بۇگىن شىمكەنت قالاسىنىڭ اكىمى مۇرات ايتەنوۆتىڭ قاتىسۋىمەن قالاداعى الەۋمەتتىك سالاداعى قۇرىلىس ماسەلەسى جونىندە جيىن ءوتتى. وندا سالاعا جاۋاپتىلار قازىرگى تاڭعا دەيىن اتقارعان جۇمىستارى جايلى قالا اكىمىنە باياندادى.
«Shymkent» اكك» اق توراعاسى باۋىرجان كانكيننىڭ ايتۋىنشا، وسى كۇنگە دەيىن جوسپارلانعان 66 جوبانىڭ 32-ءسى جۇزەگە اسقان. قالعان 31 جوبا جاسالۋ ۇستىندە ەكەن. ال 3 جوبا ناقتىلانىپ جاتىر. ونىڭ ىشىندە، ءۇي قۇرىلىسى – 9, ءبىلىم - 9, دەنساۋلىق ساقتاۋ – 6, ساۋدا نۇكتەلەرى – 13, شاعىن جانە ورتا بيزنەسكە قاتىستى – 6, ءوندىرىس – 16, اگرو ونەركاسىپ كەشەنى بويىنشا – 7 جوبا.
قالا باسشىسى اتالعانداردىڭ ىشىندە ەڭ ءبىرىنشى ءبىلىم جانە دەنساۋلىق ساقتاۋ سالاسىنا نەگىزگى باسىمدىلىق بەرىلۋ كەرەكتىگىن اتاپ ءوتتى. سونىمەن قاتار، جيىن بارىسىندا ينۆەستورلار تارتۋ، شاعىن جانە ورتا كاسىپكەرلىكتى دامىتۋ ماسەلەسىن ءسوز ەتكەن مۇرات ايتەنوۆ، «Shymkent» اكك» جۇمىسىنا كوڭىلى تولمايتىنىن جەتكىزدى.
«كاسىپكەرلەر مەنىمەن كەزدەسۋ كەزىندە قاعازباستىلىق جۇمىستارىنا نارازىلىقتارىن بىلدىرەدى. ونداي جۇمىستى جەڭىلدەتۋ ءۇشىن ءبىر تەرەزە قاعيداتى بويىنشا كاسىپكەرلەرگە قىزمەت كورسەتەتىن ارنايى فرونت-وفيس اشقان بولاتىنبىز. جەرگىلىكتى كاسىپكەرلەردىڭ سول جەردە بارلىق سۇراعى قاناعاتتاندىرىلىپ، كاسىبىن باستاۋعا تولىعىمەن كومەك الۋى قاجەت ەدى. بۇگىندە اتالعان مەكەمە جۇمىسىنىڭ ناتيجەسى كورىنبەيدى» - دەدى ول.
سونداي-اق، جيىن سوڭىندا قالا اكىمى ينۆەستورلار ەسەبىنەن پايدالانۋعا بەرىلەتىن تۇرعىن ءۇي كولەمىن جىلىنا 1 ملن شارشى مەترگە دەيىن ۇلعايتۋدى، تۇرعىن ءۇي قۇرىلىسىنا كەپىلدىك بەرۋ قورىمەن بىرلەسكەن باعدارلاما ازىرلەۋدى، «1000 ساۋدا ورنى» جوباسىن ىسكە اسىرۋدى جەدەلدەتۋدى تاپسىردى.
شىمكەنت قالاسى اكىمىنىڭ ءباسپاسوز قىزمەتى
