ۆاكتسينانى حالىقتىڭ 20 پايىزىنا جاساۋ جوسپارلانۋدا

1040

دەنساۋلىق ساقتاۋ ءمينيسترىنىڭ ورىنباسارى ليۋدميلا بيۋرابەكوۆا حالىققا ۆاكتسيناتسيا جاساۋ ماسەلەسىن ءسوز ەتتى. بۇل تۋرالى ول وتكەن اپتادا ونلاين بريفينگ بارىسىندا مالىمدەدى.

ۆيتسە ءمينيستردىڭ ايتۋىنشا، ۆاكتسينا جاساۋ ەڭ الدىمەن سوزىلمالى اۋرۋى بار، سىرقاتى قاۋىپتى سانالاتىن ادامداردان باستالادى ەكەن. ەڭ الدىمەن، پنەۆمونيا اۋرۋىنا شالدىعۋى مۇمكىن دەگەن ادامدارعا ەكپە ەگىلۋ جوسپارلانۋدا ەكەن. سونداي-اق، بيۋرابەكوۆا حالىقتىڭ قانشا پايىزىنا ۆاكتسيناتسيا جاسالماق دەگەن سۇراققا: «ءبىز ەكپە سالىنۋعا ءتيىس دەگەن حالىقتىڭ 15 پايىزىنا ەسەپ جاساپ وتىرمىز. الايدا كەلىسىم اياسىندا بۇل كورسەتكىشتى  20 پايىزعا دەيىن ارتتىرۋدى جوسپارلاپ وتىرمىز»، - دەدى.

سونىمەن قاتار ۆيتسە مينيستر ۆاكتسينا شىعا سالىسىمەن، ەكپەنى ساتىپ الۋ جانە ۆاكتسيناتسيا جۇمىستارى باستالاتىنىن دا مالىمدەدى.

دەسەك تە، ۆيتسە مينيستر قانداي نەگىزگە سۇيەنىپ، الدىن الا ەكپەنى ساتىپ الۋعا جانە قانشا ادامعا سالىناتىنىن جوسپارلاپ جاتقانىن تارقاتىپ ايتپادى. كوروناۆيرۋستىڭ الدىن الاتىن ۆاكتسينا جەر پلانەتاسىندا ءالى تابىلعان جوق. سوندا ءبىزدىڭ دەنساۋلىق مينيسترلىگى قانداي ۆاكتسينانى ساتىپ الۋعا اقشا ساناپ وتىر؟ قانداي ۆاكتسينانى حالىقتىڭ 20 پايىزىنا سالماق؟

قازاقستان ەمەس، اتىنان ات ۇركەتىن، عىلىمى شارىقتاپ دامىپ كەتكەن گەرمانيا سەكىلدى الپاۋىت ەلدەر كوروناۆيرۋستىڭ ۆاكتسيناسى تاياۋدا تابىلاتىنىنا سەنىم ارتپاۋدا. ال قازاقستاندىق دەنساۋلىق ساقتاۋ مينيسترلىگى وكىلدەرى ەكپە ناۋقانىنا ساقاداي ساي دايىن وتىر.

ءسىز قالاي ويلايسىز؟

اۋەلحان شونجان، زەينەتكەر: «ءبىزدىڭ ەلدەگى بارلىق تىرلىك وسىنداي عوي، اتى بار، زاتى جوق. مەنىڭشە، مينيسترلىك ەكپە جاساۋعا حالىقتى اقىرىنداپ كوندىرۋ جۇمىسىنا كىرىسكەن سەكىلدى. وسى ۆيرۋس شىققاندا ادامداردى جاپپاي ۆاكتسيناتسيا جاساۋ باستالاتىنى ءسوز بولعانى ەستە. سوعان قاراعاندا، پاندەميادان كەيىنگى كەلەسى جوسپار وسى ەكپە سياقتى. جارايدى، ەكپە جاساتايىق دەلىك. الايدا ول قانداي ەكپە؟ الەم عالىمدارىنىڭ ءوزى كوروناۆيرۋستىڭ ۆاكتسيناسى ويلاپ تابىلعانىمەن، ونىڭ ناتيجەسىن كورۋگە كەمىندە ءبىر جىل ۋاقىت كەرەگىن ايتتى ەمەس پە؟

الەم عالىمدارى اقىماق پا، جوق ءبىزدىڭ شەنەۋنىكتەر بىلگىش پە؟ پاندەميا كەزىندە قازاقستاندىق مەديتسينانىڭ جاعدايى قاي دەڭگەيدە ەكەنىنە كوزىمىز جەتتى. وكپە قابىنۋى مەن كوروناۆيرۋستى اجىراتا الماي، قالا بەردى ىندەتكە ەش دايىندىعى بولماعانى، بار ءدارىنى قويمادان شىعارماي ۇستاپ، حالىقتى قىناداي قىرعانىن شىققىر كوزىمىز كوردى ەمەس پە؟! وسىدان كەيىن كىم قازاق مەديتسيناسىنا سەنىم ارتىپ، ەكپە جاساتۋعا كەلىسە قويار ەكەن؟ مەنىڭشە، ۆاكتسينا ماسەلەسى دەنساۋلىق ساقتاۋ مينيسترلىگىنىڭ بيۋدجەتتەن كەزەكتى اقشا سۇراۋعا جاسالعان قادامى عانا. ميللياردتاپ اقشانى جەلگە شاشقان مەديتسينامىز ءالى ومىردە جوق ۆاكتسينانى ءسوز ەتۋگە دە ارلانباعانى جانىمىزعا باتادى».

ەربول تۇرعانباي، جۇمىسشى: «ءوزىمىزدىڭ ساۋلىعىمىز، اماندىعىمىز ءۇشىن، ارينە ۆاكتسينا جاساتۋع ءتيىسپىز. مەن قوس قولداپ قولدايمىن. جانە ەڭ ءبىرىنشى بولىپ سالدىرۋعا دايىنمىن. ويتكەنى كوروناۆيرۋستان ءولىپ قالا جازداپ، جازىلعاننىڭ ءبىرى ءوزىم. قۇداي بەتىن اۋلاق ەتسىن، ەندى قايتىپ سولاي اۋىرماس ءۇشىن تەزىرەك ەكپە جاسالۋىن كۇتىپ تە ءجۇرمىن».

جاننا ادامبەكقىزى، ەكونوميست: «اۋەلى ۆاكتسينا تابىلسىنشى. ول تابىلماي تۇرىپ، حالىققا ەكپە ەگەمىز دەۋ قيسىنسىز عوي. الدە ءبىزدىڭ دارىگەرلەر باس كوز جوق ويلارىنا كەلگەن ۆاكتسيناتسيانى باستاپ جىبەرمەك پە؟ كوكتەمنەن بەرگى كوزىمىز جەتكەن ەلىمىزدەگى مەديتسينا احۋالى سىن كوتەرمەي تۇر. پاراتسەتامولى جوق قازاقستاندا الەمدى دۇرلىكتىرگەن كوروناۆيرۋسقا قارسى ەكپە جاساۋدى ايتۋ، كۇلكىلى ەمەس پە؟!

شىلدە ايىندا ءولىم اۋزىنان قايتقان، مەديتسينامىزدىڭ قاۋقارسىز كەيپىن كورگەن كەز كەلگەن ادام ەكپەگە قارسى بولاتىن شىعار. ونىڭ ۇستىنە ءبىزدىڭ ەلدە مەديتسيناعا سەنىم قالماعان. ۆاكتسيناعا ءتىپتى سەنە قويماس. ءوز باسىم ەكپە جاساتۋعا قارسىمىن».

ءبىز سۇراۋ سالعان ازاماتتاردىڭ پىكىرى وسىنداي. ءسىز نە دەيسىز، قۇرمەتتى وقىرمان؟ ۆاكتسينا تۋرالى ءسوز قوزعاۋعا ءالى ەرتە ەمەس پە؟

مەرۋەرت حۋساينوۆا،

«ادىرنا» ۇلتتىق پورتالى.  

پىكىرلەر
رەداكتسيا تاڭداۋى