Tıpa "halyq qalaýlysy", «Nur-Otan» partııasynyń belsendi múshesi Bekbolat Tileýhanda da «qarǵys aıtyp, Allaǵa tapsyratyn adamdardyń tizimi bar-aý» dep oılamappyn.
Negizgi áńgime áleýmettik jelidegi belsendi Serik Boqannyń Bekbolat Tileýhandy synaǵan jazbasynan bastalǵan. Onda avtor depýtat Bekbolat Tileýhandy «Qytaıdan kelgen bir qazaqqa járdem bermedi jáne pandemııa kezinde eshkimge kómektespedi» dep synaıdy.
Al sol jazbasy úshin depýtat post avtorynyń jekesine shyǵyp, «Aqyrette jaǵańnan alam! Insha-Alla! Búkil namazymda Alla seniń janyńdy shyryldatsyn dep qarǵys aıtamyn! Namazymda qarǵys aıtatyn birneshe adamnyń tizimi bar edi. Endi sen de sol tizimge qosyldyń. Lá ıllaha ıl Allah!» deıdi.
Bekbolat Tileýhannyń ondaı «qara tiziminde» taǵy kimderdiń bar ekeni bir Allaǵa jáne ózine ǵana aıan.
Qazir álem qaryshtap damyp barady. Órkenıetti elderde din adamzattyń meıirim men shýaq syılaıtyn bıik mádenıetine aınaldy. Ilon Masktyń kemeleri planetaaralyq, juldyzaralyq, tipti, galaktıkaaralyq saparlarǵa jospar quryp tastady. Qyrǵyz eliniń depýtattary pandemııa kezinde jalaqydan bas tartyp, aýrýhanalarǵa óz qaltasynan járdemdesip, halyqtyń jaǵdaıyn jasaýǵa tyrysyp jatyr.
Al bizdiń depýtatymyz basynan sál sóz assa, jekesine shyǵyp, ortaǵasyrlyq qarǵysty qaıta tiriltip alyp, óziniń halqyna jaýdyryp jatyr. Tipti, anaý-mynaý shaıpaý qatyndardyń aýzy barmaıtyn qarǵys qoı, bul! Serik Boqannyń jazbasy, depýtatqa saýal qoıýy óte oryndy nárse. Ary-beriden keıin, sheneýnikter men depýtattar – halyqtyń quly! Halyqtyń aıaǵyn tilimen jalap keshirim surasa da óreskel emes. Óıtkeni, ózi saılaǵan saılaýshysyna adekvatty túrde jaýap berýi tıis edi.
Qazir «Nur-Otan» partııasy kelesi saılaýǵa praımerız arqyly iriktep jatqany belgili. Bekbolat Tileýhan qyzyl tiline ıek artyp, praımerızden shapqylap óte shyǵýy ábden múmkin. Biraq jańarǵysy keletin, halyqtyń sózin sóılep, jyryn jyrlaǵysy keletin partııaǵa ortaǵasyrlyq ustanymdaǵy, qoǵamdy tek artqa súıreıtin regresstik ustanymdaǵy Bekbolattar kerek pe? «Nur-Otan» osyndaı ýltra-elementterden arylmasa, jańara qoıýy ekitalaı-aý!
Bekbolat Tileýhannyń qarǵys aıtqan aýdıojazbasyn tyńdap kórińiz. Tóbe shashyńyz tik turyp, júregińiz muzdaıdy! Mundaı qarǵystan Alla da shoshyp ketken shyǵar?!
Toqtar Jaqash
