اعىمداعى جىلدىڭ 09 شىلدەسىندە پاۆلودار قالاسىنىڭ سولتۇستىك پوليتسيا بولىمىنە 23-00 ساعات شاماسىندا كامزين كوشەسى بويىنداعى ۇيدەن 2006 جىلى تۋعان كامەلەتكە تولماعان قىزدىڭ كەتىپ قالىپ، قايتا ورالماعانى تۋرالى حابارلاما كەلىپ ءتۇستى. «102» تەلەفونىنا ۇرەيلەنگەن اناسى قوڭىراۋ شالىپ، قىزى ۇرىستان كەيىن تۇنگى ۋاقىتتا بەلگىسىز باعىتتا ۇيدەن كەتىپ قالعانىن جەتكىزدى. اناسىنىڭ ايتۋىنشا، قىزىنىڭ بۇدان بۇرىن ۇيدەن كەتىپ قالۋ ادەتى بولماعان. ءوز بەتىنشە ىزدەۋ جۇمىستارى ناتيجەسىن بەرمەگەن سوڭ، ايەل ادام پوليتسياعا حابارلاسقان. قىز بالانى ىزدەۋگە پاۆلودار قالاسى پوليتسيا باسقارماسىنىڭ بارلىق جەكە قۇرامى جۇمىلدىرىلدى. جەدەل-ىزدەستىرۋ شاراسى كەزىندە پوليتسەيلەرمەن قىز بالانىڭ تۇرعىلىقتى جەرى انىقتالىپ، زاڭدى وكىلدەرىنە قايتارىلدى. يۋۆەنالدىق پوليتسيا قىزمەتكەرلەرى كامەلەتكە تولماعان قىزبەن پروفيلاكتيكالىق اڭگىمە جۇرگىزدى. 9-سىنىپ وقۋشىسى بۇدان بىلاي ۇيدەن كەتىپ قالمايتىنىنا ۋادە بەردى.
اعىمداعى جىلدىڭ باسىنان باستاپ وبلىس اۋماعىندا كامەلەتكە تولماعانداردىڭ 49 ءوز ەرىكتەرىمەن ۇيدەن كەتىپ قالۋ فاكتىسى تىركەلگەن. بارلىق فاكتىلەر بويىنشا كامەلەتكە توماعاندار انىقتالىپ، زاڭدى وكىلدەرىنە قايتارىلدى.
“ادىرنا” ۇلتتىق پورتالى
