ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىنا 379 مىڭ ادام قاتىستى. بۇل تۋرالى قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سەرىك شاپكەنوۆ ءمالىم ەتتى.
«مەملەكەتتىك باعدارلامانى جۇزەگە اسىرۋ اياسىندا شاعىن بيزنەستى دامىتۋ ءۇشىن 5 800 جەڭىلدەتىلگەن نەسيە مەن 17 200 قايتارىمسىز گرانت بەرىلدى. 5 800 شاعىن نەسيە الۋشى قوسىمشا 6 151 تۇراقتى جۇمىس ورنىن قۇرا الدى»، - دەدى س. شاپكەنوۆ.
ۆيتسە-ءمينيستردىڭ ايتۋىنشا، مەملەكەت سۋبسيديالايتىن جۇمىس ورىندارىنا 156 مىڭ قازاقستاندىق جۇمىسقا ورنالاسقان. جۇمىسپەن قامتۋ ورتالىقتارىنىڭ جولدامالارى بويىنشا 130 مىڭ ادام اشىق بوس جۇمىس ورىندارىنا يە بولدى.
«بۇگىندە 34,5 مىڭ ادام كاسىپكەرلىك نەگىزدەرىنە قىسقا مەرزىمدى وقىتۋدان وتۋدە. قىركۇيەك ايىندا ۇبت تاپسىرماعان 20 مىڭنان استام تالاپكەر جۇمىسشى ماماندىقتارىنا تەگىن كاسىپتىك-تەحنيكالىق وقۋعا جىبەرىلەدى»، – دەدى سپيكەر.
“ادىرنا” ۇلتتىق پورتالى
