءسال ءسوز اسسا، جەكەسىنە شىعىپ، ورتاعاسىرلىق قارعىستى قايتا ءتىرىلتىپ الىپ، ءوزىنىڭ حالقىنا جاۋدىرىپ جاتىر. ءتىپتى، اناۋ-مىناۋ شايپاۋ قاتىنداردىڭ اۋزى بارمايتىن قارعىس قوي، بۇل! سەرىك بوقاننىڭ جازباسى، دەپۋتاتقا ساۋال قويۋى وتە ورىندى نارسە. ارى-بەرىدەن كەيىن، شەنەۋنىكتەر مەن دەپۋتاتتار – حالىقتىڭ قۇلى! حالىقتىڭ اياعىن تىلىمەن جالاپ كەشىرىم سۇراسا دا ورەسكەل ەمەس. ويتكەنى، ءوزى سايلاعان سايلاۋشىسىنا ادەكۆاتتى تۇردە جاۋاپ بەرۋى ءتيىس ەدى.
قازىر «نۇر-وتان» پارتياسى كەلەسى سايلاۋعا پرايمەريز ارقىلى ىرىكتەپ جاتقانى بەلگىلى. بەكبولات تىلەۋحان قىزىل تىلىنە يەك ارتىپ، پرايمەريزدەن شاپقىلاپ وتە شىعۋى ابدەن مۇمكىن. بىراق جاڭارعىسى كەلەتىن، حالىقتىڭ ءسوزىن سويلەپ، جىرىن جىرلاعىسى كەلەتىن پارتياعا ورتاعاسىرلىق ۇستانىمداعى، قوعامدى تەك ارتقا سۇيرەيتىن رەگرەسستىك ۇستانىمداعى بەكبولاتتار كەرەك پە؟ «نۇر-وتان» وسىنداي ۋلترا-ەلەمەنتتەردەن ارىلماسا، جاڭارا قويۋى ەكىتالاي-اۋ!
بەكبولات تىلەۋحاننىڭ قارعىس ايتقان اۋديوجازباسىن تىڭداپ كورىڭىز. توبە شاشىڭىز تىك تۇرىپ، جۇرەگىڭىز مۇزدايدى! مۇنداي قارعىستان اللا دا شوشىپ كەتكەن شىعار؟!
توقتار جاقاش
