شىمكەنت قالاسىندا 17 تامىزدان باستاپ شەكتەۋ شارالارىن كەزەڭ-كەزەڭىمەن جەڭىلدەتۋ بويىنشا شەشىم قابىلداندى. وسىعان وراي كاسىپكەرلىك نىساندار ءوز جۇمىسىن قايتا باستاۋ بارىسىندا «InfoKazakhstan» بىرىڭعاي پورتالى ارقىلى جۇزەگە اسىرۋى ءتيىس. بۇل پلاتفورماعا تىركەلۋ 4 قادامنان تۇرادى:
1-قادام. «InfoKazakhstan» سايتىنا كىرىپ، ۇيىمىڭىزدى ەلەكتروندى تسيفرلىق قولتاڭبا ارقىلى تىركەپ، كاسىبىڭىزگە قويىلعان تالاپتارمەن تانىسىڭىز. بيزنەستىڭ جەكەلەگەن تۇرلەرى جۇمىسىن تەكسەرۋسىز، حابارلاما تارتىبىندە قايتا باستاي الادى.
2-قادام. نىساندى تالاپتارعا ساي دايىنداپ، جۇمىس ىستەۋگە دايىندىعىڭىزدى ەلەكتروندى ءوتىنىم بەرۋ ارقىلى راستاڭىز.
3-قادام. سانيتارلىق-ەپيدەميولوگيالىق قىزمەتتىڭ تەكسەرۋ جۇرگىزۋىن كۇتەسىز.
4-قادام. تەكسەرۋ جۇرگىزىلگەن سوڭ ناتيجە وڭ بولسا، وندا جەكە كابينەتتە جۇمىستى قايتا باستاۋعا سانيتارلىق نورمالارعا سايكەستىك اكتىسىن جۇكتەپ الۋ قاجەت. ەگەر ناتيجەسى تەرىس بولسا، وندا ولقىلىقتاردى رەتتەپ، ءوتىنىمدى قايتا جىبەرىڭىز.
ءوتىنىمدى «InfoKazakhstan» سايتىنا بەرگەننەن كەيىن، ساۋدا، سونداي-اق ادامدار كوپ شوعىرلاناتىن نىساندارىنا سانيتارلىق-ەپيدەميولوگيالىق قىزمەتتىڭ تەكسەرۋ جۇرگىزىلەتىنى جانە تەك سول تەكسەرۋ ناتيجەسىنەن كەيىن عانا نىساندى اشۋعا رۇقسات بەرىلەتىنىن كاسىپكەرلەردىڭ نازارىنا جەتكىزەمىز.
ايتا كەتەيىك، بۇل سايتتا اكىمدىكتەر، سانيتارلىق دارىگەرلەر، پوليتسيا، وڭىرلىك پالاتالار جانە تۇتىنۋشىلار ليگاسى وكىلدەرىنەن قۇرالعان تۇراقتى مونيتورينگتىك توپ جۇمىس ىستەيدى. رەسۋرس قىزمەتىن ءبىر مەزگىلدە 150 000 تۇتىنۋشى پايدالانا الادى. ال سۇراقتاردى بىرىڭعاي بايلانىس-ورتالىعىنا 1432 (قوڭىراۋ شالۋ تەگىن) قوڭىراۋ شالىپ، قويۋعا بولادى.
ەسكەرتەيىك، 17 تامىزدان باستاپ رۇقسات بەرىلەتىن نىسانداردىڭ وزىندىك ءتəرتىبى بار:
ساۋدا ۇيلەرى (بۋتيكتەر), ساۋدا جەلىلەرى، جابىق بازارلار (تولىمدىلىعى 30%-دان اسپاۋى ءتيىس، 1 كەلۋشىگە 4 ش.م), سۇلۋلىق سالوندارى، شاشتاراز، سپا ورتالىقتارى، كوسمەتولوگيالىق قىزمەت كورسەتەتىن نىساندار (الدىن الا جازىلۋ بويىنشا 1 كەلۋشىگە 4 ش.م.), باسسەينى جوق فيتنەس ورتالىقتارى (تولىمدىلىعى 50%-دان اسپاۋى ءتيىس، 1 كەلۋشىگە 5 ش.م.), باسسەينى جوق مونشالار مەن ساۋنالار (تولىمدىلىعى 50%-دان اسپاۋى ءتيىس، 1 كەلۋشىگە 4 ش.م.) جۇمىسىن قايتا باستايدى. سونداي-اق، بالالارعا ارنالعان تۇزەتۋ كابينەتتەرى، بالالار جانە ەرەسەكتەرگە ءبىلىم بەرۋ ورتالىقتارى (جازىلۋ بويىنشا، توپتاردا 5 ادامنان اسپاۋى ءتيىس), مەكتەپكە دەيىنگى بالالار مەكەمەلەرىنىڭ كەزەكشى توپتارى (15 ادامنان ارتىق ەمەس) جانە اشىق اۋاداعى اتتراكتسيوندار (قاشىقتىقتى ساقتاۋ، بەتپەردە تاعۋ، ادامدار اعىنىن رەتتەۋ) جۇمىستارىنا كىرىسەدى.
ال توپتىق جاتتىعۋلار جاساۋعا (5 ادامنان ارتىق ەمەس) جانە ۇلتتىق قۇراما، كلۋب كوماندالارى ءۇشىن سپورتتىق جاتتىعۋلار جاساۋعا (30 ادامنان ارتىق ەمەس، سپورت بازالارىندا تۇرۋ، ەپيدەمياعا قارسى شارالاردى جانە الدىن الۋ شارالارىن ساقتاۋ) رۇقسات ەتىلەدى.
شىمكەنت
