قۇلاقتان كىرىپ بويدى الار،
اسەم ءان مەن ءتاتتى كۇي.
كوڭىلگە ءتۇرلى وي سالار،
ءاندى سۇيسەڭ مەنشە ءسۇي.
جاقسى ءان ومىرىڭىزگە قانشالىقتى اسەر ەتەتىنىن بىلەسىز بە؟ شىن مانىندە، مۋزىكا الەمدەگى فيزيكالىق جۇيەگە ەنگەن نارسە. مۇنداعى ءاربىر نوتا فيزيكا مەن ماتەماتيكا زاڭدارىنداعى ۇساق مولەكۋلالار مەن اتومدار ىسپەتتەس. “ادىرنا” ۇلتتىق پورتالى سىزدەرمەن مۋزىكا تۋرالى جانە ونىڭ الەمگە اسەرى تۋرالى قىزىقتارمەن بولىسپەك. ومىرىندە ەشقاشان مۋزىكا تىڭداماعان بىردە-ءبىر ادام جوق دەپ سەنىممەن ايتا الامىز. سونىمەن، نازارلارىڭىزعا مۋزىكا تۋرالى ءسىز بىلمەيتىن تاڭعاجايىپ فاكتىلەردى ۇسىنامىز.
مۋزىكا سولعان وسىمدىكتەردى تىرىلتە الادى. ەگەر ديناميكتەردى سولا باستاعان گۇلدىڭ جانىنا قويىپ، باياۋ مۋزىكا قوسساڭىز، گۇل كوز الدىڭىزدا جايناي باستايدى.
مۋزىكا ەستۋ قابىلەتى ناشارلاۋىنىڭ الدىن الادى. تاجىريبە كورسەتكەندەي، مۋزىكانتتار بۇرىن-سوڭدى مۋزىكامەن اۋەستەنبەگەن ادامدارعا قاراعاندا جاقسى ەستيدى.
مۋزىكا جۇرەكتى دە ەمدەيدى. پاتسيەنتتەر ءۇشىن ينفاركت جانە وپەراتسيادان كەيىن دەنساۋلىعىن قالپىنا كەلتىرۋگە كومەكتەسەدى. عىلىمدا جاعىمدى مۋزىكا قان تامىرلارى جۇيەسىن جاقسارتۋعا ىقپال ەتەتىندىگىن دالەلدەنگەن.
جاتتىعۋ كەزىندە مۋزىكا تىڭداۋ ونىمدىلىكتى 20% ارتتىرادى. مۇنىڭ اسەرىن دوپينگپەن سالىستىرۋعا دا بولادى.
ءجيى مۋزىكا تىڭدايتىندار مەيىرىمدى بولىپ كەلەدى ەكەن. پسيحولوگيالىق ەكسپەريمەنتتىڭ ناتيجەسى بويىنشا، سۇيىكتى اندەرىن ۇنەمى تىڭدايتىن ادامدار كومەك كورسەتىپ، جاقسى ىستەر جاساۋعا 5 ەسە بەيىم بولادى.
مۋزىكا ەستە ساقتاۋ، اقىل-وي قابىلەتىن جاقسارتادى. ءسىز مۋزىكانى نەعۇرلىم كوپ تىڭداساڭىز، ناتيجە سوعۇرلىم جاقسى بولادى.
مۋزىكا اۋىرسىنۋدى باسىپ، مازاسىزدانۋدى ازايتادى.
زەرتتەۋشىلەردىڭ پىكىرىنشە، جاعىمدى مۋزىكانى تىڭداۋ تاعامنىڭ ءدامىن 60% ارتتىرادى ەكەن. كوپتەگەن مەيرامحانالاردا نەگە ۇنەمى اۋەن ويناپ تۇراتىنى بەلگىلى بولدى. بۇل دا ءبىر ماركەتينگتىك ءادىس ەكەنىن بايقادىڭىز با؟
پسيحولوگتار ءبۇي دەيدى: مۋزىكا ءسىزدىڭ كوڭىل-كۇيىڭىزدى جاقسارتىپ قانا قويمايدى، سونىمەن بىرگە ماقساتتارىڭىزعا جەتۋگە جانە وزىڭىزگە دەگەن سەنىمدىلىكتى ارتتىرادى.
سۇيىكتى مۋزىكاڭىزدى تىڭداۋ جاۋاپسىز ماحابباتتى وتكەرىپ، جاڭا قارىم-قاتىناس ورناتۋعا كومەكتەسەدى.
تانىمال ءانشى مادوننانىڭ دنك-سىن بەلگىسىز بىرەۋلەر قولعا تۇسىرمەس ءۇشىن ارنايى قىزمەتكەرلەر جۇمىس جاسايدى. ولار ءانشى شىققان عيماراتتى مۇقيات تەكسەرىپ، مادوننانىڭ شاشى يا بولماسا دەنەسىنىڭ ءبىر قىلى قالىپ كەتپەۋىن قاداعالايدى. دنك-سىن قولعا تۇسىرگەنمەن نە ىستەي قويار دەيسىز عوي. بىراق، ادامنان ايلا ارتىلعان با؟ تەحنولوگيا دامىعان زاماندا ادامزاتتان ءبارىن دە كۇتۋگە بولادى.
گيتارا ويلاپ تابۋ ءۇشىن اسپاپتا ويناي ءبىلۋدىڭ قاجەتى جوق. گيتارانىڭ Telecaster and the Stratocaster مودەلدەرىن ويلاپ تاپقان لەو فەندەردىڭ ءوزى بۇل اسپاپتا ويناي الماعان.
اني لوراك «ۋترەننيايا زۆەزدا-95» كونكۋرسى كەزىندە ءوز ەسىمىن وزگەرتكەنىن بىلەسىز بە؟ كارولينا كۋەك تىركەۋدەن ءوتۋ كەزىندە كارولينا ەسىمدى تاعى ءبىر ءانشىنىڭ تىركەلگەنىن ءبىلىپ، بىردەن ءوزىنىڭ لاقاپ اتىن وزگەرتەدى.
سۇيىكتى اۋەنىڭىزدىڭ رەميكس نۇسقاسى ۇناماي ما؟ ماسەلە اۋەننىڭ دۇرىس وڭدەلمەگەنىندە ەمەس. زەرتتەۋلەر كورسەتكەندەي، ءاننىڭ تۇپنۇسقاسىن ۇناتۋىمىز ونىڭ ساپاسىنان ەمەس، تۇپنۇسقاسىن الدىمەن تىڭداعانىمىز سەبەپتى ەكەن. ەگەر رەميكستى ءبىرىنشى تىڭداساڭىز، وندا رەميكستى قۇپ كورەتىنىڭىز انىق.
اياۋلىم ءابىلدا،
“ادىرنا” ۇلتتىق پورتالى
